44. पतरस आउर युहन्ना गोटोक भिक मांगू खोडीया के उजराला

गोटोक दिने पतरस आउर युहुना मन्दिर ने गेला, गोटोक खोडीया मनुक भीख मांगतो काजे बाट देवना ने बसून रलो।

पतरस हुन खोडीया मनुक बाटे दखलो आउर बललो, "मोचो लगे तुके देतो काजे पैसा नियाय मान्तर जोन मोचो लगे आसे हुन मय तुके देयदे।" यीशु चो नाव ले उठ आउर हिंड!

तुरते महा परबु हुन खोडीया मनुक के नंगत करून दिला। हुन एबाटे हुनबाटे हिंडलो आउर कुदलो, आउर महा परबु चो स्तुति करूक लाय मुरियालो, फेर मंदिर चो दुआर ने उबलो लोग मन भकियाला।

झपके लोग मन चो गोटोक भीड़ हुन मनुक के दखतो काजे इली जोन नंगत होऊन रलो, "पतरस हुनमन के बललो, "ऐ मनुक उजरलो। मान्तर ए गोठ ने नी भकियावा कि आमी एके आपलो सकत ले उजरालू से, नाहाले आमी महा परबू चो आदर करुआव बलून नाई मान्तर, ए मनुक के उजरातो बिता यीशु आय।"

हुन तुमी मन रलास जोन हुन रोमी राजपाल के यीशु के मारतो काजे बलून रलास। जोन सपाय के जीव देउआय हुन यीशु के तुमी मरालास। मान्तर महा परबु हुनके मोरलो थानले जीव उठाला। तुमी मन नी जानलास कि तुमी मन काय करलास, मान्तर जिदालदाय तुमी हुन बुता के करते रलास तेबे जोन गोठ अगमज्ञानी मन बलून रला हुन गोठ सत होली। मसीह दुःख भोगुन बातिन मरून जायेदे बलून रला। महा परबू एके असन ले होउक दिलो एची काजे पचताप करा आउर महा परबू बाटे फिरा, तेबे हुन तुमचो पाप मन के धोउन छुक-छुका करून देदे।

जिदलदाय मंदिर चो पुजारी मन पतरस आउर यहुन्ना के सुनला, तेबे हुनमन डरला एची काजे हुनमन हुन मनके धरून जेल खाना ने ढाकुन दिला। मान्तर जोन पतरस बलून रलो हुन गोठ ने खुबे लोग बिसवास करला।यीशु चो उपरे बिसवास करतो लोग मन चो गिनती बडून बातिन पांच हजार ले आगर होली।

दुसर दिने, हुन यहूदी पुजारी मन पतरस आउर युहन्ना के बड़े पुजारी आउर दुसर धर्म गुरु मन लगे आनला। हुनमन हुन मनुक के बले आनला जोन खोड़िया रलो। हुनमन पतरस आउर युहन्ना के पुछला," काय हक़ ले तुमी मन हुन खोड़िया के उजरालास?"

पतरस बललो, ऐ मनुक जोन तुमचो पुरे उबलो से हुनके यीशु मसीह चो सामर्थ बाटले चंगा करलासे। तुमी यीशु के कुरूस ने चेगालास, मान्तर महा परबू हुनके फेर ले जीव कराला! तुमी मन हुनके नी पतियालास, मान्तर यीशु चो सकत चो बाट ले उद्धार पावतो चो कोनी बले दुसर बाट नी आसे!"

हुन पुजारी मन भकियाला कि पतरस आउर यहुन्ना खुबे साहसी ले गोठीयाला। हुनमन दखला कि ए मनुक मन साधारण मनुक मन आत जोन मन अनपढ़ रला। मान्तर फेर हुन मनके ए गोठ सुरता पडली कि ए मनुक मन यीशु संगे रला। एची काजे हुनमन हुन मनके" बलला, तुमी मन यीशु चो बारे ने आउर काई संदेसा लोग मनके दिलास आले आमी तुमन मनके खुबे बड़े डण्ड देउन्दे।" असन खुबे गोठ बललो पाचे, हुनमन पतरस आउर युहन्ना के जाउक लाय दिला।