41. महा परबू मोरलो लोग मन ले यीशु के जीव उठातोर।

सिपाही मन बाटले यीशु के कुरूस ने चेगालो पाचे, यहूदी पुजारी मन पिलातुस ले बलला, "हुन ठगरा, यीशु बलून रये, हुन मोरलो मन थाने ले 3 दिन पाचे जीव उठेदे। कोकई बले ए दखतो काजे कि यीशु चो देह के हुनचो चेला मन चोरून बातिन नेयदे, हुनी काजे कोनी बले राका रदे, नाहाले हुन चेला मन ए बलदे कि यीशु मोरलो लोग ले जीव उठलो।"

पिलातुस बललो, “खिंडीक सिपाही मनके नियाँ आउर जसन तुमके राका करतोर आय उसन करा।" एची काजे हुन मन ओलतो बाट चो पकना ने गोटोक मुहर लगाउन दिला कि कोनी बले यीशु चो देहं के चोरून नी नेओत बलून हुन डेरा ने खिंडीक सिपाही मनके बल बसाला।

यीशु चो मोरलो चो पाचे चो दिन बिसातो चो दिन रली। कोनी बले बिसातो चो दिन ने बूता नी करते रहोत, हुनी काजे यीशु चो कोनी बले मित संगवारी मन हुनचो मोठ ने नी इला। मान्तर बिसातो चो पाचे चो दिन ने, बड़े बियाने-बियाने, खिंडीक बायले मन यीशु चो मोठ ने जातो काजे तियार होला। हुन बायले मन यीशु चो देहं ने आउर बले मसाला लगाउक जाऊन रला।

हुन बायले मन चो आमरतो आगे, मोठ ने गोटोक बड़े भुई डोल होली। सरग ले गोटोक सरगदूत एउन हुन पकना के गुचाउन दिलो, जोन मोठ चो ओलतो बाट ने ढाकुन रला आउर हुन थाने बसून रलो। ऐ सरगदूत उजर असन बरते रलो। हुनमन इतरो डरून गेला कि मोरलो लोग असन भी ने पड़ला।

जिदलदाय हुन बायले मन मोठ लगे अमरला तेबे हुन सरगदूत हुन बायले मन के बललो, “नी डरा! यीशु एता नी आय। हुन मरलो थानले जीव उठलोसे, जसन कि हुन बलुन रलो कि हुन जीव उठेदे! मोठ ने जाहा आउर डगराउन दखा।" हुन बायले मन मोठ चो भीतरे जोन लगे यीशु चो देहं संगालो रली, डगराला हुन थाने यीशु चो देंह नी रली!

तेबे हुन सरगदूत हुन बायले मनके बललो, जाउन हुनचो चेला मनके सांगा, "यीशु मरलो थानले जीव उठलोसे" आउर हुन तुमचो पुरे-पुरे गलील ने जायदे।

हुन बायले मन भकियाला आउर खुबे हरिक होला। हुन चेला मनके ऐ नंगत गोठ के सागतो काजे पराला।

जिदलदाय हुन बायले मन चेला मनके ऐ नंगत गोठ सांगतो काजे आपलो बाटे रेंगते रली, तेबे यीशु हुन मन के दखा दिलो। हुन यीशु चो पायं ने घसरली आउर तेबे यीशु बललो, "नी डरा। जाउन मोचो चेला मनके गलील जातो काजे सांगा। हुनमन हुन थाने मके दखदे।