47. फिलिप्पी ठी पौलुस अउर सिलास
जब शाऊल हर पूरे रोमी राज मा यात्रा करिस त ओहर अपन रोमी नाम “पौलुस” के उपयोग करे बर शुरु कर दीइस। एक दिन पउलुस अउर ओकर संगवारी सिलास फिलिप्पी नगर मा यीशु के बारे मा शुभ संदेश सुनाए बर गिन। ओमन नगर के बाहर नदी के तीर एकठन जगह ला गिन जोन करा मनसेमन प्राथना करे बर इकट्ठा रिहिन। ओकरा ओमन लुदिया नाम के एक महिला ला मिलिन जोन हर एक व्यपारी रिहिस। ओहा परमेश्वर ले माया करत रिहिस अउर ओकर आराधना करत रिहिस।
परमेश्वर हर लुदिया ला यीशु के बारे मा संदेश ला विश्वास करे बर सक्षम करिस। पउलुस अउर सिलास हर ओला अउर ओकर परिवार ला बतिस्मा दीइन। ओहर पउलुस अउर सिलास ला अपन घर मा रुके बर कहिस, इकरेबर ओमन ओकरा रुक गिन।
पौलुस अउर सिलास मनसेमन ठी हमेशा ओईच जगह मा मिलत रिहिन जोन ठी यहूदी मनसे प्राथना करत रिहिन। हर दिन जब ओमन ओठी जात रिहिन तो एकठन नोकरानी जोन प्रेत आत्मा ले ग्रसित रिहिस ओमनके पाछू-पाछू जात रिहिस। ई प्रेत आत्मा के जरिए ले ओहर मनसेमन के भविष्य ला बताए करत रिहिस, इकरेबर ओहर भविष्य बताए वाली के रूप मा अपन मालिकमन बर बनेच पईसा कमाई करत रिहिस।
ओमन के जाए के बेरा मा ओ नोकरानी नरियाय करत रिहिस, “इ मनसे परम प्रधान परमेश्वर के भक्त हें। इमन तुमनला मुक्ति पाए के रास्ता ला बतात हें! “ओहर रोज इसनेच करे जेकर ले पउलुस परेशान हो गिस।
आखिरी मा, एक दिन जब ओ नोकरानी हर नरियाय बर शुरु करिस, त पौलुस हर ओकर तरफ किंदर के ओकर भीतर के प्रेत आत्मा ले कहिस, “यीशु के नाम ले इकर ले निकल जा।“ ओईच बेरा मा ओ प्रेत आत्मा हर ओला छोड़ दीइस।
ओ नोकरानी के मालिकमन बनेच रिशा होगिन। ओमन ला पता चलगे कि बिना प्रेत आत्मा के ओ नोकरानी मनसेमन ला भविष्य नी बताए सकत रिहिस। इकर मतलब रिहिस कि मनसेमन अब ओ नोकारानी के मालिकमन ला पईसा नी दें कि ओहर ओमन ला भविष्य बताय के ओमन के संग का होही ।
इकरबर उ नोकरानी के मालिकमन पौलुस अउर सिलास ला रोमी अधिकारीमन ठी लेगिन।ओमनपौलुस अउर सिलास ला मारिन,अउर फेनओमनला जेलखाना मा डारदिन।
ओमन हर पौलुस अउर सिलास ला जेल खाना के अइसने हिस्सा मा राखिन जोन करा सब ले जादा सिपाही रिहिन। इहाँ ले कि ओमन ओमनके गोड़ ला लकड़ी के बड़े तुकड़ा मा जोर दीइन। लेकिन पउलुस अउर सिलास आधी रात के बेरा मा, परमेश्वर के स्तुती के गीत गात रिहिन।
अचानक ले, एक भयानक भूकंप होईस! जेलखाना के सब द्वार खूल गिन, अउर सब कैदीमन के बेड़ीमन खुल गिनI
तहां दरोगा हर चेत गिस। ओहर देखिस कि जेल के द्वारमन खुल गे रिहिन। ओहर सोंचिस कि सब कैदीमन बाँच के भाग गे रिहिन। ओहर डरा गिस कि ओमनके भाग जाय के खातिर रोमी अधिकारी ओला मार डालिहीं, इकरबर ओहर अपन आप ला मार डाले बर तियार होगिस! लेकिन पउलुस ओला देख के नरियाइस, “रुक जा! अपने आप ला नुकसान नी पहूंचा। हमन सब ईच ठी हन।“
ओ दरोगा हर काँपत पौलुस अउर सिलास ठी आके पूछिस, “मुक्ति पाए बर मैं का करं?“ पउलुस हर उत्तर दीइस, “प्रभु यीशु के उपर विश्वास कर, त तैं अउर तोर घराना मुक्ति पाहिं।“ ताहां ओ दरोगा पउलुस अउर सिलास ला अपन घर मा लेगिस अउर ओमनके घा मन ला धोईस। पउलुस हर ओकर घर के सब ला यीशु के बारे मा शुभ संदेश सुनाईस।
दरोगा अउर ओकर पुरा परिवारहर यीशु के उपर विश्वास करिन, इकर बर पउलुस अउर सिलास हर ओमनला बतिस्मा दीइन। तहाँ दरोगा हर पउलुस अउर सिलास ला खाना खवाईस, अउर ओमन एक संग खूश होईन।
आने दिन नगर के धरमगुरुमन पौलुस अउर सिलास ला जेल खाना ले आजाद कर दिइन अउर फिलिप्पी ले जाए बर कहिन। पौलुस अउर सिलास लुदिया अउर कुछु आने संगवारीमन ले मिलिन अउर ओकर बाद नगर ले निकल गिन। यीशु के बारे मा शुभ संदेश फैलत गिस। अउर कलीसिया बढ़त गिस।
पउलुस अउर आने मसीही अगुवामन हर बनेच कन नगरमन के यात्रा करिन। ओमनहर मनसेमन ला यीशु के बारे मा शुभ संदेश सुनाईंन। ओमन हर कलीसियामन के विश्वासीमन ला उत्साहित करे अउर शिक्षा देहे बर कई ठन चिठ्ठी घोले लिखिन। इमेंले कुछू चिठ्ठी बाइबिल के पुस्तकमन बन गिन।
लारिया-प्रेरितों के काम 16:11-40 ले बाइबिल के एकठन कथा
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।