45. स्तिफनुस आउर फिलिपुस

सपाय ले आगे मसीही पुजारी मन चो मंजिगता ने स्तिफनुस नाव चो गोटोक मनुक रलो, सपाय लोगमन हुनचो मान करते रओत पबितर आत्मा हुनके खुबे सकत आउर बुद्धि देऊन रला। स्तिफनुस खुबे चमत्कार करून रये। जिदलदाय हुन यीशु उपरे बिसवास करतो चो सिक्षा दिलो, तेबे खुबे लोग हुनचो उपरे बिसवास करला।

गोटोक दिने स्तिफनुस यीशु चो बारे ने सिक्षा देते रलो, आउर खिंडिक असन यहुदी मन इला जोन मन यीशु चो उपरे विसवास नी करून रला। आउर हुनचो संगे बहस करुक मुरियाला। हुनमन खुबे रीस होला, एचो काजे हुन मन पुजारी मन लगे गेला। आउर हुन मन बलला, आमी स्तिफनुस के मुसा आउर महा परबू चो बारे ने गलत गोठ मन बलुक मुरियालो!" एची काजे धरम चो पुजारी मन स्तिफनुस के गिरफ्तार करला। आउर हुनके बड़े पुजारी आउर पुजारी मन पुरे आनला। आउर बले ठगरा गवा मन इला आउर स्तिफनुस चो बारे ने ठगला।

बड़े पुजारी स्तिफनुस के पूछलो, "काय ऐ लोग मन तुचो बारे ने सते बलसोत?" स्तिफनुस बड़े पुजारी के जबाब देतो काजे खुबे असन गोट मन के बलुक मुरियालो। हुन बललो, अब्राहाम चो बेरा ले धरून यीशु चो बेरा तकले महा परबु इसराएल चो लोग मन काजे खुबे बड़े-बड़े बुता मन करून रये। मान्तर लोगमन महा परबु चो हुकुम के नी मानते रओत। स्तिफनुस बबलो, तुमी लोगमन महा परबु चो बिरुद बिकट हटी आउर बलवा करतो बिता मन आहास। तुमन मन अमदिया महा परबू चो पबितर आत्मा के इन्कार करलास आउर हुनचो अगमज्ञानी मनके मोरते मारलास। मान्तर हुनमन जोन काई बले करून रला हुनचो तुलना ने तुमी मन आउर बले बुरा बुता मन करलासात! तुमी मन मसीह के मारलास!"

जिदलदाय हुन धरम पुजारी मन ऐ सुनला, तेबे हुनमन इतरओ रीस होउन गेला की हुनमन आपलो कान मनके ढाकुन दिला आउर जोर ले किरकिरला। आउर हुन मन स्तिफनुस के सहर ले बाहरे नीला आउर हुनके मोरतो मारतो काजे हुनचो उपरे पकना पकाला।

जिदलदाय स्तिफनुस मरते रलो, हुन गुहार दिलो, "ए यीशु मचो आत्मा के गरहन कर!" तेबे हुन आपलो मांडी टेकलो आउर फेर चे गुहार दिलो, "हे परबू, ए पाप हुन मनचो उपरे नी लगाव।" तेबे हुन मारलो।

हुन दिने, यरुश्लेम ने रतो लोगमन के खुबे लोग मनके यीशु चो दास लोग मनके सताव करुर मुरियाला, एची काजे बिसवासी मन दुसर ठान ने पराला। एचो पाचे बले, जोन कोनी थाने बले हुन मन गेला हुन मन यीशु चो परचार कारला।

फिलिप्पुस नाव चो यीशु चो गोटोक बिसवासी रये। जसन दुसर खुबे बिसवासी मन करून रला हुन बले यरूशलेम ले परालो। हुन सामरिया चो बाटे जाते गेलो। हुन थाने हुन यीशु चो बारे ने प्रचार करलो। खुबे लोगमन हुन चो उपरे बिसवास करला आउर उद्धार पावला। गोटोक दिने, फिलिप्पुस लगे महा परबु बाटले गोटोक सरगदूत इला आउर हुनके रान ने जातो काजे आउर गोटोक बाट ने रेंगतो काजे बललो। फिलिप्पुस हुन जागा ने जाते गेला। जिदलदाय फिलिप्पुस हुन बाट ने हिंडते रलो, तेबे हुन गोटोक मनुक के आपलो रथ ने जाते दखलो। हुन मनुक कुश देश चो गोटोक बड़े अधिक्कारी रलो। पबितर आत्मा फिलिप्पुस के बललो की, हुन जाउन बिता ले गोठियाओ।

एचो काजे फिलिप्पुस रथ चो लगे गेलो कि हुन सुनला की हुन कुशी महा परबु चो बचन के पढ़ते रलो। जोन यशायाह अगमज्ञानी लिखून रलो हुन हुनके पढ़ते रलो। हुन बलि करतो काजे मेंढा के निलो असन निला आउर हुन गोटोक मेंढी पिला असन ओगाय होलो, हुन बले गोटोक सब्द नी बललो। हुनमन हुनचो संगे अनुचित रीति ले गलत काम के करला आउर हुनचो मान नी करला। हुनमन हुनचो जीव के धरला।"

फिलिप्पुस हुन कुशी ले पुछलो, 'जोन तुई काई बले पढ़सित हुन काय तुई हुनके समझ सित?" हुन कुशी जबाब दिला, "नाई। जिदलदाय ले कोनी एके मोके नी समझादे मय कसन ने समझेंदे। किरपा करून मचो लगे एउन बस। काय यशायाह ऐ आपलो बारे ने लिखते रये कि कोची आउर चो बारे ने?"

फिलिप्पुस रथ उपरे चेगुन बसलो। तेबे हुन कुशी मनुक के हुन सागलो जोन यशायाह यीशु चो बारे ने लिखून रये। फिलिप्पुस महा परबु चो बचन चो खुबे दुसर भाग ले बले गोठियालो। असन ने फिलिप्पुस हुन मनुक के यीशु चो बारे ने नंगत खबर के सुनालो।

फिलिप्पुस आउर हुन कुशी जाते-जाते पानी लगे अमरला। तेबे हुन कुशी बललो, “दख एथाने पानी आसे! काय मय बपतिस्मा धरुक नी सके?' आउर हुन सारथी ले रथ के ढेबातो काजे हुकुम दिलो।

तेबे हुनमन दुनो पानी ने गेला, आउर फिलिप्पुस हुन कुशी बिता के बपतिस्मा दिलो। जिदलदाय हुनमन पानी ले बाहरे निकरला तेबे उदलीदाय पबितर आत्मा एउन फिलिप्पुस के उठाउन दुसर जगा ने नीला। उन थाने फिलिप्पुस लोग मनके यीशु चो बारे ने सांगतो जारी संगालो।

हुन कुशी आपलो घरे चो बाट ने रेंगलो, कि हुन खुबे हरिक होलो कि एदे हुन यीशु के जाने।