30. यीशु पांच हजार लोक मनके भात खुआउआय

यीशु आपलो प्रेरित मनचो परचार करूक आउर लोग मनके सिखातो काजे गुलाय दुसर-दुसर गाव ने पठालो। जिदलादाय हुनमन हुन थाने बह्ड़ला जोन थाने यीशु रलो, तेबे हुन मन सांगला कि हुन मन काय-काय करुन रहोत। तेबे यीशु हुन मनके झोड़ीचो दुसर बाटे गोटोक छिड़ा जगा ने डडीक बिसातो काजे हाग दिलो। तेबे हुन मन गोटोक डोंगा ने चेगुन झोड़ी चो दुसर बाटे गेला।

मान्तर हुन थाने खुबे असन लोग रला। जोन मन यीशु आउर हुनचो चेला मनके डोंगा चेगुन जातो के दकला। ए लोग मन पुरे चो झोड़ी चो दुसर बाटे जातो काजे झोड़ी चो रेटे-रेटे पराला। तेबे जिदलदाय यीशु आउर चेला मन अमरला तेबे गोहड़ायेक लोगमन हुन मन चो बाट दखते रला।

हुन गोहड़ी ने बायले आउर पिला के छाडून 5000 ले बले आगर मनुक मन रओत। यीशु हुन लोग मन उपरे खुबे जीव दुखालो। यीशु काजे हुन लोग मन बिना धोराई चो मेंढा मन जसन रला। हुनी काजे हुन उन मनके सिखालो, आउर हुन मन चो मंजिगता जोन लोग मन बेमार रला हुन मनके उजरालो।

सांझ बेरा के चेला मन यीशु के बलला, "ऐदाय खुबे बेर होली आउर ऐ लगे कोनी गाव बले नी आय। ए लोग मनके बीदा करून देस तेबे हुनमन जाउन बाती खातो काजे काई आनदे।"

मान्तर यीशु चेला मन के बललो, "तुमी ची हुन मन के काई खातो काजे दियास!" हुन मन जबाब दिला। हामी असन कसन करूक सकूँ? आमचो लगे तुचाय पांच ठन रोटी आउर दुई ठन नानी मछरी आसे।"

यीशु आपलो चेला मनके बललो, “तुमी ए गोह्डायक लोग मनके लाटा उपरे पचास-पचास कूड़ा ने बसतो काजे सांगा।

तेबे यीशु हुन पाच ठन रोटी आउर दुई मछरी मन के धरून बाती सरग बाटे दखलो, आउर हुन भात काजे महा परबू चो धन्यवाद करलो।

फेर यीशु हुन रोटी आउर मछरी मनके किरिन्दा करून, हुन लोग मनके देतो काजे आपलो चेला मनके हुन गोंदा मन के दिलो। चेला मन हुन भात के बाटते रला आउर हुन तो सरे ची नाई! हुन मन सपाय खाऊन बाती तिरिप्त होला।

हुनचो पाचे, चेलामन हुन भात के कूड़ा करला जोके कोनी खाऊन नी रहोत, आउर हुन बारा टुकना भरते होली! हुन सपाय भात हुन पांच रोटी आउर दुई मछरी ले एउन रये।