5. किरिया चो बेटा

अब्राम आउर सारै चो कनान देश ने अमरुन दस बरस चो पाचे, हुन मनके एबले बले पिला झीला नि रला, हुनी काजे अब्राम चो बायले सारै हुनके बोलली, महा परबु मोके एबले बले बेटा-बेटी नी दिलो, आउर मय बेटा-बेटी पावतो लायक नियाय! मय एबे डोकरी होलेसे दक मोचो संगवारी हाजिरा एलगे आसे हुनचो संगे बले बिया हो' की हुन मोचो काजे गोटोक बेटा के जन्माओ ।

आउर अब्राम हाजिरा संगे बिया होलो, आउर हाजिरा गोटोक बेटा के जन्माली आउर अब्राम हुनचो नाव ईश्माएल संगालो मानतर सारै हाजिरा के कुचर होते रये , उदल दाय ईश्माएल तेरह बरस चो रये , "महा परबु फेर अब्राम के गोठीयालो।

महा परबु बोललो, "मय सब ले बड़े महा परबु आय, मय तुचो संगे बादा करेंसे। तेबे उद्ली दाय अब्राम भुई ने पाटा पोडून जुवार करलो। महा परबु अब्राम के ए बले सांगलो तुई खुबे नाती चो बाप बनसे, मय तुके आउर तुचो पीड़ी के तुचो खुदचो भुई होतो काजे कनान देश के देयेंदे, आउर मय सब दिन काजे तुचो महा परबु रयेंदे, तुके तुचो घर चो सब मनुक पिला मनचो खतना करतो आयI

तुचो बायले सारै गोटोक बेटा के जन्माय दे हुन तुमचो विसवास चो बेटा होयदे, हुनचो नाव इसहाक सन्गावा। मय हुनचो संगे मोचो बादा बनाउन रयंदे, आउर हुन गोटोक बड़े जाति बनेदे, मय ईश्माएल के बले गोटोक बड़े जाति बनायेंदे, मानतर मोचो बादा इसहाक संगे रयदे, तेबे महा परबु अब्राम चो नाव के बदलून अब्राहम संगालो, येचो अरथ खुबे लोग चो 'बुआ', महा परबु सारै चो नाव के बदलून सारा संगालो येचो अरथ आय मुर "आया।"

हुन दिन अब्राहम आपलो घर चो सब मनुक मन चो खतना करलो लगभग गोटोक बरस पाचे जिदलदाय अब्राहम 100 बरस चो आउर सारा 90 बरस चो रये उदलदाय सारा अब्राहम चो बेटा के जन्माली जसन महा परबु हुन मन के सांगू रये, असनी हुन मन हुनचो नाव इसहाक संगाला।

जिदलदाय इसहाक जुवान होलो तेबे महा परबु अब्राहम के ए सांगुन हुनचो विसवास के परकलो कि तुचो एकला बेटा के धर आउर मोचो काजे जात्रा चो रूप ने महा परबु के देस, फेर अब्राहम महा परबु चो गोट के धरलो आउर आपलो बेटा के जात्रा चेगातो काजे तियार करलो।

जिदलदाय अब्राहम आउर इसहाक जात्रा चेगातो ठान लगे जाते रला उदलदाय इसहाक पचारलो, "एबुआ हामचो लगे जात्रा चेगा तो काजे दारू आसे मानतर बोकड़ी कहा आसे; अब्राहम संगालो, "एमोचो बेटा महा परबु आम के जात्रा चेगातो काजे बोकड़ी जुगाड़ करेदे।

जिदलदाय जात्रा चेगातो ठान ने अमरला तेबे अब्राहम इसहाक के बांधून जात्रा चेगातो वेदी ने सोआलो! आउर हुन आपलो बेटा के मारतो काजे होते रये, महा परबु बोललो, "ठेब, लेका के नुकसान नी कर, एबे मय जानले से की तुई मोचो गोट के मानुआस, मान्तर तुई तुचो ऐकला बेटा के बले मोचो ले बचाउन नी संगालिस।"

हुनी लगे अब्राहम गोटोक बोकड़ी के दकलो हुनचो सिंग रुक चो खेंदा ने फसु रये, इसहाक चो पलटा जात्रा चेगा तो काजे महा परबु बोकड़ी के जुगाड़ करलो, अब्राहम हरिक-हरिक बोकड़ी के जात्रा चेगा लो।

तेबे महा परबु अब्राहम के सांगलो मानतर तुई मोचो काजे सब तीज के देतो काजे तियार आसीस एता ले की तुचो ऐकला बेटा के बले, हुनी काजे मय तुके आशीर्वाद देयेंदे, तुचो पीड़ी आकाश चो तारा मन ले बले खुबे होदे मानतर तुई मोचो आज्ञा मानलिस हुनी काजे मय तुचो परिवार बाटले मंजपुर चो सबुके आशीर्वाद देयेंदे।