32. यीशु डुमा धरलो मनुक मनके आउर बेमार बायले के उजरातोर।

यीशु आउर हुनचो चेला मन आपलो डोंगा ले हुन सहर ने गेला, जोन थाने गिरासेनी लोग मन रते रओत। हुन मन हुन सहर अमरतो के डोंगा ले उतरला।

हुन थाने गोटोक मनुक रलो, जेके डुमा धरून रली।

ऐ मनुक खुबे ताकत बिता रलो, कोनी बले हुनके बांदुक नी सकते रला। घन-घन लोग मन हुनचो हाथ-पांय के सिकरा मन ले बांदते रओत, मान्तर हुनके बले हुन तुटाते रये।

हुन मनुक मोढ्हा भाटा ने रते रये, ऐ मनुक गुलाय रात-दिन किरकिरते रलो, हुन फटही नी पिंदते रये, आउर आपन के पकना संगे मारी होते रये।

हुन मनुक पराउन बाती यीशु लगे ईलो, आउर हुनचो पुरे मांडीकुटा दिलो। तेबे यीशु हुन डुमा संगे गोठियालो आउर बललो, “ऐ मनुक ले बाहरे निकरून जा।

हुन डुमा जोर ले किरकिरून बललो, ‘ए यीशु, सबले बड़े महा परबू चो बेटा, तुके मोचो ले काय काम आसे? किरपा करून मोके नी सताव!" तेबे यीशु हुनके पुछलो, तुचो काय नाव आय? आउर फेर हुन सान्गलो, मोचो नाव सेना आय, काय काजे बलले ने कि आमी खुबे लोग आसू।" (रोमी सेना ने कितरो हजार सिपाही मनचो कूड़ा के सेना बोलते रओत)।

हुन डुमा मन यीशु ले बिनती करला कि, "आमचो उपरे किरपा कर आउर आमके ए जगा ले बाहरे नी पठाव!" हुनी लगे डोंगरी ने बरहां मनचो गोटोक गोहड़ी चरते रली। हुनि काजे हुन डुमा मन यीशु ले बिनती करला कि, "किरपा करून आमके हुन बरहां मन ने पठाउन देस!" यीशु बललो, "आले हुन थाने जा बे!"

हुनी काजे हुन डुमा मन हुन मनुक उपरे ले निकरून हुन बरहां मन ने ओलला। हुन बरहां मन पराऊन गोटोक डोंगरी टोक ने चेगला आउर झोड़ी ने कुदला। आउर बूडून मोरला। हुन कूड़ा ने लगभग 2,000 बरहां मन रला।

हुन थाने हुन बरहां मनके चरातो बिता मन रला। जोन बले हुन थाने होउन रये, जिदलादाय हुनमन दखला, तेबे गाव ने पराते गेला। यीशु जोन बले काइं करूँ रये, हुन थाने हुन मन जाउन सबके सांगला। हुन गाव चो लोग मन निकरून ईला। आउर हुन मन हुन मनुक के दखला जेचो थाने डुमा रली। हुन अस्तिर ले, नंगत फटही पिंदुन आउर गोटोक नंगत मनुक असन होउन बसलो के दकला।

हुन लोग मन खुबे डरला आउर हुन मन यीशु के जातो काजे बलला। आउर हुनि काजे यीशु डोंगा ने चेगलो। हुन मनुक जेचो उपरे डुमा रली हुन यीशु संगे जातो काजे बिनती करलो।

मान्तर यीशु हुनके बललो, "नाइं। मय बलेसे कि तुई घरे जा सपाय लोग मन के सांग कि महा परबू तुचो काजे काय करलासे। हुन मन के सांगसे कि महा परबू कसन तुचो उपरे दया धरम दखालो।

हुनी काजे हुन मनुक गेलो आउर सपाय के एचो बारे ने सांगलो, जोन यीशु हुनचो काजे करून रलो। हुनचो कहनी के सुनतो गोटोक-गोटोक झन भकियाला।

यीशु झोड़ी चो दुसर बाटे फिरलो, हुनचो हुन थाने अमरतो चो पाचे, गोटोक खुबे गोह्ड़ायेक लोग मन इला आउर हुनके चेपाउक मुरियाला। हुन कूड़ा ने गोटोक बायले रली जोन बारा बरख ले लहू बहतो बेमार रली, हुनके उजरातो काजे हुन आपलो सपाय धन के इलाज काजे बैद मनके देऊन रये। मान्तर हुनचो बेमार आउर बाड़ली।

हुन सुनुन रली की यीशु खुबे बेमार मन लोग के उजरालो से आउर हुन बिचारली, मय सत आयं कि यीशु चो फटही के बल छिवले बले मय उजरेंदे!" हुनी काजे हुन यीशु चो पाटकुती ले इली आउर हुनचो फटही के छिवली। जसन हुन यीशु के छिवली, हुनचो लहू बहतोर बंद होली।

तुरते, यीशु जानलो कि हुनचो ले सामर्थ निकरली आउर हुन पाट बाटे उलटून पूछलो, मके कोन छिवलो?" चेला मन सांगला, ए थाने इतरो लोग तुके बोहरंक कूड़ा होलासे, आउर तुके ठेगलसोत। तेबे तुई काय काजे पूछसिस कि मके कोन छिवलोसे?"

हुन बायले यीशु लगे थरथरते आउर खुबे डरते जाउन माडीकुटा बसली तेबे हुन हुनके सांगली कि हुन काय करलिसे, आउर ए बले सांगली कि हुन छुक छुका होली। यीशु हुनके बोलला, "तुचो विसवास तुके उजरालिसे, अस्तिर ले जा।"