45. स्तिफनुस अउर फिलिप्पुस

पहेला मसीही अगुवामन के माझा मा स्तिफनुस नाम के एकठन मनसे रहिसI सब मनसे ओकर आदर करत रिहिनI पवित्र आत्मा हर ओला बनेच सामर्थ अउर बुद्धि दे रिहिसI स्तिफनुस हर बनेच चमत्कार करे रिहिसI जब ओहर यीशु के उपर भरोसा करे के विषय मा ओमन ला शिक्षा दिस त बनेच मनसेमन हर ओला विश्वास करिनI

एक दिन, स्तिफनुस यीशु के बारे मा शिक्षा देत रिहिस, अउर कुछु एइसन यहूदी आइन जेन मन यीशु के ऊपर विश्वास नी करे रिहिन अउर ओकर संग वाद -विवाद करे बर शुरु कर दीनI ओमन बनेच रिसागिन, इकरबर ओमन धार्मिक अगुवामन ठी गिन अउर ओकर बारे मा झूठ कहिनI ओमनहर कहिन, ‘’हमन हर स्तिफनुस ला मूसा अउर परमेश्वर के विषय मा बुरा गोठियात सुने हन!’’ इकर बर ओमन धार्मिक अगुवामन हर स्तिफनुस ला गिरफ्तार कर लीन अउर ओला बड़े धरमगुरु अउर यहूदीमन के आने अगुवामन के आघू मा लेआइनI अउर घोले झूठा साखी आइन अउर ओमन हर स्तिफनुस के विषय मा झूठ कहिनI

बड़े धरमगुरु हर स्तिफनुस ले पुछिस, ‘’का इ मनसेमन तोर विषय मा सच कहत हे?’’ स्तिफनुस हर बड़े धरमगुरु ला उत्तर दे बर बनेच गोइट मन ला गोठीयाये बर शुरु कर दिस I ओहर कहिस की अब्राहम के समय ले यीशु के समय तक परमेश्वर हर इस्राएल के मनसेमन बर बनेच अचम्भित काम करिस हेI लेकिन मनसेमन हमेशा परमेश्वर के आज्ञा ला नी मानत रिहिनI स्तिफनुस हर कहिस, ‘’तुमन परमेश्वर के विरुद्ध जिद्दी अउर लड़ाई करेईया हI तुमन हमेशा पवित्र आत्मा ला अस्वीकार करेह, जैसन की हमर पूर्वजमन हर हमेशा पवित्र आत्मा ला अस्वीकार करे रिहिन अउर हमेशा ओकर भविष्यवक्तामन ला मार डाले रिहिनI लेकिन जोन ओमन करे रिहिन ओकर बराबरी मा तुमन अउर घोले बुरा करे ह! तुमन मसीह ला मार डाले ह!’’

जब उ धार्मिक अगुवामन हर इला सुनिन, त ओमन एतकी रिसा होगिन कि ओमन आपन कानमन ला बंद कर लीन अउर ऊँची आवाज मा नरियाइनI ओमन स्तिफनुस ला घंसीटत नगर ले बाहर लेगीन अउर ओला मार डाले बर ओला पत्थर मारीनI

जब स्तिफनुस मरत रिहिस, ओहर नरियाए लागिस, ‘’हे यीशु, मोर आत्मा ला ग्रहण कर !’’ तहाँ ओ हर अपन घुटना मा गिर गिस अउर फेन नरिइयाये लागिस, ‘’हे प्रभु, इ पाप ला ओमन के उपर नी लगाबेI’’ तहाँ ओ हर मर गिसI

ओ दिन, यरूशलेम के रहेईया बनेच मनसेमन हर यीशु के मानने वाला मन ला सताए बर शुरु कर दीन, इकरेबर विश्वासी मनसे आने जगह मन ला भाग गिनI लेकिन इकर बाद घोले, जोनकरा घोले ओमनहर गिन ओमन हर यीशु के विषय मा प्रचार करिनI

फिलिप्पुस नाम के यीशु के एकठन विश्वासी रिहिसI जैसन कि आने बनेच विश्वासीमन हर करे रिहिन ओहर घोले यरूशलेम ले भाग गिसI ओहर सामरिया के क्षेत्र मा चल दिसI ओ करा ओहर मनसेमन के माझा मा यीशु के बारे मा परचार करिसI बनेच मनसेमनहर ओकर उपर विश्वास करीन अउर उद्धार पाईनI एक दिन, फिलिप्पुस ठी परमेश्वर अंग ले एकठन सरगदूत आइस अउर ओला जंगल मा जाये बर, अउर एक डहर मा रेंगे बर कहिसI फिलिप्पुस ओठी चल दिसI जब ओहर उ डहर मा रेंगत रिहिस, त ओहर एकठन मनसे ला अपन रथ मा जात देखिसI इ मनसे कुश देश के एकठन महत्वपूर्ण अधिकारी रिहिसI पवित्र आत्मा हर फिलिप्पुस ले कहिस कि ओहर जाके ओ मनसे ले गोठियाएI

इकरबर फिलिप्पुस रथ के तीर मा गिसI ओहर सुनिस कि ओ कुशी परमेश्वर के वचन ला पढ़त रिहिसI जोन ला यशायाह भविष्यवक्ता हर लिखे रिहिस ओहर ओला पढ़त रिहिसI ओहर पढ़त रिहिस, ‘’ओमन ओला बलि करे वाला भेड़ के जैसन लेगीन, अउर जैसन एकठन मेमना शान्त रथेI ओहर घोले एक शब्द नी कहिसI ओमनहर ओकर संग अनुचित व्यवाहर करिन अउर ओकर आदर नी करिनI ओमनहर ओकर प्राण लेलीनI‘

फिलिप्पुस हर ओ कुशी ले पूछीस, ‘’जोन तें पढ़त हस का तें ओला समझत घोले हस?’’ ओ कुशी हर उत्तर दिस, ‘’नीI जब तक कोनो इला मोला नी समझाहीं, तब तक मैं इला नी समझ सकंI कृपा कर के मोर ठी आके बइठI का यशायाह इला अपन विषय मा लिखत रिहिस या कोनो आने के?’’

फिलिप्पुस रथ मा चेढ के बइठ गिसI तहाँ ओ हर ओ कुशी मनसे ला ओला बताइस जोन यशायाह हर यीशु के विषय मा लिखे रिहिसI फिलिप्पुस हर परमेश्वर के वचन के बनेच आने भागमन के घोले चर्चा करिसI इ परकार ले, ओहर ओ मनसे ला यीशु के विषय मा शुभ सन्देश सुनाइसI

फिलिप्पुस अउर उ कुशी यात्रा करत पानी के तीर मा आइनI ओ कुशी हर कहिस, ‘’देख! इ ठी पानी हे! का मैं बतिस्मा ले सकत हं?’’ अउर ओहर सारथि ले रथ ला रोके बर कहिसI

अतः ओमन पानी मा चल दीन, अउर फिलिप्पुस हर ओ कुशी ला बतिस्मा दिसI जब ओमन पानी ले बाहर आइन, त पवित्र आत्मा अचानक ले फिलिप्पुस ला उठा के कोनो आने जगह मा ले गिसI ओठी फिलिप्पुस हर मनसेमन ला यीशु के विषय मा बताना जारी राखिसI

ओ कुशी अपन घर के यात्रा मा आगे बढ़ गिसI ओहर खुश रिहिस कि ओहर अब यीशु ला जानत रिहिसI