40. यीशु के कुरूस ने चेगातो

यीशु चो हांसी करलोर पाचे, सिपाही मन हुनके कुरूस ने चेगातो काजे नीला। यीशु के हुनी कुरूस के उठाऊक बलला जोन कुरूस ने हुनके मारतोर रली।

हुन सिपाही मन, यीशु के हुन डेरा ने नीला जोन के "खोपड़ी" बलुआत आउर हुनचो हात आउर पायं के कुरूस ने ठेचला। मान्तर यीशु बललो, "ए बाबा, ए मनके माफ़ी दे काय काजे बलले ने ए मन नी जनोत कि ए मन काय करसोत। हुन मन यीशु चो मुंडी उपरे तख्ता के लटकाला। हुन थाने लिखूंन रली, "यहूदी मन चो राजा" पिलातुस हुन मन के एई लिखतो काजे बलून रये।

तेबे सिपाही मन यीशु चो फटही काजे कागज़-पत्तर डाल ला। जिदलदाय हुन मन असन करला तेबे हुन मन हुन आगे होतो बीती भविष्य के सत करला जोन बलते रये, हुनमन मोचो फटही के आपनी मन ने बाटला, आउर मोचो फटही काजे कागज़-पत्तर डालला।"

हुन थाने दुई ठन खंगार मन बले रला, जोन के सिपाही मन उदलीदाय कुरूस ने चेगाउन रला। हुनमन उन खंगार मन के यीशु चो दुनो बाटे कुरूस ने चेगाउन रला। हुन थानो गोटोक खंगार यीशु चो हांसी करून रलो मान्तर दुसर बीता बललो, कि काय तुके डर नी लागुआय कि महा परबू तुके डण्ड देयदे? हामी खुबे गलत बूता करतो चो दोसी आवं, मान्तर ए मनुक निरदोस आय।" फेर हुन यीशु ले बललो, जिदलदाय" तुई आपलो राज ने एसे तेबे मोके सुरता करसे।" यीशु बललो, "आजी ची तुई मचो संगे सरगलोक ने होसे।

तेबे यहूदी पुजारी आउर भीड़ मन यीशु चो हांसी करुक मुरियाला, हुनमन यीशु के बलला, ‘तुई महा परबू चो बेटा आस आले कुरूस ले खाले आव आउर आपन के बचाव! तेबे आमी तुचो उपरे बिसवास करुंदे।"

तेबे हुन सपाय देश चो बादरी करिया उलटली, बले ही उदलदाय दिन बेरा रली। आउर उदलदाय मूंडे बेरा रली, आउर 3 घंटा ले असनी ची रली।

तेबे यीशु हाग देउन बललो, "पुरली! ए बाबा, मय आपलो जीव तुचो हाथ ने सोपुन देयसे।" तेबे हुन आपलो मुंडी के खाले करून आपलो जीव छांडलो। जिदलदाय हुन मोरलो तेबे उदलदाय गोटोक भुई डूलली। हुन बढ़े आढ़ जोन महा परबू चो हाजिरी ले अलगे करुआय उपरे ले खाले के दुई भाग होली।

आपलो मोरलो बाटले यीशु लोग मन काजे महा परबू लगे एतो बाट के उगाढलो। यीशु के राका देतो बिता गोटोक सिपाही ए सब घटना के होतोके दखलो आउर बललो, "सत्ते ए मनुक निरदोस रलो। ए महा परबू चो बेटा आय।"

तेबे युसूफ आउर निकुदेमुस नाव चो दुई पुजारी मन इला। हुन मन पतियाते रला कि यीशु ची मसीह रलो। हुन मन पिलातुस ले यीशु चो देहं के मांगला। हुन मन हुनचो देहं के गोटोक फटही ने घुमटाला। तेबे हुन मन यीशु के गोटोक पकना खदान ले काटून बनालो मोढ़ा ने नीला आउर हुनचो भीतरे संगाला। तेबे हुन मन यीशु चो मोठ के ढाकतो काजे गोटोक बढ़े पकना के ठेगलुन दिला।