17. दाऊद के संग परमेश्वर के परतिज्ञा

शाऊल इस्राएल के पहला राजा रिहिसI ओहर लंबा अउर सुंदर रिहिस, जैसन ओ चाहत रिहिन एकदम वेइसेच रिहिसI इस्राएल मा अपन राज्य करे के पहले कुछु बछर ले शाऊल हर एक अच्छा राजा रिहिसI परन्तु पाछू मा ओहर एक बुरा मनसे बन गिस जेहर परमेश्वर के गोइठ ला नी मानिस, इकरेबर परमेश्वर हर एक दूसर मनसे ला चुनिस जो कि एक दीइन ओकर जगह मा राजा होहीI

परमेश्वर हर दाऊद नाम के एक जवान इस्रैली मनसे ला चुन के एक दिन शाऊल के जगह मा राजा होए बर तैयार करेबर शुरु करिसI दाऊद बैतलहम नगर के एक चरवाहा रिहिसI बनेच समय ले, दाऊद हर सिंह अउर भालू दोनों ला मार डाले रिहिस काबर की ओमन ओकर पिता के भेड़मन ला हमला करे रिहिन, जब दाऊद ओकर रखवाली करत रिहिसI दाऊद एक सरल अउर धर्मी मनसे रिहिसI ओ परमेश्वर ला भरोसा करत रिहिस अउर ओकर गोईटमन ला मानत रिहिसI

जब दाऊद आभीच जवान मनसे रिहिस, ओहर लंबा चउढा गोलियत के विरुद्ध लड़ाई करिसI गोलियत एक बनेच बढियाँ सैनिक रिहिसI ओ बनेच मजबूत अउर लगभग तीन मीटर लम्बा रिहिस! परन्तु परमेश्वर हर गोलियत ला मारे बर अउर इस्राएल ला बचाए बर दाऊद के सहायता करिसI इकर बाद, दाऊद हर इस्राएल के शत्रु ले बनेच घा विजय हांसिल करिसI दाऊद एक बड़ा सैनिक बनगिस, अउर ओहर बहुत से युद्ध मा इस्रैली सेना के अगुवाई करिसI मनसेमन ओकर बनेच प्रशंसा करिनI

मनसेमन दाऊद ला इतकी माया करिन की शाऊल ओकर ले जले लगिसI आखिर मा शाऊल ओला मार डाले बर चाहत रिहिस, ओकरे बर दाऊद ओकर ले अउर ओकर सैनिकमन ले छिपे बर जंगल ला भाग गिसI एक दीन, जब शाऊल अउर ओकर सैनिक दाऊद के खोज मा रिहिन तो शाऊल एक गुफा मा गिसI एहर ओही गुफा रिहिस जोन मा दाऊद छिपे रिहिस, परन्तु शाऊल हर ओला नी देखिसI दाऊद शाऊल के पाछु ओकर बनेच तीर ला चल दिस अउर ओकर वस्त्र ले एक टुकड़ा काट लिसI बाद मा, जब शाऊल ओ गोफा ले निकरिस तब दाऊद हर ओला चिल्ला के ओ पकड़े हुए वस्त्र के टुकड़ा ला दिखाईसI इ रीती ले, शाऊल जान गिस की दाऊद हर राजा बनेबर ओला मार डाले बर इंकार कर दिसI

कुछु समय के बाद, शाऊल युद्ध मा मर गिस, अउर दाऊद इस्राएल के राजा बन गिसI ओहर एक बढियाँ राजा रिहिस, अउर मनसेमन ओकर ले प्रीति राखिनI परमेश्वर हर दाऊद ला आशीष करीस अउर ओला सफल बनाईसI दाऊद हर बनेच युद्ध लडिस, अउर परमेश्वर हर इस्राएल के शत्रु मन ला पराजित करे बर ओकर सहायता करिसI दाऊद हर यरूशलेम नगर ला जीत के ओला अपन राजधानी बनाइस, जोन करा ओ रिहिस अउर शासन करिसI दाऊद चालीस बछर तक राजा रिहिसI इ समय के दौर मा, इस्राएल शक्तिशाली अउर धनवान बन गिसI

दाऊद एक मन्दिर बनाये बर चाहत रिहिस जोन ठी इस्रैलीमन परमेश्वर के आराधना कर सकिहीं अउर ओकर बर बलिदान चढ़ान सकिहींI लगभग 400 बछर ले, ओ मनसे मूसा के बनाये रिहिस मिलाप वाले तम्बू मा परमेश्वर के आराधना करत रिहिन अउर ओकर बर बलिदान चढात रिहिनI

