39. यीशु उपरे धरम मंडली बसाला

एदाय ऐ मंजी राती चो बेरा रली। हुन सिपाही मन बड़े पुजारी चो घरे निला, काय काजे बलले ने कि हुन महा पुजारी यीशु ले पुछतो काजे होते रये। पतरस फैले ले हुन मन चो पाट-पाट एते रलो। जिदलदाय सिपाही मन यीशु के घरे नीला, तेबे पतरस बाहरे ठेबुन आइग छेकते रलो।

घर चो भीतरे, यहूदी पुजारी मन यीशु काजे धर्म मंडली बसाला। हुन मन उनचो काजे खुबे ठगी लोग मन के आनून रला, जोन मन ठगी गोठ करतो बिता मन रला। फेर बले हुन मनचो गोठ एक दुसर ले मेल नी खाते रली, आउर एची काजे यहूदी मन ए नी सांगुक लाय सकला, कि हुन काई गोठ चो दोसी रलो। यीशु काई नी बललो।

आखिरी ने बड़े पुजारी यीशु बाटे दखुन बललो, “हाम के सांग कि तुई ची जीवित महा परबू चो बेटा मसीह आस?"

यीशु बललो, हव मय आय, आउर तुमी मके महा परबू चो संगे बसलो के आउर सरग ले एतो के दखासे।" बड़े पुजारी आपलो फटही के चिरून दिला कसन बललो ने जोन यीशु सांगलो हुन दुसर पुजारी मन के किरकिरलो, "आमके ए सांगतो काजे कोनी आउर गवई चो जरूरत नी आय कि ऐ मनुक काय करलोसे! तुमी आपन मन ची हुनके ए बलतो बेरा सुनलासास कि हुन महा परबू चो बेटा आय। हुनचो बारे ने तुमचो काय निरनय आय?"

सपाय यहूदी पुजारी मन महायाजक के सांगला, "हुन मरतो असन लाइक चो आय! "तेबे हुनमन चो आंइक ने पट्टी बांधून दिला, हुनचो उपरे थुकला, हुनके पेटला, आउर हुनचो हांसी करला।

आउर पतरस, जिदलदाय खोर ने बाट दखते रला। तेबे गोटोक कमिया लेकी हुनके दखली। हुन हुनके बलली, "तुई बले तो यीशु संगे रलिस!" पतरस मोय नोवाय बललो। पाचे, कोनी दुसर लेकी एई गोठ बलली, आउर पतरस फेर ले मुकरलोव। आखिरी ने खिंडीक लोग मन बलला, "हामी जानू कि तुई यीशु संगे रलिस काय काजे बलले ने तुमी दुनो झन गलील चो आहास।"

तेबे पतरस ए बललो, “आले मय ए मनुक के जाने आले महा परबू मके सराप देओ!" तुरते ए किरिया खाद्लो पाचे गोटोक कुकड़ा बासली। तेबे यीशु पाटकुती उलटून पतरस के दखलो।

पतरस हुन थाने ले गेलो आउर फुडून-फुडून गागलो। हुनी बेरा यीशु के धरतो बिता यहूदा दखलो कि यीशु के मिरतु दंड दिलासे। यहूदा खुबे हतास होलो आउर जाउन आपन के मोरते मारलो।

एदायं हुन देश चो राज पाल पिलातुस रये। हुन रोम राज काजे बूता करते रलो। यहूदी पुजारी यीशु के हुनचो लगे नीला। हुन मन चाहते रला कि पिलातुस हुनके मिरतु डण्ड देओ आउर मारो। तेबे पिउलातुस यीशु ले पूछलो, "काय तुई यहूदी मन चो राजा आस?"

यीशु हुनके बललो, तुई सते बललीस। मान्तर मचो राज एथाने धरती चो नुआय। आउर होती आले तेबे मोचो कमिया मन मोचो काजे लड़ई लड़ता। मय ए जगत ने महा परबू चो बारे ने सत गोठ सांगतो काजे इलेसे। आउर हर गोटोक मनुक जोन सत ले मया सन्गाउआय हुन मोचो सुनुआय।" पिलातुस बललो, "तो सत काय आय?"

यीशु संगे गोठीयालो पाचे, पिलातुस बाहरे भीड़ लगे जाऊन बललो, "मके काई बले असन कारन नी मिरली, दोसी नी पावले कि मय ए मनुक के मारेंदे। मान्तर यहूदी पुजारी आउर भीड़ मन जोर ले किरकिरुन बलला, "हुनके कुरूस ने चेगा!" पिलातुस बललो, 'हुन दोसी नुआय।" मान्तर हुन मन आउर बले जोर ले किरकिरला तेबे पिलातुस तीसर हार बललो, "हुन दोसी नुआय!"

पिलातुस डरलो कि हुन भीड़ झगड़ा-लड़ई करदे, हुनी काजे हुन आपलो सिपाही मन बाट ले यीशु के कुरूस ने चेगातो काजे मानलो। रोमी सिपाही मन यीशु के कोढ़ा मारला, आउर हुनके राजसी फटही पिन्दाला, आउर हुनके मुंडी ने काटा चो मुकुट के पिन्दाला। तेबे हुन मन जमे हुनचो हांसी करला, "ए दखा यहूदी मन चो राजा!" "