34. यीशु दुसर कहनी ले सिक्षा देउआय

यीशु महा परबु चो राज चो बारे ने खुबे कहनी के सांगलो। हुनचो हिसाब ने हुन सांगलो, "महा परबु चो राज गोटोक सरसुन बीजा असन आय, जोके कोनी आउर आपलो बेड़ा ने बोउन दिलो। तुमी जानास कि सरसुन चो बीजा सपाय ले नानी होऊआय।"

मान्तर जिदलदाय सरसुन बीजा अकरून बढ़े होउ आय, तेबे हुन बनबाड़ी चो सपाय रुक ले आगर सबले बड़े बाढूआय, इतरो बड़े कि चिढ़ी मन हुनचो ड़ेंगाल ने बिसाउआत।

यीशु आउर गोटोक दुसर कहनी सांगलो, "महा परबु चो राज टीरका असन आय, जोके गोटोक बायले पिसान ने मिलाऊन दिली, तेबे हुन टीरका सपाय पिसान ढेला ने मिलली।

सरग राज गोटोक खुबे मोल बिती मोती असन आय जोके कोनी बेड़ा ने लुकाउन दिलासोत। कोनी दुसर के हुन खजाना मिरली आउर हुन हुनके पावतो काजे होयसे। हुनिकाजे हुन खजाना के फेर ले गाडुन दिलो। हुन मनुक हुन बेड़ा के घेनतो काजे जोन थाने हुन खजाना रली, इतरो हरिक होउन रये कि हुन आपलो सपाय के बिकुन दिलो।

सरग राज गोटोक खुबे मोल बिती मोती असन बले आय। जिदलदाय गोटोक मोती चो सवकार के हुन मिरली, तेबे हुन आपलो सपाय के बिकुन दिलो काय काजे बलले कि हुन हुनके घेनुक सको।

हुताने खिंडीक लोग मन रला जोन मन सोचते रओत कि महा परबु हुन मनके ऐ काजे अपनाएदे काय काजे बलले ने ऐ मन धरम बिती बात मन करसोत। ए मन हुन लोग मन के नानी मानते रओत जेचो मन नंगत बूता नी करते रओंत। एचो काजे यीशु हुन मन के ए कहनी सान्गलो: दुई झन मनुक मन रला, आउर दुनो पराथना करतो काजे मंदिर ने गेला।हुन ठान ले गोटोक मनुक पट्टी उसिल करतो बिता आउर गोटोक धरम पुजारी रलो।

हुन धरम गुरु असन परकार ले दुआ करुक मुरियालो, ऐ महा परबु, तुके मय धन्यबाद केरेसे की, मय दुसर मनुक मन चो जसन- चोर, अधरमी मनुक, आउर मोचो संगे आसे हुन पट्टी उसिल करतो बीता असन पापी बले नुआय।

मानलो ने कि,मय हर हपता ने दुई हार उपास पियास करुआयं आउर मोचो जमाय कमाई चो दसवां भाग तुके भेट देय से।

मान्तर पट्टी उसील करतो बिता हुन धरम गुरु ले खुबे दूर ने होलो, हुन उपरे सरग बाटे दखलो बले नाई आउर आपलो छाती पेटून पराथना करलो,' ऐ महा परबु, मय पापी मनुक आय मोचो उपरे जीव दुःखावसे।'

फेर यीशु बललो," मय तुमके सत बलेसे, महा परबु हुन पट्टी उसील करतो बिता चो पराथना के सुनला आउर हुनके धरम बिता बललो। मान्तर हुन धरम गुरु चो पराथना के मन नी करलो। महा परबु जोन कोनी बले आपन के बड़े बोलेदे, हुनके नानी करदे, आउर जोन कोनी बले आपन के नानी करेदे हुनके बड़े करेदे।