परन्तु ओकरा नातान नाम के एक भविष्यवक्ता रिहिसI परमेश्वर हर ओला दाऊद ले ए कहेबर भेजिस: ’’ तेंहर बनेच जादा युद्ध लडे हस, इकर बर तें मोर बर इ मंदिर ला नी बनाबेI तोर बेटा इला बनाहीI तोभी, मै तोला बनेच जादा आशीष करिहोंI तोर एक वंशज सदा बर मोर मनसेमन बर राजा के रूप मा शासन करिहिI’’ सदा बर शासन करोया ओ दाऊद के एक मात्र वंशज मसीह रिहिसI मसीह परमेश्वर ठी ले नियुक्त की गई जन जोनहर की संसार के सब्बोझन के पाप ले बचाहीI

जब दाऊद हर नातान के संदेश ला सुनिस तो ओहर परमेश्वर ला धन्यवाद करिस अउर ओकर स्तुति करिसI परमेश्वर ओकर प्रतिष्ठा ला बढ़ात रिहिस अउर ओला बनेच जादा आशीष देत रिहिसI बेशक, दाऊद नई जानत रिहिस की परमेश्वर इ गोइठ ला कब करिहीI इ समय हमन जानथन की इस्रैलीमन ला एक लम्बे समय ले, लगभग 1,000 बछर तक मसीह के आये के इंतजार करे बर पड़ीहिI

दाऊद हर कई बच्छर ले न्यायपूर्वक अपन मनसेमन के उपर शासन करीसI ओहर बड़ी ईमानदारी से परमेश्वर के गोइठ ला मानिस अउर परमेश्वर हर ओला आशीषित करीसI भले ही, आपन जीवन के आखरी मा ओहर परमेश्वर के विरुद्ध भयानक पाप करीसI

एक दिन दाऊद हर अपन महल ले बाहर झांकिस अउर एक सुंदर स्त्री ला नहात देखिसI ओहर ओला नई जानत रिहिस, लेकिन ओहर पता करलिस की ओकर नाम बतशेबा रिहिसI

अपन दृष्टी ला घुमाए के बजाए, दाऊद हर ओला अपन ठी लाए बर कोई ला भेजिसI ओहर ओकर संग संबंध बनाईस अउर ओला वापस घर भेज दिसI थोड़े समय के बाद बतशेबा हर ए कह के दाऊद करा संदेश भेजिस की ओहर गर्भवती हेI

बतशेबा के पति ऊरिय्याह नाम के एक मनसे रिहिसI ओहर दाऊद के उत्तम सैनिक मा ले एक रिहिसI इ समय ओहर युद्ध करेबर बाहर गे रिहिसI दाऊद हर ऊरिय्याह ला युद्ध ठी ले वापस बुला के ओला आपन पत्नी संग मा रहे बर कहिसI परन्तु जब आने सैनिक युद्ध मा रिहिन इकरे बर ऊरिय्याह हर घर जाये बर मना करदिसI अतः दाऊद हर ऊरिय्याह ला वापिस युद्ध मा भेज दिस सेना पति हर ओ ला युद्ध मा एसन जगह मा राखे बर कहिस जोन करा शत्रु सब ले शक्तिशाली हे ताकी ओ मारा जायI तो एसन होईस कि ऊरिय्याह युद्ध मा मारा गिसI

ऊरिय्याह के युद्ध मा मारे जाये के बाद दाऊद हर बतशेबा ले शादी कर लिसI बाद मा, ओहर दाऊद के बेटा ला जनम दीइसI दाऊद हर जोन करिस ओकर ले परमेश्वर बनेच रिसाए रिहिस, इकरबर ओहर नातान भविष्यवक्ता ला दाऊद ला ए बताये बर भेजिस की ओकर पाप कतूक बुरा रिहिसI दाऊदहर अपन पाप के पश्चताप करिस अउर परमेश्वर हर ओला छमा करदिसI अपन अंतिम जीवन मा, अपन कठिन समय मा घोले दाऊद परमेश्वर के पीछू -पीछू चलीस अउर ओकर गोईटमन ला मानिसI

परन्तु दाऊद के लइका मर गिसI इ रीती मा परमेश्वर हर दाऊद ला दण्डित करिसI इकर अलावा, दाऊद के मरे तक, ओकर अपन परिवार के कुछ मनसेमन ओकर विरुद्ध लड़ाई किन, अउर दाऊद के अपन शक्ति कम हो गे रिहिसI परन्तु परमेश्वर विश्वासयोग्य रिहिस अउर ओहर अभी घोले ओ करिस जोन ओहर दाऊद ले करे के वादा करे रिहिस की ओ करिही, भले ही दाऊद हर ओकर अवज्ञा करे रिहिसI बाद मा, दाऊद अउर बतशेबा के आने संतान पैदा हुईस, अउर ओमन ओकर नाम सुलेमान राखिनI