38. यीशु के धरातोर

सपाय बरख, यहूदी लोग मन फसह चो तियार बनाते रओत। ए तियार एचो काजे रते रये, कि कसन कितलो बरख चो आगे महा परबु हुन मनचो पुरखा मन के मिसर राज चो कमिया मनके छंडाउन रलो। यीशु बाटले सपाय संगे परचार करून आउर सिक्षा देतोर मुरियालो चो तिन बरख चो पाचे, यीशु आपलो चेला मनके बललो कि हुन फसह तियार के हुन मन संगे बनाता काजे मन करलो से, आउर ऐ बले सांगलो कि हुनके हुनी थाने मारदे।

यीशु चो चेला मन ने गोटोक यहूदा नाव चो गोटोक मनुक रलो। यहूदा प्रेरित मन चो पयसा थैली के संगातो बिता रलो, मान्तर रोजे हुन हुताले पैसा निकराते रलो। यीशु आउर हुनचो चेला मन यरूशलेम अमरलोर पाचे, यहूदा, यहूदी पुजारी चो लगे गेलो। हुन यीशु के चिन्हून धरतो काजे हुन अधिकारी मनके पैसा दिलो। हुन जानते रलो कि हुन पुजारी मन यीशु के मसीह आय बलून नी पतियाते रओत आउर हुनके मोरते मारतो काजे होसोत।

बड़े पुजारी चो बलतो के यहूदी पुजारी मन यीशु के चिन्हतो काजे यहूदा के 30 चांदी चो सिक्का दिला, ए उसनी होली जसन अगमज्ञानी बलून रये होयदे बलून। हुन यीशु के धरातो काजे गोटोक अवसर डगराते रलो।

यरूशलेम ने यीशु आपलो चेला मन चो संगे फसह चो तियार बनालो। फसह भोज चो पाचे, यीशु रोटी धरून गोंदा करलो आउर हुन बललो, एके धरा आउर खाहाव ए मोचो देंह आय जोनके मय तुमचो काजे देऊआय। एके मोचो सुरता ने करासे। "ए परकार ले यीशु हुन मनके बललो, कि हुन उन मनचो काजे मरेदे, माने कि हुन उन मनचो काजे आपलो देहं देयदे।

फेर यीशु दाखरस चो बटका धरलो आउर बललो, "एके पीया। ए मोचो लहू चो नुआ बाचा आय, महा परबू तुमचो पाप मनके क्षमा करेदे। हुनी काजे मय आपलो लहू के तुमचो उपरे उलदेंदे। तुमी बले हुनी करा जोन एबे मय करेंसे, काय काजे बलले ने जिदलदाय तुमी एके पियासे मके सुरता करासे।"

तेबे यीशु आपलो चेला मनके बललो, "तुमन ले हर गोटोक झन मके धरायेदे।" चेला मन भकियाला, आउर पुछुक मुरयाला कि कोन आय असन करुआय। यीशु बललो, "मके धरातो बिता हुन आय जोनके मय ये रोटी गोंदा देऊआय।" तेबे यीशु ए रोटी के यहूदा के दिलो।

हुन रोटी के धरलो पाचे, यहूदा के सयतान समाली। यहूदा निकरून यीशु के धरतो काजे यहूदी पुजारी मन लगे गेलो। उदलदाय राती होउन रली।

भात खाद्लो पाचे, यीशु आउर हुनचो चेला मन जैतून डोंगरी ने चेगला। यीशु बललो, "तुमी सपाय आजी राती बेरा मके छाड़ून दियासे। ए लिख्लोर आसे, मय धोरई के मरून देयंदे आउर सपाय मेंढा मन बिखरुन जादे।"

पतरस तेबे यीशु के बललो, "बले मय मरून जयेंदे मान्तर तुके इंकार नी करेंदे!" आउर सपाय चेला मन बले एई बलला।

तेबे यीशु आपलो चेला मन संगे गतसमनी नाव चो जगा ने गेलो। यीशु आपलो चेला मनके पराथाना करुक लाय बललो, काय काजे कि सयतान हुन मन चो परीछा नी धरो। तेबे यीशु आपन बले परथाना करुक गेलो।

यीशु तिन हार पराथना करलो कि, "ए मोचो बाबा, होयदे आले तुई मके ए किरपा करून ए दुःख चो बटका के पिवतो काजे मके नी देस। मान्तर पापी लोग मनके क्षमा करतो काजे आउर दुसर बाट नी आसे, जाले तुचो ए इच्छा चो पुरती होओ।" यीशु खुबे बैचैन रलो, आउर हुनचो पसना लहू असन रली। हुनके ताकत देतो काजे महा परबू गोटोक सरगदूत के पठालो।

हर हार पराथना करलोर पाचे यीशु आपलो चेला मन लगे बोहडलो, मान्तर हुन मन सोउन रला। पाचे यीशु तीसर हार ने जाउन हुन मनके बललो, "चेता! मके धरातो बिता एता आसे।"

यहूदी पुजारी मन आउर धरम सियान ,सिपाही आउर गोटोक बड़े भीड़ संगे यहूदा ईला। हुनमन खांडा मन आउर ठेंगा मन धरून रओत, यहूदा यीशु लगे जाउन हुनके बललो," ऐ गुरु, जुआर," आउर हुनके चुमलो। हुन धरतो बिता मनुक के यहूदी पुजारी मन के द्खातो काजे असन करलो। तेबे यीशु बललो," ऐ यहूदा, काय तुई गोटोक चूमा ले मके धरासित।

जिदलदाय हुन सिपाही मन यीशु के धरते रओत, तेबे पतरस आपलो खांडा के निकरालो आउर बड़े पुजारी चो गोटोक कमेया चो कान के काटून दिलो।

यीशु बललो, "खांडा के फैले करून! मय आपलो बाबा ले आपन चो बाचतो काजे सरगदूत मन चो गोटोक सेना ले बिनती करुक लाय सके। मान्तर मके मोचो बाबा चो गोठ के धरतोर आय।" तेबे यीशु हुनचो कान के नंगत उजराउन दिलो। तेबे सपाय चेला मन पराला।