28. सवकार जुवान मनुक

गोटोक दिने गोटोक जुवान सवकार मुखिया यीशु कगे जाऊंन बाती हुनके पूछलो, “ऐ नंगत गुरु जुग-जुग चो जीव पावतो काजे मोके काय करतोर आय? यीशु हुनके बललो, “तुई मोके काय काजे नंगत बलसीस? महा परबु गोटोक ची नंगत आय। मान्तर तुई जुग-जुग चो जीवना पावतो काजे महा परबु चो हुकुम के मान।

हुन बल्लो, “मोके काय-काय हुकूम के मांतोर आय, यीशु हुनके बललो, “मोरतो नी मारतोर आय, चोरतोर नुआय, फंदसंकी नी देतोर आय, आपलो आया-बाबा के मान करतोर आय, आपलो पारा चो लोग मन के आपलो जसन मया करतोर आय।

हुन बोललो, “मय तो ऐ जमाय के मोचो पिला बेरा ले मानेसे। मोके जुग-जुग चो जीव पातो काजे मोके काय करतोर आय? यीशु हुन के दखुन मया करलो।

यीशु हुनके बललो, “आले तुई सते आस आले आपलो जमाय धन के बिकुन देस, आउर हुन धन पूंजी के गरीब मन ने बाटून देस, आउर तुके सरग ने धन मिरेदे। तेबे तुई मोचो पाठ होसे।

यीशु असन बलतो के हुन जुवान लेका सुनुन बाती हुन खुबे मुर-मुरा होलो। कसन बलले ने हुन खुबे सवकार रये, आउर हुनचो आपलो सपाय धन देतो काजे मन नी करते रलो। हुन बोहडून यीशु लगे ले जातो गेलो।

तेबे यीशु आपलो चेला मनके बललो, “महा परबू चो राज ने सावकार लोग मन चो ओलतोर कितलो खटखट आय! गोटोक सवकार मनुक चो महा परबु चो राज ने ओलतोर ऊंट चो ले सुजा चो काना ले छिगडतोर खुबे सरसरा होय दे।

जोन यीशु बललो, “जिदलदाय चेला मन हुनचो गोठ के सुनला, तेबे हुन मन भकियाला। हुनमन बोलला, "आले ए असन आय आले तेबे महा परबू कोके बचायेदे।

यीशु आपलो चेला मनके दखुन बाती बोललो, "लोग मन आपन चो उद्धार करुक नी सकोत। हुन सपाय महा परबू करुक सके।

पतरस यीशु के बललो, “दखा परबू हामी चेला मन आपलो जमाय घर दुआर के छाड़ून तुमचो संगे होलू से।” तेबे आमचो काय भेट आय।

यीशु हुन मनके बललो, “मय तुमके सते बलेसे, जोन कोनी बले महा परबु चो राज काजे घर, बायले, भाई-बहिन, आया-बाबा नाहले आपलो पिला–झिला मनके छाड़लो से हुन उन चो ले 100 गुना आगर पायदे, आउर हुन जुग-जुग जियेदे। मान्तर खुबे लोग मन जोंन पुरे आसोत, पाटे होदे आउर जोंन पाटे आसोत हुनमन पुरे होदे।