43. कलीसिया चो मुरियातोर

यीशु चो सरग बोहडून जातो पाचे, चेला मन यरुश्लेम ने ठेबला, जसन की यीशु हुन मन के करतो काजे आज्ञा दिलो। हुन थाने चो विसवासी लोग मन रोजे गोटोक संगे पराथना करतो काजे जुआ होते रओत।

हर बरख फसह तियार चो पचास दिन चो पाचे, यहूदी लोग मन पिनतेकुस्त नाव चो गोटोक खुबे जरुरी दिन के मनाते रओत। पिन्तेकुस्त हुन बेरा रये जिदलदाय लोग मन गंहू चो कटई के मनाते रओत। गुलाय बाट ले यहूदी लोग मन ए तियार के मनातो काजे एते रला। ए बरख पिन्तेकुस्त तियार यीशु चो सरग गेलो चो एक हफ्ता पाचे इली।

जोन बेरा ने सपाय विसवासी लोग मन गोटोक संगे जुआ होला, तेबे जोन घरे हुन मन रला, हुन थाने खुबे ले लेहरा भरली। तेबे आइग चो लेपटा असन दखतो बीतीन काई खिंडीक बिसवासी मन मुंडी उपरे इली। हुन मन सपाय पबितर आत्मा ले भरून गेला, आउर हुन मन दुसर भासा ने महा परबू चो स्तुति महिमा करुक मुरियाला। हुन मन ए भासा के नी जानते रओत। ए हुन भासा रली जोन के बलतो काजे पबितर आत्मा हुन मन के सकक्षम करली।

जिदलदाय यरुश्लेम ने रतो लोग मन हुन गरजन के सुनला, तेबे हुन भीड़ चो रूप ने ऐ दखतो काजे गोटोक संगे इला की काय होते रली बलून। हुनमन विसवासी मनके महा परबु चो बाटलो करलो बीती बड़े-बड़े बूता मन चो घोसना करतोके सुनला। हुनमन भकियाउन रला कि हुनमन दुसर दुसर राज चो रओत आउर हुनमन दुसर-दुसर भासा बलते रओत, फेर बले हुन मन महा परबू चो बूटा के आपलो भासा ने सुनते रहोत। चेला मन इस्त्राएल ने रला आउर हुनमन अरामी, इब्रानी , नाहाले यूनानी भासा बलते रओत, मान्तर जमाय लोगमन आपलो-आपलो भासा ने सुनते रला कि महा परबू काय- काय करलोसे।

ए मनले खिंडिक लोग मन ए बलला कि, हुन चेला मन निसा ने आसोत। मान्तर पतरस उबा उठलो आउर हुन मनके बललो, "मचो गोठ सूना! ए मन निसा ने नियात! हुनचो पलटा, जोन तुमी मन दाखसास ए हुनी आय जोन अगमज्ञानी जोएल बलून रये, कि होयदे: महा परबू बलून रये कि, "आखिरी चो दिन ने मय आपलो आत्मा उलदेंदे।"

ऐ इस्त्राएल चो मनुक मन, यीशु गोटोक असन मनुक रला जोन ऐ दखतो काजे कि हुन कोन रला खुबे बिचित्र बुता मन करलोसे। हुन महा परबु चो सकत ले खुबे अद्भुत बुता मनके करलोसे। तुमी जानास, काय काजे बललो ने कि तुमी ए बुता मन के दखलासात, मान्तर तुमी हुनके कुरूस ने चेगालास।

यीशु मरून गेला मान्तर महा परबु हुनके मरलो थानले जीव करलो। ऐ हुन गोठ के सत करून दिलो जोन गोठ के गोटोक अगमज्ञानी लिखून रला, "तुई आपलो पवित्र लोग के मोठ ने सडूक नी देसे।" आमी गवा आव की महा परबु यीशु के फेर ले जीव करून दिला।

महा परबु बाबा एदाय यीशु के आपलो उजा बाटे बसाहाउन हुनके आदर मान दिलोसे। आउर यीशु आमचो काजे पबितर आत्मा के पठालोसे जसन कि हुन किरिया धरून रये कि हुन पठाउआय। पवित्र आत्मा ची हुन बूता मनके होउक देयसे जोनके तुमी दखासात आउर सुनसात।

तुमन मन हुन मनुक यीशु के कुरूस ने चेगान दिलास। मान्तर ए जानुन रहा कि महा परबू यीशु के जमाय चीज ने परबू आउर मसीह दुनो ठेबालोसे।

पतरस चो सुनतो लोग मन हुनचो बाटले बललो गोठ के सुनुन बातिन भीतरे ले हलून गेला। एची काजे हुन मन पतरस आउर चेला मनके पुछला, "ए भाई मन, आमके काय करतोर आय।

पतरस हुनके बललो, "तुमन मन ले गोटोक-गोटोक झन आपलो पाप मन काजे पचताप करा, आउर यीशु मसीह चो नाव ले बपतिस्मा धरा। तेबे हुन तुमके पबित्र आत्मा के बरदान ने देयदे।"

पतरस जोन बललो हुन गोठ ने तिन हजार लोग मन सत करला आउर यीशु चो चेला मन बनला। हुन मन बपतिस्मा धरला आउर यरूशलेम चो कलीसिया चो हिस्सा बनला।

जिदलदाय प्रेरित मन हुन मनके सिक्षा दिला तेबे विसवासी मन सरसरा सुनला हुन मन रोजे भेट होते रओत, आउर संगे भात खाते रला, आउर हुन मन गोटोक दुसर चो काजे पराथना करते रओत। हुनमन मिलुन मिसून महा परबू चो स्तुति करते रओत आउर जोन बले काई हुन मंचो लगे रये हुनके बाटा करते रला। सहर चो जमाय लोग मन हुन मन काजे नंगत बिचार करते रओत। रोजे आगर ले आगर लोग मन बिसवासी बनते गेला।