32. यीशु प्रेत आत्मा ले ग्रस्त मनसे ला अउर एक बीमार महिला ला चंगा करथे

यीशु अउर ओकर चेलामन अपन डोंगा मा चढ़के ओ क्षेत्र मा गिन जोन करा गिरासेनीमन रहत रिहिनI ओमन ओ क्षेत्र मा पहुच के डोंगा ले उतर गिनI

ओकरा एकठन मनसे रिहिस जोन प्रेत आत्मा ले ग्रस्त रिहिसI

ए मनसे येतकी बलशाली रिहिस कि कोन्हो घोले ओला काबू नी करन सकत रिहिसI इकरबर मनसेमन हर ओकर हाँथ अउर गोड़मन ला सिकलामन ले बांधिस, परन्तु ओहर ओला तोड़ देत रिहिसI

ओ मनसे ओ क्षेत्र के समसान मा रहत रिहिसI ए मनसे दिन भर अउर रात भर नरियाय करेI ओहर कपड़ा नी पहनत रिहिस अउर अक्सर स्वयं ला पथरा ले घायल करत रिहिसI

जिसनेच इ ब्यक्ति हर यीशु ला देखिस, त ओ कूद के ओकर ठी गिसI अउर ओकर सामने घुटना टेक दिस तब यीशु हर ओ मनसे के अंदर मा जोन प्रेत आत्मा रिहिस, ओकर ले कहिस, ‘’ए मनसे मा ले बाहर निकल आI”

ओ प्रेत आत्मा ऊँचे आवाज ले नरियाइस, ‘’हे यीशु, परम प्रधान परमेश्वर के बेटा तोर मोर ले का काम ? दया करके मोला झन सता !” तहाँ यीशु हर ओ प्रेत आत्मा ले पुछिस तोर नाम का हे?” ओहर उत्तर दिस ‘’मोर नाम सेना हे, काबर हमन बहुत हन” (रोमी सेना मा कई हजार सैनिकमन एक दल “सेना” होत रिहिनI)

ओ प्रेत आत्मामन हर यीशु ले विनती करिन, ‘’दया करके हमन ला इ क्षेत्र ले बाहर झन भेज!’’ ओहिंच तीर के पहाड़ मा सूरामन के एक झुण्ड चरत रिहिनI इकरेबर ओ प्रेत आत्मामन हर यीशु ले विनती करिन, ‘’दया कर के हमन ला ओ सूरामन मा भेज दे!” यीशु हर कहिस, ‘’ठीक हे, ओमनमा चले जावI’’

अतः ओ प्रेत आत्मामन ओ मनसे मा ले निकर कर ओ सूरामन मा परवेश कर गिनI ओ सूरामन दौड़ के एकठन ठाड़ टीला में ले झील मा कूद गिन अउर डूब मरीनI उ झुण्ड मा लगभग 2,000 सूरा रिहीनI

ओकरा ओ सूरामन के देख भाल करेईया मनसेमन रिहिनI जोन कुछु होए रिहिस जब ओमन हर देखीन त ओ नगर मा भाग गिनI यीशु हर जोन कुछु करे रिहिस ओकरा ओमनहर सब ला बताइनI ओ नगर के मनसेमन निकर आइन अउर ओ मनसे ला देखीन जोन मा प्रेत आत्मामन रिहिनI ओ शांति ले, कपड़ा पहिन के अउर एक सामान्य मनसे के जैसन व्यवहार करत बैठे रिहिसI

ओ मनसेमन बनेच डर गे रिहिन अउर ओमनहर यीशु ले चले जाये बर कहिसI अतः यीशु डोंगा मा चढ़ गिसI ओ मनसे जोनमा प्रेत आत्मामन रिहिस ओहर यीशु के संग जाये के विनती करिसI

परन्तु यीशु हर ओला कहिस, ‘’नीI मैं चाहथों कि तें घर जाके सब ला बताबे कि परमेश्वर हर तोर बर का करिस हेI ओमन ला बता कि कइसन परमेश्वर हर तोर उपर दया करे रिहिसI‘’

इकरबर ओ मनसे चल दिस अउर सब ला इ बारे मा बताइस जो यीशु हर ओकर बर करे रिहिसI ओकर कथा के सुनेया मन चकित होत जात रहिनI

यीशु झील के दूसर ओर लउट आईसI ओकर ओकरा पहुँचे के बाद, एक बड़ी भीड़ ओकर पास जमा होइन अउर ओला दबाये लागिनI ओ भीड़ मा एक महिला रिहिस जो बारह बछर ले लहू बहे के समस्या ले पीड़ित रिहिसI ओ हर अपन सारा धन चिकित्सकमन मा लगा दे रिहिस ताकि ओमन ओला ठीक कर सकें, परन्तु ओकर रोग अउर घोले बिगड़ गे रहिसI

ओहर सुने रिहिस कि यीशु हर कई बीमार मनसेमन ला ठीक करे रिहिस अउर ओहर सोंचिस, ‘’मैं निश्चिन्त हं कि यदि में मात्र यीशु के कपड़ाच ला छू लिहं, त मैं घोले ठीक हो जाहं!’’ इकरेबर ओ यीशु के पाछु ले आइस अउर ओकर कपड़ा ला छू लिसI जिसनेच ओहर ओला छुईस, लहू के बहाव हर बंद होगिसI

तुर्तेच ही, यीशु हर जान लिस कि ओकर ले सामर्थ निकरीस हे इकरेबर ओहर पाछु मुड़ के पुछिस, ‘’मोला कोने छुईस?’’ चेलामन उत्तर दीइन, ‘’एकरा येतकी सारे मनसेमन हर तोर चारों ओर भीड़ लगाईन हे, अउर तोला ढकलत हेंI त तें का बर पुछे की मोला कोने छुईस हे?’’

ओ महिला यीशु के आघू कांपतेच अउर बनेच डरतेच अपन घुटनामन मा बइठ गिसI तहाँ ओहर ओला बता दिस कि ओहर का करत हे, अउर ए घोले कि ओहर ठीक हो गिस हेI यीशु हर ओला कहिस, ‘’तोर विश्वास हर तोला चंगा करिस हेI शांति ले जाI”