50. यीशु बोहडूआय

लगभग 2000 बरख ले, जगत ने जमाय जगा ने आगर ले आगर लोग मन मसीह यीशु चो बारे ने शुभ संदेसा सुनते रओत। कलीसिया बाड़ते रली। यीशु वायेदा करलो कि हुन जगत चो आखिरी ने बोह्ड़ेदे। हुन एबे नी इलोसे, तेबे बले हुन आपलो वायेदा के सत करदे।

जिदलदाय आमी यीशु चो बोहड़तो बाट दखुसे, महा परबू आमचो ले ए रीती ले जीवतो चो इच्छा करेसे जोन पबितर आय आउर जोन हुन चो आदर करुआय। हुन ए बले चाहेसे कि आमी दुसर लोग मन के बले हुनचो राज चो बारे ने सांगू। जिदलदाय यीशु धरती ने रेते रये, तेबे हुन बलून रये कि, "मोचो चेला मन जगत भर ने मोचो शुभ संदेसा चो बारे ने गुलाय परचार करदे, आउर तेबे अंत एयदे।

खुबे जाती चो लोगमन एबेले यीशु चो बारे ने नी सुनलासे। सरग ने बोहड़तो चो आगे, यीशु मसीह आपलो अनुगामी मनके हुनलोग मनके सुसमाचार सुनाऊक लाय बललो जोन मनके केबी नी सुन लासे। हुन बललो, "जाहा आउर सब जाति चो लोग मनके मोचो चेला बनावा!" आउर "काट तो काजे बेडा ने धान पाकली से।

यीशु ए बले सांगलो, "की कोनी मनुक चो सेवक आपलो मालिक ले बड़े नी होए। ए जगत जो बड़े लोगमन मोचो ले नफरत करला, आउर मोचो काजे हुनमन तुमके बले सताव करदे आउर मोरते मारदे। ए जगत ने तुमी मन पीड़ित हुआसे, मान्तर मजबूत बना, काय काजे कि मय सयतान के हाराउन दिलेसे जोन ए जगत ने शासन करते रये। आउर तुमी अंत बेरा ले मोचो बिसवासी बनून रलास आले, महा परबू तुमके बचायेदे।

यीशु आपलो चेला मनके ए समझातो काजे गोटोक कहनी सुनालो की जिदलदाय जगत चो अंत होयदे तेबे लोगमन संगे काय होयदे। हुन सांगलो, "कोनी मनुक आपलो बेड़ा ने नंगत बीजा के बुनून रयेदे। तेबे जिदलदाय हुन सोवते रलो तेबे हुनचो दुसमन एउन हुनचो गंहू चो बीजा ने जंगली बूटा के रोपुन दिलो, आउर फेर हुन गेलो।"

जिदलदाय हुन बीजा अकरली तेबे हुन कमिया मन मनुक के सांगला, 'ऐ मालिक, तुई तुचो बेड़ा ने नंगत बीजा के रोपून रहिस। तेबे फेर एताने जंगली बूटा मन कसन होला?' हुन मनुक सांगलो, 'कोनी मोचो शत्रु ची आय जोन असन करलो से।

हुन कमिया मन हुन मालिक के सांगला, 'काय आमी ए जंगली बूटा मनके उखनुनदे?' हुन मालिक बललो, नाइ। तुमी असन करासे तो गहू बूटा मन के बले उखनासे। कटनी बेरा ले टाका। तेबे ले जंगली बूटा मनके कूड़ा करा फेर जराउन दियास। मान्तर गंहू के मोचो लगे आना।

चेला मन ए कहनी चो मायने नी बुझला, एची काजे हुनमन यीशु के हुनके समझातो काजे बलला। यीशु सांगलो, "नंगत बीजा के बूनतो बिता मसीह के दखायेसे। बेढ़ा जगत के दखायेसे। नंगत बिज महा परबू चो राज चो लोग मन के दखायेसे।"

