31. यीशु पानी मा चलथे

पाँच हजार मनसेमन ला खाना खिलाय के बाद, यीशु हर आपन चेलामन ले डोंगा मा चढ़े बर कहिस। ओहर ओमनला झील के दूसर तरफ जाय बर कहिस जब कि ओहर थोड़े समय बर ओइच करा रुकिस। एकर बाद चेलामन चल दीइन अउर यीशु हर भीड़ ला बिदा करिस कि ओमन आपन घर जायें। इकर बाद, यीशु प्राथना करे बर एकठन परबत के उपर चल दिस ओ ठी ओहर अकेला रिहिस, अउर ओहर बनेच रात तक प्राथना करिस।

ओतकी बेर, चेलामन आपन डोंगा ला खेवत जात रिहिन, लेकिन हवा ओमनके विपरीत दिशा मा बड़ जोर ले बहत रिहिस। बनेच रात हो जाय रिहिस फेन घोले ओमन सिरिफ झील के बीच मा पहूँचे रिहिन।

ओ बेरा मा यीशु हर प्राथना करेबर खतम करिस अउर आपन चेलामन ठी वापस जाय बर शुरु करिस। ओहर डोंगा तरफ जाय बर पानी के ऊपर चलिस।

तहाँ चेलामन हर ओला देखीन। ओमन बनेच डर गिन काबर कि ओमनहर सोचे रिहिन कि ओहर कोनो भूत रिहिस। यीशु जानत रिहिस कि ओमन डर गे रिहिन, एकर बर ओहर ओमनला आवाज देके कहिस, “नी डरव, में ही हां !”

तहाँ पतरस हर यीशु ले कहिस, “हे गुरु, यदि ए तैं हस त मोला पानी के उपर चल के तोर तीर मा आय बर आदेश दे।” यीशु हर परतस ले कहिस, “आ!”

अतः पतरस डोंगा ले उतर गिस अउर यीशु के तीर मा जाय बर पानी के उपर मा चले बर शुरु करिस। परन्‍तु थोड़ कुन दूर जा के, ओहर आपन आंखमन ला यीशु ले हटा दीइस अउर लहरमन ला देखना अउर तेज हवा ला महसुस करेबर शुरु कर दिस

तहां पतरस डरा गिस अउर पानी मा बूड़े लगिस। ओहर नरियाईस, “हे प्रभु, मोला बचा!, यीशु हर तुर्तेच हाथ लमा के ओला पकड़ लिस। तहाँले ओहर पतरस ला कहिस, “तोर विश्वास बनेच कम हे! तोला सुरक्षित राखेबर तैं मोर उपर भरोसा काबर नी करे?”

तहां यीशु अउर पतरस डोंगा मा चेढ़ गिन, अउर तुर्तेच हवा के बहाव रुक गिसI अउर पानी शांत होगिस। चेलामन हर चकित होके यीशु के आगे घुटना टेक दिन ओमन ओकर आराधना करिन अउर ओकर ले कहिन, “सच में तें परमेश्वर के बेटा हस।”