46. पोलुस चो मसीही बिसवासी बनतोर।

शाऊल नाव चो गोठक मानुक रये जोन यीशु उपरे सत नी करलो। जिदलदाय हुन जुआन रलो, तेबे हुन स्तिफनुस के मारतो लोग मन चो फटही चो राका रते रये। पाचे, हुन बिसवासी मनके सताऊंन रलो। हुन यरूशलेम ने घरे-घरे जाउन बातिन मनुक आउर बायले दुनो के धरून जेलखाना ने डालून दिलो। तेबे बड़े पुजारी शाउल के दमिश्क सहर ने जातो काजे अनुमति दिलो। हुन हुन थानों मसीह मन के धरून यरूशलेम ने धरून बोहडतो काजे बललो।

शाऊल ने दमिश्क जातो काजे जात्रा मुरियालो। हुन सहर ने अमरतो चो खिंडीक पुरे हुनचो गुलाय बाटे बादरी ले गोटोक चमकतट बीतीन उजर चमकली आउर हुन भुई ने घसरलो। शाउल कोकी गोठियातो के सुनलो "हे शाउल! हे शाउल! तुई मके काय काजे सता सित?" शाउल पूछलो, "हे परबू, तुमी कोन आहास?" यीशु हुनके जबाब दिला, "मय यीशु आयं तुई मके सतासित!"

जिदलदाय शाऊल उठलो तेबे हुन दखुक नी सकलो। हुनचो मित मन हुनके दमिश्क ने नेउन रला। शाउल तीन दिन ले काई बले खाऊन-पिउन नी रलो।

दमिश्क ने हनन्याह नाव चो गोटोक चेला रलो। महा परबु हुनके बललो, "हुन घर ने जा जोन थाने शाऊल ठेबलोसे। आपलो हाथ के हुनचो उपरे संगाव ताकि हुन फेरले दखुक सको। "मान्तर हनन्याह बललो, "हे परबू, मय सुनलेसे कि ए मनुक बिसवासी मनके कसन सतालोसे।" महा परबू हुनके बललो, "जा! मय हुनके यहूदी मन ने आउर दुसर जाति मन ने मोचो नाव चो घोसना करतो काजे बाचलेसे। हुन मोचो नाव काजे खुबे कस्ट भोगेदे।"

तेबे हनन्याह शाऊल लगे गेलो, आपलो हाथ के हुन चो उपरे संगालो आउर बललो, "यीशु, जोन एताने एतो काजे तुचो बाट ने परगट होउन रये, मके तुचो लगे पठालोसे काय काजे बललेने कि तुई फेर ले दखुक मुरिया, आउर पबितर आत्मा तुके भरून देओ।" फेर तुरते शाउल दखुक सकलो, आउर हनन्याह हुनके बपतिस्मा दिलो। तेबे शाउल भात खादलो आउर खुबे बल बिता होले।

तेबे ले शाऊल दमिश्क ने रतो लोग यहूदी मनके परचार करुक लाय मुरियालो। हुन बललो, "यीशु ची महा परबू चो बेटा आय!" यहूदी मन भकियाला काय काजे बललेने कि शाउल बिसवासी मनके मारतो काजे होते रये, मान्तर एदे हुन यीशु उपरे सत करसे। शाउल यहूदी मन संगे बिबाद करलो हुन दखलो कि यीशु ची मसीह आय।

खुबे दिन पाचे, यहूदी मन शाऊल के मारतोर बिचार करला। हुनमन हुनके मारतर काजे नगर चो फडकि ने लोग मनके पठाला, की हुनचो राका रओत। मान्तर शाउल हुन सपाय गोठ के सुनुन रये, आउर हुनचो मित मन हुनके बाचुन निकरतो ले मदद करला। गोटोक राती बेरा के हुनके हुनचो मित मन टुकना ने बसाउन बातिन नगर चो भीती ले खाले उतराउन दिलाव दमिश्क ले बाचुन निकरलो पाचे शाउल यीशु चो बारे ने परचार करतो नी छांडलो।

शाऊल प्रेरित मनके भेट होतो काजे यरूशलेम ने गेलो, मान्तर हुन मन शाउल के डरते रओत। तेबे बरनबास नाव चो गोटोक बिसवासी शाउल के प्रेरित मन लगे निलो। हुन हुन मनके सांगलो कि शाउल कसन साहसी होउन दमिश्क ने परचार करलो। हुनचो पाचे, प्रेरित मन शाउल के अपनाला।

खिंडीक बिसवासी जोन यरूशलेम चो सताव ले पराउन एउरला हुन मन फैले अन्ताकिया नगर ने गेला आउर यीशु चो परचार करते रओत। अन्ताकिया ने जादातर रलो लोगमन यहूदी नी रला, मान्तर जोन मन यहूदी नी रओत हुन मन बिसवासी बनला। बरनबास आउर शाउल ए नुआ बिसवासी मन के आउर खुबे सिखातो काजे हुन थाने गेला आउर कलीसिया के मजबूत करला। एचो उपरे सत करतो लोग मन अन्ताकिया ने "मसीही" बली होला।

गोटोक दिन अंताकिया चो मसीह लोगमन उपास संग ने पारथना करते रला। पबितर आत्मा हुनके बललो," मचो काजे बरनाबास आउर शाऊल के हुन बुता के करतो काजे अलगे करून दियास, जोनके करतो काजे मय हुन मनके एथाने हागदिलेसे।" एची काजे अन्ताकिया चो कलिसिया चो लोग बरनबास आउर शाऊल काजे पारथना करुन हुन मनचो उपरे हाथ के संगाला। तेबे हुनमन हुन मनके दुसर खुबे जगा ने यीशु चो बारे ने शुभ संदेसा चो परचार करतो काजे पठाला। बरनबास आउर शाउल दुसर दुसर जाती चो लोग मन के सिक्षा दिला, आउर खुबे लोग मन यीशु ने बिसवास करला।