49. महा परबु चो नुआ वाचा

गोटोक सरगदुत गोटोक जुआन लेकी मरियम के सांगलो कि हून परमेश्वर चो बेटा के जनम देऊआय। हून लेकी एबे कुंवारी रली, मान्तर पबित्र आत्मा हुनचो उपरे इला आउर हून लेकी पेटेहारीन होली। हुन गोटोक बेटा के जनम दिली हुनचो नाव यीशु सगाली। हुनी काजे, यीशु महा परबू आउर मनुस दूनो आय।

यीशु खुबे चमत्कार करलो जोन दखाउआय कि हुन महा परबु आय। हुन पानी ने हिंडलो आउर आंधी के शांत करलो। हुन खुबे बेमार लोग मनके उजरालो आउर खुबे दुष्ट आत्मा मनके बले निकरालो। हुन मरलो लोग के जीव करलो आउर पांच रोटी आउर दुई मछरी मनके 5000 लोग मनके खुवालो।

यीशु गोटोक महान गुरु बले रये जोन काई बले हुन सिखालो हुन नंगत ले सिखालो। हुन लोग मनके जोन करतो काजे बलुआय हुन लोग मनके करतोर आय काय काजे कि हुन महा परबू चो बेटा आय। हुन सिखालो कि तुके हुनी रीती ले लोग मन के मया करतोर आय जसन तुमी आपन के करुआस।

हुन ए बले सिखालो की तुमके सब चीज ले आगर आउर आपलो संपति ले बले आगर मया महा परबू के करतोराय।

यीशु बललो कि जगत ने काई तीज के पावतो ले बले आगर नंगत आय कि महा परबू चो राज में रतोर। हुनचो राज ने जातो काजे जरुरी आय कि महा परबू तुमके तुमचो पाप ले बचायेदे।

यीशु बललो कि खिंडीक लोगमन हुनके गरहन करदे। महा परबु हुन लोग मनके बचायेदे। मान्तर दुसर लोगमन हुनके गरहन नी करदे। हुन एबले बललो कि खिंडीक लोग नंगत भुई असन आत, काय काजे कि हुनमन यीशु चो बारे ने सुभ संदेसा के सुनदे, आउर महा परबू हुनमन के बचाएदे। मान्तर खिंडीक लोग कठोर भुई असन आत। महा परबू चो बचन बीजा असन बाट ने घसरू आय, मान्तर हुन थाने कई नी जागुआय। ए लोग मन यीशु चो संदेसा के इनकार करुआत हुन लोगमन हुनचो राज के बले इनकार करदे।

यीशु सिखालो की महा परबु पापी मनके खुबे मया करुवाय। हुन हुन मनके क्षमा करुवाय आऊर हुन मनके आपलो संतान बनाउ आय।

यीशु ए बले सांगलो की महा परबु पाप के घिनाउ आय, कसन बलले ने की आदम आउर हव्वा पाप करून रला, हुनी काजे हुनमन चो सपाय बंश मन बले पाप करला। ए जगत ने रतो हर गोटोक झन पाप करुआत आउर महा परबू ले दूर करुवाय। हर गोटोक झन महा परबू चो सत्रु आत।

मान्तर महा परबु ऐ जगत ने रतो लोग मनके सबके असनी रीती ले मया करलो, हुन आपलो एकला बेटा के दिलो काय काजे कि महा परबु हुनलोग मनके डण्ड नि देओ जोन यीशु उपरे बिसवास करसोत। एचो पलटा हुनमन हुनचो संगे अमदिया काजे संगे रदे।

तुमी मन मोरतो लाइक चो आहास, कसन की तुमी पाप करलासात। ए नगत होयेदे कि महा परबू तुमके डण्ड देओ, मान्तर आमचो पलटा यीशु आमचो जगा ने डण्ड धरलो। महा परबू यीशु के कुरूस चो मरनी देऊन डण्ड दिला।

