35. जीव दुखातो बाबा चो कहनी

गोटोक दिने, यीशु हुन खुबे लोग मनके शिक्षा देते रलो, जोन मन हुनचो सुनतो काजे कूड़ा होउन रला। ऐ लोग मन पट्टी उसील करतो बिता मन आउर अलगे लोग मन बले रओत, जोन लोग मन मुसा चो व्यवस्था चो केबी बले पालन नी करला।

खिंडीक धरम गुरु मन दखला कि यीशु ऐ लोग मन ले गोटोक संगवारी असन गोठियायसे। एची काजे हुनमन आपन मन ले गोठियाउक मुरियाला कि हुन गलत सिक्षा देयेसे। यीशु हुनमन के गोठियातो के सुनलो आउर हुन मन ए कहनी के सांगलो।

गोटोक मनुक रलो हुनके दुई झन बेटा मन रओत। नानी बेटा आपलो बाबा के बललो, ऐ बाबा मके एदाय आपलो बाटां देस!' तेबे बाबा बिता आपलो दुनो बेटा मन मंजी आपलो धन दौलत के बाटून दिलो।

जुगे दिन नी होऊन रये, कि नानी बेटा आपलो जमाय जाक-जमक के ओनडीयाउन, उन परदेस जाते गेलो। आउर पापी जीवना जीवतो ने आपलो धन माल के सारलो।

एचो पाचे, जोन थाने नानी बेटा रलो तेबे हुन राज ने खुबे भूक-अकाल पड़ली, आउर हुन चो लगे घेनुन खातो काजे धन नी रली। एई काजे हुनके जोन बूता मीरली हुन बरहां मनके चरा तोर रये। हुन खुबे दुःख आउर भूखे रलो, हुन बरहा मन चो खातो बीती के खाते रलो।

तेबे हुन नानी बेटा आपली ले बललो, “मय काय करेसे? मोचो बाबा चो सपाय कमीया मन लगे खातो काजे खुबे आसे, फेर बले मय एथा भूखे मोरेसे। मय आपलो बाबा लगे जायंदे आउर आपलो बाबा चो कमेया बनतो काजे हुनके बिनती करेंदे।

असन हुन नानी बेटा फेर आपलो बाबा चो घर जातो काजे बाट धरलो। जिदलदाय हुन खुबे लापी रये, हुन चो बाबा हुनके दखुन जीव दुखालो आउर हुन पराऊन आपलो बेटा लगे गेलो आउर हुनके पोटारी होहुन खुबे चुमलो।

फेर हुन बेटा हुनके बललो, “ऐ बाबा, मय महा परबु चो आउर तुचो बिरुद्द पाप करले से। एदाय मय तुचो बेटा बलतो लाईक चो नुआय।

मान्तर बाबा बिता आपलो गोटोक कमेया के बललो, “तुरते ले जाव आउर गोटोक नंगत फटही मन आन, आउर मोचो बेटा के पिनदहा! फेर हाथ ने मुंदी और पाय मन ने पनही पिन्दाहा। फेर खुबे ठोसर बिती बाछा के आनून मारा आउर आमी खाऊन हरिक मनाउ। कसन बललो ने ऐ मोचो बेटा मोरून रये, आउर फेर जीव होलो! ऐ हाजुन रये, आउर एदाय मिरलो से।

एचो काजे हुन लोग मन हरिक मनाउक मुरियाला। खिंडीक बेरा बितलो पाचे, हुन चो बड़े बेटा बेड़ा बाट ले बूता करुन हुन घरे अमरलो। तेबे हुन गीत आउर नाचा डगातो चो कोलार के सुनलो आउर भाकियालो कि एथा काय होयसे।

जिदलदाय बड़े बेटा जानलो कि हुन मन एचो काजे हरिक मनासोत कसन बलले हुनचो भाई घरे ईलो से। तेबे हुन खुबे रीस होलो आउर हुन घरे ओलतो काजे नाई बललो। हुनचो बाबा बहारे एउन बातिन हुनके हुन मंचो संगे हरिक होतो काजे बललो। मान्तर तेबले बले हुन बेटा हुनके नाई बललो।

हुन बड़े बेटा आपलो बाबा के बललो, ईतलो बरख ले मय तुचो हुकुम के मानले! कबई बले तुचो गोठ के नाई नी बलले, मांतर तूई मके गोटोक छेरी–पिला के बले नी दिलिस, मय मोचो मितमन संगे बसून खाउक लाय सके। मान्तर तुचो ऐ बेटा जोन तुचो धन-माल के पाप करतो काजे सारलो। आउर जेबले हुन बोह्डून ईलोसे तेबले तुई हुनचो काजे हरिक मनाउन, सबले ठोसर बिती बाछा के मारलीस।”

बाबा बिता हुनके बललो, “ऐ मोचो” मान्तर हामके हरिक मना तोर आय, कसन बले तुचो भाई मरून रलो एदाय जीव होलोसे। ऐ हाजुन रलो एदाय मिरलो से।