47. फिलिप्पी ने पोलुस आउर सिलास

जिदलदाय शाऊल गुलाय रोमी चो सामराज ने यात्रा करलो हुन आपलो रोमी नाव “पोलुस चो बरततोर मुरियालो। गोटोक दिन पौलुस आउर हुनचो मित सिलास फिलिप्पी नगर ने यीशु चो बारे ने सुभ संदेसा सुनातो काजे गेला। हुनमन नगर चो बाहरे नदी चो रेटे गोटोक जगा ने गेला जोन थाने लोगमन पारथना करतो काजे जुआ रला। हुन थाने लुदिया नाव चो गोटोक बायले ले भेट होला जोन सवकारिन रली। हुन महापरबू ले मया करते रये आउर हुनचो आरधना करते रये।

महा परबु लुदिया के यीशु चो बारे ने मीरलो संदेसा ने बिसवास करतो काजे सकत दिला। पोलुस आउर सिलास हुनके आउर हुनचो परिवार के बपतिस्मा दिला। हुन पोलुस आउर सिलास के आपलो घरे ठेबतो काजे नेवता दिला, एची काजे हुनमन हुन थाने ठेबला।

पोलुस आउर सिलास लोग मनले अमदिया हुन जगा ने भेंट होते रओत जोन थाने यहूदी लोगमन पारथना करते रओत। रोजे दिने जिदलदाय हुनमन हुन थाने जाते रओत तेबे गोटोक दासी लेकी जोन दुष्ट आत्मा चो काबू ने रली हुनमन चो पाट - पाट जाते रली। ए दुष्ट आत्मा बाटले हुनलोग मनचो भविष्य सांगते रली, एची काजे हुन भविष्य सांगतो बीती चो रूप ने आपलो मालिक मन काजे खुबे धन कमाते रली।

हुनमन चो जातो बेरा हुन दासी लेकी किरकिरुन बले, "ये मनुक मन परम परधान महा परबू चो सेवक आत। ए मन तुके उद्धार पावतो चो बाट सांगतो!" हुन रोजे असन करते रये जोचो ले पोलुस परेसान होलो।

आखीरी ने, गोटोक दिन जिदलदाय हुन दासी लेकी किरकिरुक मुरियाली, तेबे पोलुस हुनचो बाटे उलटून हुन लेकी चो भीतर चो दुष्टआत्मा ले बललो, "यीशु चो नाव ले एचो भीतरे ले निकर।" उदलीदाय हुन दुष्ट आत्मा हुन लेकी के छाडून गेलो।

हुन दासी लेकी चो मालिक मन खुबे रीस होला। हुनमन जानला कि दुष्ट आत्मा चो बिना हुन लेकी लोग मन चो भविष्य सांगुक लाय नी सके। माने कि लोग मनचो भविष्य सांगतो काजे कि हुनमन संग काय होयेदे बलून एदाय हुन लेकी चो मालिक मन के लोग मन पैसा नी देओत।

एची काजे हुन दासी लेकी चो मालिक पोलुस आउर सिलास के रोमी अधिकारी मन लगे नीला। हुनमन सिलास आउर पोलुस के पेटला, आउर फेर हुन मनके जेलखाना ने डालून दिला।

हुन मन पोलुस आउर सिलास के असन भाग ने संगाउन रओत जोन थाने खुबे सिपाही मन रओत। एथाने बले हुनमन हुन मनचो पाय के रुक चो गोटोक बड़े गोंडा ने जोडुन दिला। मान्तर पोलुस आउर सिलास मंजी राती बेरा, महा परबू चो स्तुति चो गीत गावते रओत।

अकच ले गोटोक भयानक भूई डोल होली! जेलखाना चो सपाय कपाट मन उगडली, आउर जमाय केदि मन चो सिकरा निकरून घसरली।

तेबे दरोगा उठलो। हुन दखलो कि कपाट मन उगडा आसे। हुन बिचार करलो कि जमाय कैदी मन बाचुन पराला। हुन खुबे डारलो कि हुन मन चो परातोके रोमी अधिकारी मन हुनके मोरते मारदे, एची काजे हुन आपन के मारतो काजे तियार होलो! मान्तर पोलुस हुनके दखुन किरकिरलो, आउर बललो "ठेब! आपन के नुक्सान नी कर। आमी जमाय एथाने आसूं।"

हुन दरोगा थरथरते पोलुस आउर सिलास लगे एउन पूछलो, "उद्धार पावतो काजे मय काय करुआयं?" पोलुस बलला, "परबू यीशु उपरे बिसवास कर, तेबे तुई आउर तुचो घराना उद्धार पावदे।" तेबे हुन दरोगा पोलुस आउर सिलास के आपलो घरे निलो आउर हुन मंचो घाव को धोवलो। पोलुस हुनचो घरे जमाय लोगमन के यीशु चो सुभ संदेसा दिलो।

दरोगा आउर हुनचो सपाय घर लोग मन यीशु उपरे बिसवास करला, एची काजे पोलुस आउर सिलास हुन मनके बपतिस्मा दिला। तेबे दरोगा पोलुस आउर सिलास के भात खुवालो, आउर हुनमन गोटोक संगे हरिक होला।

दुसर दिने नगर चो पुजारी मन पोलुस आउर सिलास के जेलखाना ले आजाद करला आउर फिलिप्पी ले जातो काजे बलला। पोलुस आउर सिलास, लुदिया आउर दुसर मित मन संगे भेंट होला आउर हुनचो पाचे नगर ले गेला। यीशु चो बारे ने सुभ संदेसा पसरते गेली आउर कलीसिया बाढ़ते गेली।

पोलुस आउर दुसर बले मसीही पुजारी मन खुबे नगर मन ने गेला। हुनमन लोग मनके यीशु चो बारे ने सुभ संदेसा सूनाला। हुनमन कलीसिया मन चो बिसवासी मनके उकसातो काजे आउर सिक्षा देतो काजे कितरो कागज़ - पत्तर बले लिखला। एथाने ले खिंडीक पत्तर मन बाईबिल चो पुस्तक बनली।