27. जीव दुखातो सामरी चो कहनी

गोटोक दिन, नियम परनाली चो धरम गुरु यीशु लगे इलो। हुन सबके ए द्खाउक लाय होते रलो कि हुन ए मनके गलत रीती ले सिखाय से। हुनी काजे हुन बललो कि, ‘हे गुरु, जुग-जुग चो जीव पावतो काजे मोय असन काय करेंदे? यीशु हुनके संगालो कि, "महा परबू चो नियम कानून चो पुस्तक ने काय लिखालोर आसे?"

हुन बिता संगालो, "हुन बलुआय कि आपलो महा परबू ले आपलो सपाय मन ले, जीव ले सामर्थ ले, आउर चेत ले मया संगाव। यीशु बललो, "तुई सते बलसिस! मान्तर तुई असन करलिस बलले, तेबे तुई जुग-जुग काजे जीवसे।

मान्तर हुन नियम परनाली चो गुरु, लोग मनके दखाउक चाहते रलो कि हुनचो जीवतो नंगत ढंग आय। आपन के सत करतो काजे, हुन यीशु ले पुछलो कि, आले सांग मोचो घर चो लोग कोन आत?

यीशु हुन गुरु के गोटक कहनी सुनाउन हुनचो जबाब दिलो।" गोटक यहूदी मनुक रलो जोन गोटक बाट ने यरूशलेम ले यारिहो जाते रलो।"

मान्तर चोर मन हुनके छेकुन हुनचो फटई के झिकून निस्काला, सपाय सज के बले नीला आउर खुबे पेटला आउर तेबे हुन मन गेला।

आउर असन होली की हुनी बाट ले गोटोक लेबी जहुदी मन चो पुजारी जाते रलो, हुन मनुक के खाले पड़लो दखलो। मान्तर हुन मनुक के नहकुन लापी ले जाते गेलो।

कितलो दिन गेलो पाचे गोटक लेवी हुन बाट ने इलो। (लेवी यहूदी मन चो गोटक गोत्र रली जोन मंदिर ने पुजारी मनके मदद करते रये) हुन लेवी बले बाट रेटे ले गेलो मान्तर हुनके दखून जाते गेलो।

मान्तर दुसर बिता जोन हुन बाट ले जाते रलो, हुन सामरिया रलो। (समरी आउर यहूदी आपस ने बिरोधी रला) हुन दखलो कि गोटक यहूदी बिता बाटे पड़लो से फेर बले हुन हुनचो उपरे जीव दुखालो, आउर हुनचो लगे जाऊन बाती हुनचो घाव मन ने तेल लगालो आउर घाव मन ने मालाम पाट्ठी बांधून दिलो।

आउर हुन सामरी बिता हुन मनुक के आपलो गदहा ने लतुन बाती आसरम ने निलो आउर हुनचो सेवा जतन करलो।

दुसर दिने हुन समरी बिता के आपलो यात्रा ने जातोर रली। हुनि काजे आसरम चो मालिक के धन दौलत दिलो, आउर हुन चो सेवा जतन करतो काजे सोपुन बललो, जितलो बले आगर खरचा होयदे, मय बोह्डून ईलो ने देय दे।

तेबे यीशु हुन गुरु के पुछलो, तुय काय विचारसे ए तिन झन लोग ने हुनचो जेके हुन के चोर मन छेकुन रला, हुन चो काजे ऐ तीनो झन ने कोन नगत घर लोग आय? हुन गुरु बललो, ”हुनी जोन हुनचो उपरे दया द्खालो जीव दुखालो। यीशु हुनके बललो, ”जा तुई बले असनी कर।