4. अब्राम संगे महा परबु मिस्तोर

पुर ईलो चो खुबे बरस पाचे, मंजपुर ने खुबे लोग रते रला आउर हुन मन महा परबु चो आउर एचो हुनचो बिरुद्ध पाप करला, मानतर हुन मन गोटकि भासा गोठयाते रला, हुनी काजे हुन मन गोटकि लगे कूड़ा होला आउर हुन मन मंजपुर ने बाड़तो छाड़ुन महा परबु चो आदेस चो जागा गोटोक शहर के बनाला।

हुन मन खुबे घमंडी रला। आउर हुन मनके कसन जीवना जीवतोर आय ऐ गोट ने हुन मन महा परबु चो गोटके मानुक नी चाहते रलाI आउर हुन मन गोटोक असन सिग्या बनातो शुरू करला, जोन सरग ने अमरायदे। महा परबु दकलो की ए मन गोटोक होउन आउर संग मिलुन चुगल करदे तेबे एमन खुबे पाप काम के करुक सकदे।

हुनी काजे महा परबु हुन मन चो भासा के खुबे परकार चो भासा ने बदलाउन दिलो। आउर हुन मन के सब मंजपुर ने फैलाउन दिलो। जोन नगर के हुन मन बनातो काजे शुरू करून रला हुनके "बाबेल" बोलला' जेचो अर्थ आय गड़बड़ी।

सौ बरस चो पाचे, महा परबु अब्राम नाव चो गोटोक मनुक के गोठयालोI महा परबु हुनके बललो, "तुचो देश के आउर तुचो परिवार के छाडून हुन देश ने जाव, जोन मय तुके देयंसे; मय तुके आशीर्वाद देयेंदे आउर मय तुचो ले गोटोक बड़े जाति बनायंदे, आउर मय तुचो नाव के महान बनायंदे; जोन तुके आशीर्वाद देयदे, मय हुनके आशीर्वाद देयंदे, आउर जोन तुके शराप देयदे, मय हुनके शराप देयंदे, तुचो कारन मंजपुर चो सबु लोग आशीर्वाद पावदे।"

अब्राम महा परबु चो गोट के मानलो, "हुन आपलो सब कमिया मनके आउर आपलो सब सम्पत्ति के आउर आपलो बायले सारै के धरलो, आउर हुन कनान देश ने गेलो। जेके महा परबु हुनके दकाउन रये।

जिदलदाय अब्राम हुन देश ने ईलो तेबे महा परबु हुनके बललो, "तुई सब बाटे दक मय तुके ए देश के देयंदे।" आउर तुचो बंश रोजे काजे एता राज करदे, तेबे अब्राम हुन देश ने बसलो।

मलिकिसिद्क नाव चो गोटोक मनुक रये, जोन महा परबु चो अच्छा पुजारी रये। गोटोक दिन अब्राम लड़ाई करलो पाचे एते रये, तेबे हुनके अब्राम मिरलो' मलिकिसिद्क अब्राम के आशीर्वाद दिलो आउर बललो; "शक्तिशाली महा परबु जोन सरग चो भुई चो मालिक आय हुन तुके आशीर्वाद देयदे। फेर अब्राम लड़ाई ने जितलो सब तीज चो दशमांश मालिकिसिद्क के दिलो।

खुबे बरस बितुन गेली, मानतर एबले बले अब्राम आउर सारै के पिला झीला नी रला। महा परबु अब्राम के गोठयालो आउर फेर आउर ले किरीया करलो की हुनके गोटोक बेटा होयदे; जसन आकाश चो तारा मन आसोत असनी हुनचो बंश होयदे। अब्राम महा परबु चो किरीया ने विसवास करलो। महा परबु घोषणा करलो तूई गोटोक धरमी माने आस कसन की महा परबु चो किरीया ने विसवास करू रये।

तेबे महा परबु अब्राम के गोटोक बादा करलो असनी असन रूप ने गोटोक बादा आउर करु आय गोटोक दुसर चो बुता करतो काजे समझोता होउवाय, महा परबु अब्राम के हुन बादा तेबे करलो की जिदलदाय अब्राम सोते रये, मानतर हुन तेबे ले सुनुक सकते रये। महा परबु बललो, "मय तुचो देय ले जन्माउन तुके गोटोक तुचो खुद चो बेटा देयंदे, मय तुचो बंश के ए कनान देश देयंदेI मानतर एबे बले अब्राम के कोनी पिला झिला नी रयेI