यीशु केबी बले पाप नी करलो ,मान्तर महा परबु हुनके डण्ड दिलो। हुन मोरतो काजे तियार होलो, असनी रीती ले तुमचो पाप के आउर ऐ जगत ने रतो हर गोटोक झन चो पाप के उठातो काजे नंगत बलिदान रये। यीशु महा परबु काजे आपन चो बलिदान दिलो हुनी काजे महा परबू हुन लोग मनचो काई बले पाप, एथाने ले बले भयानक पाप के बले क्षमा करुवाय, जोन यीशु उपरे बिसवास करुआय।

भले बले तुमी खुबे नंगत बुता करुआस, तेबे एचो बाटले महा परबू तुमके नी बचायेदे। हुनचो मित बनतो काजे असन काई बले नी आसे कि तुमी हुन करुर सकासेसे। एचो पलटा, तुमके सत करतोर आय कि यीशु ची महा परबू चो बेटा आय, आउर हुन तुमचो पलटा ने कुरूस ने मोरलो, आउर एबले कि महा परबू हुनके फेर ले जीव करलो, तेबे महा परबू तुमचो पाप ले क्षमा देयदे।

महा परबु हुन हर गोटोक झन के बचाएदे जोन यीशु उपरे बिसवास करुआय आउर हुनके आपलो परबू मानुआय। मान्तर हुन हुनमन के नी बचायेदे जोन हुनके नी मनुआय। तुमी मन धनी नाहाले गरीब आस, मनुक आस नहले बायले आस, डोकरा आस नाहाले जुआन आस, खारतो बिता आस ए सपाय काई मायने नी संगाये। महा परबू तुमके मया करुआय आउर चाये कि तुमी यीशु के बिसवास करा तेबे हुन तुमचो मित बनदे।

यीशु तुमके हाग देयसे की तुमी मन हुनके विसवास करा आउर बपतिस्मा धरा। काय तुमी मन विसवास करसात कि, महा परबु चो गोटोक बेटा यीशु ची मसीह आय? काय तुमी मन विसवास करसात की तुमी गोटोक पापी मन आस आउर ए बले की तुमी महा परबु चो बाटले डण्ड पावतो लाइक आहास? काय तुमी बिसवास करसात की तुम चो पाप के मिटातो काजे यीशु कुरुस ने मरलो।

आले तुमी यीशु उपरे बिसवास करुआस जोन काई बले हुन तुमचो काजे करलो से हुनचो अंगीकार करसात, तो तुमी मन यीशु चो गोटोक अनुगामी आहास! सयतान आपलो अंधियारा चो राज ने एदाय तुमचो उपरे शासन नी करेदे। एदे महा परबु तुमचो उपरे आपलो उजर चो राज ने शासन करदे। हुन तुमके पाप नी करतो काजे सक्षम करलोसे, जोन तुमी मन आगे करते रलास। हुन तुमके गोटोक नुआ आउर नंगत जीवना दिलासे।

आले तुमी यीशु चो अनुगामी आहास आले, तेबे जोन यीशु करलोसे हुनचो काजे महा परबू तुमचो पाप मन के क्षमा करलासे। एदायं, महा परबू तुमके आपलो सत्रु चो पलटा मया चो मित मानुआय।

आले तुमी महा परबु चो मित आहास आउर परबु यीशु चो सेवक आहास आले तुमी हुन गोठ मन चो पालन करतो इच्छा करासे जोन यीशु तुमके सिखाउआय। भले बले तुमी यीशु चो अनुगामी आहास, सयतान एबे बले पाप करतो काजे तुमचो परीक्षा करेदे। मान्तर महा परबु अमदिया हुनी करुवाय जोन हुन सांगूआय की हुन करदे। हुन बलुआत कि तुमी आपलो पाप के मानासे तेबे हुन तुमके क्षमा करदे। हुन तुमके पाप चो बिरुद्ध लडतो चो सकत देयदे।

महा परबु तुम के प्रार्थना करतो काजे आउर हुनचो बचन पडतो काजे सांगेसे। हुन तुमके दुसर बिस्वासी मन संगे मिसुन पराथना करतो काजे बले बलुआय। तुमके दुसर लोग मन के बले सांगतोर आय कि हुन तुमचो काजे काय करलोसे। आउर तुमी ए सब बुता मन करलास आले तेबे हुन तुमी मन चो मया चो मित बनसे।