33. गोटोक खेतिहार चो कहनी

गोटोक दिने, यीशु झोड़ी लगे रलो हुन लोग मन चो गोटोक बड़े भीड़ के सिखाते रला। हुनके सुनतो काजे इतरो लोग-बाग इला कि यीशु के हुन सपाय संगे गोठयातो काजे ठान नी बाचली। हुनी काजे हुन पानी ने उबलो डोंगा थाने बसलो आउर लोग मनके सिखालो।

यीशु हुनमन के ऐ कहनी सुनालो, "गोटोक खेतीहार बीज बुनतो काजे बाहरे निकरलो, जिदलदाय हुन आपलो हाथ ले बीज बिखराते रलो तेबे खिंडीक बीजा बाट ने पडली। मान्तर चडई मन एउन बाती सपाय बीजा के खाऊन दिला।

दुसर बीजा पतरीली भुई ने घसरली जोन थाने खिंडीक माटी रली। पतरीली भुई ने घसरलो बीजा मन, खुबे झटके अकरली, मान्तर हुनचो चेर भुई चो गड़िया ने जाउक नी सकली। जिदलदाय बेर उदली आउर घाम बाडली तेबे बूटा मन सुखली आउर मोरली।

दुसर बीजा लाटा बूटा मन चो मंजी ने घसरून रली। हुन बीजा मन अकरली, मान्तर काटा कूड़ा ने चेपाय होली। हुनी काजे काटा कूड़ा भुई ने अकरलो बूटा मन ले कांई बले अन्न नी मिरली।

आउर खिंडीक बीज नंगत भुई ने घसरली हुन बिज अकरली आउर जितलो बीज बुनून रये हुन कोनी तीस गुना, साठ गुना आउर कोनी सौ गुना फर धरली। जोन बले महा परबु चो पाटकुती हिन्डुक चाहेसे हुन हुन सब गोट ने ध्यान देओ जोन मय बोलेसे!

ऐ कहनी चेला मनके उलझल ने डालुन दिली। एची काजे यीशु समझालो, "हुन बीज महा परबू चो बचन आये, हुन बाट गोटोक असन मनुक आय जोन महा परबू चो गोठ आय, मान्तर हुनके पतियाऊ नुआय। एदायं सयतान हुनचो लागले बचन के चोरून नेऊ आय, माने कि सयतान हुन बचन के पतियाऊक नीदेय"।

हुन पतरली भुई असन मनुक आय जोन महा परबु चो बचन के सुनु आय आउर हरिक ले मानुआय। मान्तर जिदलदाय कठिन बेरा एउआय नाहले दुसर लोग चो सताव करले, तेबे हुन महा परबू ले दूर होउन जाऊ आय माने कि महा परबू उपरे नी पतियाउ आय।

हुन लाटा बुटा भुई असन मनुक आय जोन महा परबु चो बचन के सुनु आय, मान्तर हुन खुबे गोठ मन काजे चिंता करुक मुरियाऊ आय, आउर हुन खुबे धन कमातो कोसिस करुआय। खिंडीक बेरा पाचे, ए हुन महा परबू के मया नी करुआय। हुनी काजे जोन हुन महा परबू चो बचन ले सीखून रलो, हुन हुनके महा परबू के हरिक करुक नी सकलो। हुन गेऊँ चो ढेटा असन आय जोन कांई अन्न नी देऊ आय। मान्तर नंगत भुई हुन मनुक आये जोन महा परबू चो बचन के सुनु आय , आउर हुनचो उपरे विस्वास करुआय आउर फर पाउआय।

मान्तर जोन नंगत भुई असन मनुक आय जोन महा परबु चो बचन के सुनु आय आउर हुनचो उपरे विसवास करू आय आउर फर पाउआय।