29. जीव नी दुखातो कमेया चो कहनी

गोटोक दिने, पतरस यीशु ले बललो, “ऐ परबू मोचो भाई के कितरो हार क्षमा कारतोर आय, जिदलदाय हुन मोचो ले बिरुध जायेदे? काय कसूर करलेर काय सात हार ले? "यीशु बललो, सात हार ने नाही मान्तर सात हार चो सत्तर हार ले क्षमा करसे! एचो मतलब आय कि अमदिया क्षमा करतोर आय। तेबे यीशु नुआ कहनी सान्गलो।

यीशु बललो, “महा परबू चो राज गोटोक राजा असन आय जोन आपलो कमिया मनले लेखा जोखा धरुआय। हुनचो गोटोक कमिया 2,00,000 बरख चो कमिया बराबर गोटोक खुबे बड़े करजा चो करजदार रलो।

मान्तर हुन कमिया आपलो करजा के चुकता करुक नी सकलो, हुनी काजे राजा आपलो दास हुनके बललो, "एचो करजा चुकता करतो काजे ए मनुक के आउर एचो घर लोग के कमिया करून देस।"

हुन कमिया राजा चो पुरे मांढी टेकून आउर पाटा पडून बललो, "खिंडीक मोचो संगे धीरजा संगाव। आउर मय आपलो करजा चो जमाय रकम के चुकता करून देयेंदे। राजा के कमिया उपरे जीव दुकली, हुन काजे उन हुनचो जमाय करजा के माफ़ी दिलो। आउर हुनके जाउक लाय दिलो।

मान्तर हुन कमिया राजा लग ले खोर ने निकरलो, तेबे हुनके हुनचो आउर गोटोक संगवारी कमिया मिरलो, जोन हुनचो चार महिना चो कमिया रतो चो करजदार रलो। हुन कमिया आपलो संगवारी कमिया के धरलो आउर हुनके बललो, 'जोन तुचो उपरे मोचो करजा आसे हुनके मोके चुकाव!

हुन संगवारी कमिया मांढीकुटा देहुन हुनके बोललो, 'खिंडीक मोचो संगे धीरजा धर, आउर मय आपलो जमाय रकम के चूकाउन देयेंदे। मान्तर एचो पलटा, हुन कमिया बिता आपलो संगवारी कमिया के जेल खाना ने ढाकुन दिलो, जिदलदाय ले हुन हुनचो करजा के नी चुकालो।

जोन बले कांई होउन रली, हुनके दुसर कमिया बिता मन दखते रला, आउर हुन मन खुबे डरला। हुन मन राजा लगे गेला आउर हुनके सपाय कहनी सांगला।

राजा हुन कमिया के हागदेउन बोललो, 'हे दुष्ट कमिया! मय तुचो करजा के एचो काजे छाडून रये कि तुई मोचो ले बिनती करून रलीस। तुके बले उसनी करतोर रली। राजा इतलो रीस होलो कि हुन दुष्ट कमिया बिता के जेल खाना ने ढाकुन दिलो जिदलदाय ले हुन आपलो सपाय करजा के चुकाउन नी देय।

तेबे यीशु बललो, "तुमी मन आपलो भाई बंधू मनके आपन हृदयले क्षमा नी करासे, तेबे मोचो सरग ने बिराजलो बाबा तुमन मनले हर गोटोक झन संगे असनी करेदे।"