37. यीशु लाजर के मोरलो थान ले जीव पड़ातोर।

लाजर नाव चो गोटोक मनुक रलो। हुनचो दुई बहिन मन रओत, जोन मन चो नाव मरियम आउर मार्था रली। ऐ सब यीशु चो खुबे लगे चो मित रओत। गोटोक दिने, कोनी यीशु के सांगलो कि, लाजर खुबे बीमार ने आसे। जिदलदाय यीशु सुनलो तेबे हुन बललो, "ए बेमार लाजर चो मोरलोने बले नी सरे। एचो पलटा ए लोग मन के महा परबू चो मान करतो काजे प्रेरित करेदे।

यीशु आपलो मीत मनले खुबे मया करते रये, मान्तर हुन हुताय रलो जोन थाने हुन रलो। हुन दुई दिन चो पाचे, हुन आपलो चेला मनके बललो, "इया हामी फेर ले यहूदिया फिरूं।" चेला मन बलला, "मान्तर हे गुरु, एबे तो हुताय चो लोग मन तुके मारतो काजे होते रओत!" यीशु बललो, आमचो संगवारी लाजर सोवलो से आउर मय हुनके उठाऊक जायेंदे।

यीशु चो चेला मन बलला, “हे परबू, हुन लाजर सोयसे आले, तेबे हुन नंगत होयदे।" तेबे यीशु हुन मनके सरसरा सांगलो की लाजर मोरलो से। मय हरिक ने आँसे की मय हुता नी रये, कसन बललो ने तुमी मोचो उपरे पतियाहा से।

जिदलदाय यीशु लाजर चो गावं ने अमरलो तेबे लाजर चो मोरलोर चार दिन होउन रये। तेबे मारथा यीशु के भेट होउक गेली आउर बलली। "ऐ परबु तुई एथान रलोने मोचो भाई नी मोरतो। मान्तर मय विसवास करसे की जोन बले तुई महा परबू के मांगसे हुन तुके देय दे।

यीशु हुनके बललो, “पुनुरुत्थान आउर जीव मय आय। जोन कोनी बले मोचो उपरे बिस्वास करदे आउर हुन मोरून जायेदे तेबले बले हुन जियेदे। जोन बले मोचो उपरे सत करदे हुन केबी नी मोरेदे। तुई ए गोठ उपरे सत करसिस? मार्था हुनके बलली, "हे परबू, मय सत संगायें से कि तुई महा परबू चो बेटा आस।"

तेबे मरियम इली। हुन यीशु के पायं पडून बलली, "हे परबू, तुई एथाने रतिस तो मोचो भाई नी मोरतो।” यीशु हुनके पुछलो, तुमन मन लाजर के कहा संगालासास?" फेर हुन मन सांगला, मोठ ने संगालु से। आव आउर दख, तेबे यीशु गागुक मुरियालो।

हुन मोठ गोटोक सुरंग ने संगाउन रला जोचो बाट के पकना ले ढाकुन रला। जिदलदाय यीशु हुन थाने अमरलो तेबे हुन पकना के गुचातो काजे बललो, "मान्तर मार्था बलली कि एचो मर लोर चार दिन होलीसे। आउर हुन थाने ले खुबे बास मारेसे।"

यीशु बललो, "काय मय तुमके नी बलून रले कि तुमी मोचो उपरे बिसवास करा। तेबे तुमी मन महा परबू चो सकत के दखासे?" हुनी काजे हुन मन पकना के गुचाउन दिला।

तेबे यीशु उपरे सरग बाटे दखुन बाती बललो, "हे बाबा, मोचो सुनतो काजे मय तुचो धन्यबाद करेंसे। मय जाने कि तुई अमदिया मोचो सुनुआस, मान्तर एथाने उबलो जमाय लोग मनचो मदद करतो काजे तुके बलले, काय काजे बलले ने ए मन मके सत करोत कि तुई मके पठालिसित।" तेबे यीशु हाग दिलो, "ए लाजर बाहरे निकरून आव!"

फेर लाजर बाहरे निकरून इलो! आउर हुन एबे बले मोढा भाटा चो फटही पिन्दून रलो। यीशु हुनके बललो, ए फटही ले हुनके निकराउन हुनके आजाद करा।" ए चमत्कार काजे खुबे यहूदी मन यीशु के पतियाला।

मान्तर यहूदी मन चो धरमी पुजारी मन यीशु ले कुचर होते रओंत, हुनी काजे ऐ मन बिचार बनातो काजे गोटकी जगा ने कूड़ा होला कि कसन ने यीशु आउर लाजर के मोरते मारदे।