42. यीशु चो सरग फिरतोर

जोन दिने महा परबु यीशु के मरलो लोग ने जीव करलो, हुन चो दुय झन चेला मन लगे चो गाँव बाटे जाते रओत। जातो दायं हुनमन यीशु संगे जोन होउन रये हुन चो बारे ने गोठयाते रला, हुन मनके आशा रली कि यीशु मसीह रलो, मान्तर तेबे बले हुनके मारला। एदाय हुन बायले मन बलते रओत कि हुन फेर ले जीव उठलोसे। हुनमन नी जानते रलो कि कोन गोठ ने विसवास करतोर आय।

यीशु हुन मन चो लगे एउन हुन मन संगे हिंडूक मुरियालो, मान्तर हुन मन हुनके नी चिताक सकला। यीशु एउन बाती हुनमन के पुछलो कि तुमी कोन गोठ के गोठीयासात। हुनमन बितलो दिने यीशु संगे होलो सपाय घटना होलोके सांगुक मुरियाला। हुन मनके लागते रली कि हुन बिता परदेसी आय जोन नी जाने कि यरूशलेम ने काय होउन रली।

तेबे यीशु हुन मनके समझालो कि महा परबु चो वचन मसीह चो बारे ने काय बलेसे। खुबे आगे अगमज्ञानी मन बलुन रला कि पापी लोग मन मसीह के डण्ड देदे आउर मारून देदे। मान्तर ए बले बलून रला कि तीसर दिने जीव उठदे।

जिदलदाय हुन सहर ने अमरला जोन थाने हुनमन दुई झन ठेबतो काजे मन करते रहोत, उद्लदाय सांझ होउन रली। हुनमन यीशु के आपलो संगे ठेबतो काजे बलला। आउर हुनी काजे यीशु हुनमन संगे हुन घरे गेलो। हुनमन राती चो भात खातो काजे बसला। यीशु गोटोक रोटी के धरून महा परबू चो धन्यबाद करलो, आउर हुनके गोंदा करलो। अकच, हुन मन जानला कि, हुन यीशु आय। मान्तर उदलीदाय, यीशु हाजलो।

हुन दुई झन आपन मन गोठियाला, "हुन यीशु रलो! हुनी काजे जिदलदाय हुन आमके महा परबू चो गोठ के सिखाऊन रये तेबे आमी खुबे हरिक रलु!" तुरते हुन मन निकरून यरुश्लेम ने बोहडला। जिदलदाय हुन मन अमरला तेबे हुन मन चेला मनके सांगला, "यीशु जीव आसे! आमी हुन के दखलुसे!"

जिदलदाय चेला मन गोठीयाते रओत, यीशु तुरते हुन बाकरा ने दखा दिलो। यीशु बललो, "तुमके शान्ति मिरो!" चेला मन सोचला की हुन कोनी डूमा आय, मान्तर यीशु बललो कि, तुमी काय काजे डरेसात? तुमी असन काये काजे नी बिचारसात कि ए सते ने मय आय? मोचो हाथ आउर पायं के दखा, डूमा मन चो लगे असन देहं नी रउ आय जसन मोचो लगे आसे।" ऐ दखातो काजे कि हुन कोनी डूमा नुआय, यीशु खातो काजे काई मागला। हुन मन हुनके मछरी चो गोटोक गोंदा दिला आउर यीशु हुनके खादलो।

यीशु बललो," मोचो बारे ने महा परबु चो गोट जोन बले बलेसे हुन घटेदे। मय तुमके सांगुन रये कि असन तो होयदे।" तेबे यीशु हुनमन के महा परबु चो बचन नंगत ले समझालो। हुन बललो, "खुबे आगे अगमज्ञानी मन लिखूंन रला की, मसीह के दुःख उठाउक पड़ेदे, आउर फेर तीसर दिने मरलो थान ले जीव उठेंदे।"

हुन अगमज्ञानी मन ऐ बले लिखून रओत कि मचो चेला मन महा परबु चो बचन के सांग दे। हुनमन सपाय गोटोक झन के पछताप करतो काजे सांगदे। हुनमन असन करले बले कि महा परबु हुन मनचो पाप मन ले खेमा करेदे। मोचो चेला मन ऐ संदेसा के सागतो काजे यरुश्लेम ले मुरियादे। तेबे हुन सपाय जगा सपाय जाति मन चो लगे जादे। तुमी मन मोचो सपाय गोटोक गोठ आउर बुता चो गवाई आस, जोन मय बलून रये आउर करले, आउर हुन बले जोन मचो संगे होउन रये।

एचो चालीस दिन चो पाचे, यीशु आपलो चेला मन के कितलो हार दखा दिलो। गोटोक हार हुन गोटोक बेरा ने पांच सो ले खुबे लोग मनके दखा दिलो! हुन आपलो चेला मन के खुबे तरीका ले सत करलो कि जीव आसे, आउर यीशु हुन मनके महा परबू चो राज चो बारे ने सिक्षा दिलो।

यीशु अपलो चेला मनके बललो, "महा परबु मके सरग आउर धरती चो हर गोटोक झन उपरे राज करतो काजे हुकुम दिलोसे। एची काजे एदाय मय तुमके बलेसे: जाउन बाटी सपाय जाती चो लोग मन के चेला बनावा। असन करतो काजे, तुमके हुनमन के बाबा, बेटा, आउर पबितर आत्मा चो नाव ले बपतिस्मा देतोर आय। जोन खिडिंक बले मय तुमके आज्ञा दिलेसे हुन सपाय गोठ मनके माना बले आउर लोग मनके सिखातो बले आय। सुरता करा, मय अमदिया तुमचो संगे आसे।

यीशु मरलो थान ले जीव उठतोर चालीस दिन चो पाचे, हुन आपलो चेला मना के ए बललो, "जिदलदाय ले मचो बाबा तुमके सामर्थ बल नी देये, उदलदाय ले यरुश्लेम ने ठेबुन रहा।” हुन तुमचो उपरे पबितर आत्मा पठातो बाटले असन करेदे। तेबे यीशु सरग ने गेलो, आउर गोटोक बादरी हुनके हुन चो नजर ले लुकाली। सरग ने यीशु सपाय जनक ले शासन करतो काजे महा परबु चो उजा हाथ बाटे बसलो।