48. यीशु ची किरिया करलो मसीह आय।

जिदलदाय महा परबु मंजपुर के बनालो तेबे सब बानी नंगत रली। काइं पाप नी रली। आदम आउर हव्वा गोटोक- दुसर के मया करते रओत, आउर हुनमन महा परबू ले मया करते रओत। काइं बले बेमार आउर मोरनी नी रली। महा परबू जगत के असनी मया करते रओत।

सयतान सांप बनुन हव्वा संग गोठियालो, काय काजे बलले ने, कि हुन हुनके धोका देऊक लाय होते रलो। तेबे हव्वा आउर आदम महा परबू चो बिरुद्ध ने पाप करला। हुन मन पाप करून रला हुनी काजे धरती चो सपाय लोग मन मरुआत।

कसन बलले आदम और हव्वा पाप करुन रओ, हुनी काजे काइं आउर बले बुरा होली। हुनमन महा परबू चो सत्रु बनुन गेला। जोचो नतीजा ने, तेबले जमाय गोटोक झन पाप करला। सपाय गोटोक झन जनम केची महा परबू चो सत्रु आय। महा परबू आउर लोग मन चो बीच ने सांति नी रली। मान्तर महा परबू सांति बनाउक चाहते रला।

महा परबु किरिया करला कि हव्वा चो गोटोक बंश सयतान चो मुंडी के कुचलुन देयदे हुन ए बले बलुन रला कि हुन सयतान चो एड़ी के डसेदे। बललेने कि, सयतान मसीह के मारेदे, मान्तर महा परबू फेर ले हुनके जीव करदे। एचो पाचे मसीह सयतान चो सक्ती चो अमदिया काजे अंत करदे। कितरो बरख चो पाचे महा परबू परगट करला कि हुन मसीह यीशु आय।

महा परबु नुह के गोटोक डोंगा बनातो काजे बलला काय काजे कि हुन आपलो घर परिवार के हुन पुर ले बचाउक लाय सको जोन पुर के महा परबू पठातो बिता रला। ए परकार ले महा परबू हुनमन के बचाला, जोन मन हुनचो उपरे बिसवास करते रओत। ए परकार ले सपाय लोगमन मरून जातो लाइक चो रला काय काजे कि हुनमन सपाय पाप मन करून रला। मान्तर महा परबू हुन जमाय लोग के बचातो काजे यीशु के पठाला जोन लोगमन हुनचो उपरे बिसवास करते रओत।

सैकड़ो बरख ले पुजारी मन महा परबू के बलि देते रओत। ए दखायेसे कि लोगमन पाप करून रला आउर ए बले कि हुन लोगमन महा परबू बाटले डण्ड पावतो चो लाइक रला। मान्तर हुन बलिदान हुनमन चो पाप मन ले क्षमा नी करुक सकते रये। यीशु सबले बड़े महापुजारी आय। हुनमन हुन करला जोन कोनी आउर पुजारी नी करुक सकते रओत। हुन गोटोक मात्र बलिदान होतो काजे आपन के काटून दिला, जोन सपाय चो पाप मन के मिटाउक सकते रये। हुन मानला कि महा परबू ए सब पाप मन काजे हुनके डण्ड देओत। एची काजे, यीशु सत महा पुजारी रला।

महा परबु अब्राहम के बलला, “मय तुचो बाटले मंजपुर चो सपाय कुल के आशीर्वाद देयदे।" यीशु हुनी अब्राहम चो बंशज रला। महा परबू अब्राहम चो बाटले सपाय कुल आशीर्वाद दिला, काय काजे बलले ने कि जोन यीशु उपरे बिसवास करुआत महा परबू हुन सपाय के पाप ले बचाउआय। जिदलदाय लोगमन यीशु उपरे बिसवास करुआत, तेबे महा परबू हुनमन के अब्राहम चो बंश मानुआत।

महा परबु अब्राहम के बलला कि हुन आपलो हक चो बेटा, हुनचो काजे बलीदान देऊन देओ। मान्तर फेर महा परबू इसहाक चो पलटा गोटोक मेंडी पिला के बलि चेगतो काजे दिला। आमी मन आमचो पाप मन काजे मोरते मरून जातो लाइक चो रलु! मान्तर महा परबू आमचो जगा ने मोरतो काजे यीशु के बलिदान चो रूप ने दिला। एची काजे आमी यीशु के महा परबू चो मेंढा बलुआंव।

जिदलदाय महा परबू मिस्त्र ने आखिरी बिपत्ति पठाला तेबे हुन हर गोटोक इस्त्रएली परिवार ले बललो कि हुन मन गोटोक मेंढा के बलि देओत। हुन मेंढा ने काइं दोस नी रहो। तेबे आपलो कपाट चो चौखट चो उपरे आउर हुनचो एबाटे- हुन बाटे बले हुनचो लहू के लगातोर रली। जिदलदाय महा परबू हुन लहू के दखलो तेबे महा परबू हुन घरे चो पहिला बेटा के नी मारला। जिदलदाय ए होली तेबे महा परबू एके फसह चो तियार बलला।

यीशु फसह चो तियार असन गोटोक मेंढा असन आय। हुन कबई बले पाप नी करलो, एची काजे हुन थाने काइं बले गलत नी रये। हुन फसह चो तियार बेरा मोरलो जिदलदाय कोनी बले यीशु उपरे बिसवास करुआत, तेबे यीशु चो लहू हुन लोगमन चो पाप मन चो कीमत चुकता करुआय। ए असन आय जसन कि महा परबू हुन मनुक लग ले आगे बढून गेला, काय काजे कि हुन हुनके डण्ड नी देउआत।

महा परबु इसराएली लोग मन संगे गोटोक वाचा बांधला, कसन बलले ने हुनमन असन लोग मन रला जोन मनके महा परबू आपलो होतो काजे चुनुन रला। मान्तर महा परबू गोटोक असन वाचा बाँधलासे जोन सपाय काजे आय। अगर कोनी बले जाति चो कोनी बले ए नुआ वाचा के मानदे, तेबे हुन महा परबू चो लोग ने शामिल होयेदे। हुन असन एचो काजे करुआय काय काजे कि हुन यीशु उपरे बिसवास करुआय।

मूसा गोटोक असन अगम ज्ञानी रलो जोन महा परबू चो बचन के बड़े सामर्थ संग परचार करलो। मान्तर यीशु सबले बड़े अगमज्ञानी रला, हुन महा परबू रला, हुनी काजे जोन बले हुन काइं करून रला आउर बलून रला हुन महा परबू चो बूता आउर बचन रये एची काजे पबितर सास्त्र यीशु के महा परबू चो बचन बलुआय।

महा परबु राजा दाउद ले किरिया पाडून रला कि राजा चो रूप ने हुनचो गोटोक बंशज महा परबू चो लोग मन उपरे सदा काजे शासन करेदे। यीशु महा परबू चो बेटा आउर मसीह आय, एची काजे हुन राजा दाउद चो हुनी बंशज आय जोन सदा काजे राज करुक लाय सके।

दाउद तो इसराएली मन चो राजा रलो, मान्तर यीशु सब जगत चो राजा आय! हुन फेर ले एयदे आउर सदा काजे न्याय आउर सन्ति काजे राज ने शासन करेदे।