26. यीशु आपलो सेवा बुता करुक मुरियातोर

जिदलदाय शयतान यीशु के परखलो पाचे, यीशु गलील ने बोहड़लो। ए हुनी जगह रली जहां हुन रते रलो। पवितर आत्मा हुनके खुबे सामर्थ देते रलो, आउर यीशु गोटोक जगा ले दुसर जगा, लोग मनके जाउन बाती सिखालो। जमाय उन मन हुनचो काजे नंगत गोट गोठयाते रहोत।

यीशु नासरत सहरने गेलो, ए हुन गाँव रली जहां हुन आपलो पिला बेरा रते रये। सबद चो दिन, हुन आराधना करतो जगा ने गेलो, धरम गुरु मन हुनके यशायाह अगमज्ञानी चो संदेसा चो गोटोक पुस्तक के दिला। कि यीशु पढ़ो बोलून बाती, हुन मन चाहते रला। आउर यीशु हुन पुस्तक के निकराउन बाती हुनचो गोटोक भाग के पढ़लो।

यीशु पढ़लो कि “महा परबू चो आत्मा मोचो उपरे आसे, ए काजे की हुन गरीब-दुखी मनके नंगत खबर सुनाउक सके। हुनी काजे हुन मोके पठालो से, कि बंधुआ मनके छड़ातो काजे, काना मनके दखातो काजे, आउर हुन मन के छुटकारा देतो काजे, जोन मन के दुसर लोग मन रमन्डून पकासोत। ए हुनी बेरा आय, जिदालदाय महा परबू आमचो उपरे किरपा करेदे, आउर आमचो सहायता करेदे।"

फेर यीशु बसून सिखाउक मुरियालो। आउर मण्डली घरे रलो जमाय लोग मन खुबे धियान देउन हुनचो बाटे दखते रला। जोन भाग के हुन एबे पढुन रलो हुन मसीह चो बारे ने रली, हुनी गोठ ए बेरा सते होयसे। तेबे हुन उन मन के बललो, “पबितर सास्तर चो ऐ गोट आजी तुमचो पुरे पूरा होली से। जसन एके पढ़तो के सुनलासास, आउर जमाय लोग मन यीशु के सहराला। आउर हुनचो टोंड ले निकरलो दया धरम चो गोठ के सुनून भक्याउन गेला। आउर बलला, काय ऐ युसुफ चो बेटा नुआय?

तेबे यीशु बललो, “ये सते आय कि असन अगमज्ञानी मनके जोन हुनी गाव ने पालून बातिन बढ़लो से हुनके नी पतियाऊ आत। अगमज्ञानी एलिय्याह चो जीव रलो बेरा, जिदलदाय खुबे रांडी बायले मन रला। मान्तर साढ़े तिन बरक ले पानी बरसा नी होली, तेबे महा परबू एल्लियाह के इस्राएल ने कोनी बले रांडी बायले चो मदद करतो काजे नी पठालो। एचो पलटा, हुन एल्लियाह के दुसर देश चो कोनी दुसर रांडी बायले लगे पठालो।"

आउर यीशु बोलते रलो, "आउर अगमज्ञानी एलिशा चो बेरा ने, इस्त्राएल ने खुबे लोग मन कोड़ बेमार मन रला। मान्तर एलिशा इस्त्राएल राज चो बिरोधी नामान नाव चो सेनापति के छाडून कोनी आउर के छुक-छुका नी करलो। मान्तर जोन लोग मन ए सब बोलतो बेरा सुनते रहोत, हुन सपाय मन यहूदी रहोत। हुनी काजे जिदलदाय हुन मन हुनके ए सब बोलतो बेरा सुनला तेबे हुन मन हुनके रीस होला।

नासरत चो लोग मन यीशु के धरला आउर हुनके आराधना चो जगा ले ओड़गोड़ते खोर ने निकराला। आउर जोन डोंगरी ने हुनमन घसराऊन मारुन्दे बलते नीला। मान्तर यीशु हुनमन चो मजिगता ले निकरून नासरत सहर के छाडून जाते गेलो।

यीशु सपाय गलील परघन ने गेलो, आउर असन भीड़ हुनचो लगे ईली। हुन मन असन खुबे लोग मन के हुनचो लगे आनला जोन मन बेमार आउर बिकलांग रला। हुन थाने कोनी तो दखुक नी सकतो, कोन तो हिंडूक, सुनुक नहले बलुक लाय नी सकते रहोत, जमाय के यीशु छुक-छुका करलो।

आउर बले असन लोग मन रहोत जोन मनके देव चेपाउन रहे। हुन मनके बले यीशु लगे नेऊन रहोत, यीशु देव भूत मनके फिरून जा बललो, हुन देव-भुत मन अमदिया किरकिरते रहोत, "तुई महापरबू चो बेटा आस!" आउर कूड़ा होलो लोग भकियाला, आउर हुन मन महा परबू चो जय-जय करला।

फेर यीशु बारा मनुक मनके चुनलो, जोन मनके हुन आपलो "प्रेरित" बललो। हुन प्रेरित मन हुनचो संगे यात्रा करला आउर हुनचो ले खुबे काइं सिखला। "