जंगली बूटा हुन दुष्ट सयतान चो लोग के दखायेसे। हुन मनुक चो सत्रु सयतान के दखायेसे, जोन जंगली बूटा के बुनून रये, आउर कतई करतो बिता मन सरगदूत के दखासोत।

जिदलदाय ऐ जगत चो अंत होयेदे तेबे सरगदूत हुन जमाय लोग के गोटोक संगे जुआ करेदे जोन सयतान चो लोग मन आत। हुन सरगदूत हुन लोगमन के खुबे गरम आइग ने पकाउन देयदे। हुन थाने हुन लोगमन भानकर सताव ने गागदे आउर दांत पिसदे। मान्तर जोन लोगमन धर्मी आत जोन मन यीशु चो पाट - पाट जादे , हुनमन आपलो महा परबू चो राज ने सूरज जसन चमकदे ।

यीशु ए बले सांगलो की हुन जगत चो अंत होतो चो आगे धरती ने एयदे। हुन असन तरीका ले एयदे जसन हुन जाऊं रये। माने कि, हुनचो लगे सत चो देंह होयेदे, हुन आकास ने बादरी ने बासून एयदे। जिदलदाय यीशु बोह्ड़ेदे, तेबे यीशु चो अनुगामी मन जोन मन मरून रदे मोरलो थान ले जीव उठदे आउर हुनचो ले बादरी ने भेट होदे।

तेबे जोन अनुगामी मन एबे बले जीव आसोत हुन मन के बादरी ले उठाउन नेयदे आउर हुनमन दुसर अनुगामी मन संगे मिसदे जोन मन मोरलो थान ले जीव उठून रदे। हुन मन जमाय हुन थाने यीशु संगे होदे। जिदलदाय हुन मन गोटोक संगे रदे तेबे अमदिया काजे सांति होयेदे।

यीशु हुन जमाय लोग मनके गोटोक मुकुट देतो चो वायेदा करलोसे जोन हुनचो उपरे बिसवास करुआय। हुनमन सदा काजे महा परबू संगे हर गोटोक तीज ने शासन करदे। हुनमन लगे सत चो अस्तीर होयेदे।

मान्तर महा परबु हुन सपाय चो नियाय करेदे जोन यीशु के बिसवास नी करला। हुनमन के नरक ने पकायदे हुता हुन थाने हुनमन गागदे आउर आपलो दांत चाबदे, आउर अमदिया काजे पीड़ा भोगदे। केबई नी लिबतो आइग ने डसते रदे, आउर किडा मन हुन मनके खातो ले नी ठेबदे।

जिदलदाय यीशु बोह्ड़ेदे तेबे हुन सपाय रीती ले सयतान के आउर हुनचो राज के नस्ट करून देयदे। हुन सयतान के नरक ने पकायेदे। हुन थाने सयतान अमदिया काजे जरते रयेदे , हुन जमाय लोग जोन मन महा परबू चो गोठ के धरतो पलटा सयतान चो पाट - पाट हिंडतो चुनाव कारला।

काय काजे कि आदम आउर हव्वा महा परबू चो आज्ञा चो पालन नी करला आउर पाप के ए धरती ने आनला, महा परबू जगत के सराप दिला आउर हुनके नष्ट करतो काजे निर्नय धरलो। मान्तर कोनी दिने महा परबू गोटोक नुआ धरती चो रचना करेदे आउर जोन नंगत होयेदे।

यीशु आउर हुनचो लोग नुवा धरती ने रदे, आउर हुनमन सदा काजे जमाय तीज ने शासन करदे। हुन लोगमन चो आइन्ख ले सपाय गोटोक आंसू के पोछेदे। एदाय कोनी बले दुखी नी होदे। यीशु आपलो राज ने नियाय ले, आउर अस्तीर ले शासन करेदे। हुनमन अमदिया काजे आपलो लोगमन संगे रयेदे।