6. परमेश्वर इसहाक बर व्यवस्था करथे

जब अब्राहम बनेच बुढा होगे रिहिस तहाँ ओकर बेटा, इसहाक, एक जवान मनसे के उम्र के होगे रिहिसI इकरबर अब्राहम हर आपन एक नौकर ला उ देश मा भेजिस जोन करा ओकर रिश्तेदार रहत रिहिन, ताकि ओहर अपन बेटा इसहाक बर एक पत्नी ला सकेI

एक लम्बा यात्रा के बाद, अब्राहम के नौकर उ देश ला गिस, जोन ठी अब्राहम के रिश्तेदार रहत रिहिनI परमेश्वर हर ओकर अगुवाई करिस, कि ओहर रिबका ले मिलेI ओहर अब्राहम के भाई के नतनीन रिहिसI

रिबका आपन परिवार ला छोड़ के उ नौकर के संग इसहाक के घर वापिस जाए बर मानगिसI जिसनेच रिबका पहुँचिस इसहाक हर ओकर ले शादी कर लिसI

एकठन लम्बा समय के बाद मा, अब्राहम मर गिसI तहाँ परमेश्वर हर अब्राहम के बेटा इसहाक ला अशीष दिस, काबर की परमेश्वर हर अब्राहम के संग मा वाचा बांधे रिहिसI उ वाचा मा परमेश्वर के एकठन परतिज्ञा एहर रहिस की अब्राहम के अशंख्य बंशज होहींI परन्तु इसहाक के पत्नी रिबका के संतान उत्पन नी होईनI

इसहाक हर रिबका के खातिर प्रार्थना करिस, अउर परमेश्वर हर गर्भ मा जुड़वाँ लइका धारण करेबर सक्षम करिसI जोन समय में लइकामन रिबका के गर्भ मा रिहिन ओमन आपस मा झगडा करिन ओकर बर रिबका हर परमेश्वर ला पूछीस की ए का होत रिहिसI

परमेश्वर हर रिबका ला कहिस, “तेहर दू ठन बेटा ला जनम देबेI ओमन के बंशज दो भिन- भिन जाति बनिहिI ओमन आपस मा झगड़ीहींI बढ़ बेटा ले उत्पन होही जाति ला छोटे बेटा ले आही ति जाति के आज्ञा ला माने बर होहीI’’

जब रिबका के लइकामन के जनम होईस, त बड़खा बेटा लाल अउर रुआंदार रिहिस, ओमन ओकर नाम एसाव राखीनI तहाँ नान बेटा एसाव के एडी ला धर के जनमिस अउर ओमन ओकर नाम याकूब राखिनI