31. यीशु पानी उपरे हिडतोर

पांच हजार लोग मनके भात खुवालो पाचे, यीशु आपलो चेला मनके झोड़ी चो दुसर बाटे जातो काजे डोंगा ने चेगतो काजे बललो, “आउर हुन डंडीक बेरा काजे हुताय ठेबलो, आउर चेला मन गेला। फेर यीशु गोह्डायेक लोग मनके बिदा दिलो कि हुन मन आपलो घरे-घरे जाओत। हुनचो पाचे यीशु पराथना करतो काजे गोटोक डोंगरी उपरे गेलो। हुन थाने हुन ऐकला खुबे राती बेरा ले पराथना करलो।

हुनी बेरा, चेला मन आपलो डोंगा के घाटते-घाटते जाते रला, मान्तर लेहरा हुन मन चो बाधा बनते रली, हुनी काजे खुबे राती होली तेबले बले हुन मन झोड़ी मंजीगता अमरुन रला।

उदलीदाय यीशु आपलो पराथना सारललो, आउर आपलो चेला मन लगे फिरलो। हुन डोंगा चो बाट जातो काजे पानी उपरे हिढ़ते गेलो।

तेबे चेला मन हुनके दखला। हुनमन खुबे डरला, कसन बललो ने हुन मन के लागली कि ऐ तो डुमा आय। यीशु जानते रलो की ऐ मन डरूंन गेला सोत, आउर हुनचो काजे हुन मन के चिचियाउन बललो, नी डरा! मय आय।

तेबे पतरस यीशु के बललो, “ऐ परबू तुई आस जाले मोके पानी उपरे हिन्डून तुचो लगे एतो काजे हुकुम देस।" फेर यीशु पतरस के हाग दिलो।"

तेबे पतरस डोंगा ले उतरून बाती पानी उपरे हिण्डुक मुरियालो मान्तर खिंडीक पुरे जाऊन यीशु ले आपलो आइंख फिराउन, पानी धार के आउर लेहरा के दखलो।

तेबे पतरस डरलो, आउर पानी ने बुडूक मुरियालो। आउर हुन किरकिरून बललो, “ऐ परबू, मोके बचाव! "यीशु हुनी बेरा हुनचो हाथ के धरून झिकलो। तेबे हुन पतरस के बललो, तुचो विसवास खिन्डिक असन आसे! तुई आपन के बचातो काजे मोचो उपरे काय काजे नी पतियालिस?"

तेबे यीशु आउर पतरस डोंगा उपरे चेगला आउर तुरते लेहरा थामली। पानी ठेबलो पाचे चेला मन भकियाला, आउर यीशु चो पुरे हुन मन मांडी टेकून हुनचो आराधना करला आउर हुनके बलला कि, “सते तुई महा परबु चो बेटा आस।