19. परमेश्वर क्ये भविष्य जिबताव वालोला
परमेश्वर य हमेशा इस्त्राएलियों ला पाहे भविष्य जिघय वालोला घाल्लोन्यासी। भविष्य जिघय वालोला परमेश्वर क्ये बतकावला कुन्हेन्याहे और फिर आय मंछला बतावन्याहे।
जब अहाब इस्त्राएल देह क्ये राजा ही त्ये आय समय एलिय्याह भविष्य जिघय वालो ही। अहाब डा बुरो मंछ ही। आय झूठी चुयचे सेडाला क्ये पूजो खानी मंछला मजबूर खय्यासी। अय कारणय एलिय्याह य अहाब चिने कि परमेश्वर य आय मंछला क्ये सजा घय खानी गा हांरे। अय आय चिने, “जब तक ना फिर ती ही खानी हां नेरिव तब झानी इस्त्राएल देह क्ये राज्यलाया ती हां हिरी और ना ही पालो पव्वोरी। ” अय बतकाव अहाब क्ये अच्च रिहाव पिय्ये कि आय एलिय्याह क्ये हाते खानी फेसला खय्या।
अय कारणय परमेश्वर य एलिय्याह चिने कि नंग माङया काते अहाब खानी लुप्पी। एलिय्याह माङया आय चुयच्ये धारा क्ये पाहे का जाहा गा खानी परमेश्वर य आय बतावस्या। हर रोज रात्य और ब्यारकोताय, ब्वा एलिय्याह खानी लग्या और स्या जिब्तेंबा। अय पुरो समय या, अहाब और आयके सिपाहिला एलिय्याह क्ये मरा न्याहे, पर व्हाइला आय हां मरा हाक्वाहे।
ती हां हिक्वोय घयनु समय बाद चुयच्ये ती चिफुट्यो वालो कारोव्वे। अय कारणय एलिय्याह पाह क्ये डा देहया ओक्का। आय देहया डा गरीब रानबूड़ी ही जोक्ये डा पयाव ही। आयके पाहे जाको लगभग खत्म हितर्या ही हान्खानी कि व्हाईया डाहाङ खेती हां हिय्ये। फिर लय, आय मठ्याय एलिय्याह क्ये रेखदेखाव खय्या, अय कारणय परमेश्वर य आय और आयक्ये पयाव क्ये जरुर्तावला पुरो खय्या, अय कारणय आयक्ये पीठो क्ये भांडीव और आयक्ये बहाव क्ये कुप्पिव कभय खनी हां हिय्ये। आय पुरो अकाल क्ये समय आयक्ये पाहे जाको ही। एलिय्याह घयनु साल झानी आय्या कुहा।
ह्आड़ी हुङ बरेहे बाद, परमेश्वर य एलिय्याह चिने कि व्हाई फिर ती खयरिव। आय एलिय्याह य वापस इस्त्राएल देह क्ये काते अहाब हाते बतकाव घय खानी चिने। अय कारणय एलिय्याह अहाब क्ये पास का। जब अहाब य आय चिचेपा त्ये आय चिने, “अच्छा नंग ज्युस्या मुसीबत प्यदा जिघय वालो!” अलिय्याह य जवाब जिबे, “मुसीबत प्यदा जिघय वालो ता नंग चिहि! नय यहोवा क्ये चिहाड्वा। व्हाई हाची परमेश्वर ल ही, लेकिन नंग चुयचला क्ये पूजा घय स्यारे। अब नंग इस्त्राएल देह क्ये राज्य के जम्मा मंछला क्ये कातेते कर्मेल पहाड़या पितेत लव ।
अब जम्मा मंछला कर्मेल पहाड़या कासी। व्हाई पयला लय पिय्येसी जो खयनेसी कि व्हाइला बाल सेडाला क्ये जबाबावला हांनेसी। अय बाल सेडाला क्ये भविष्य जिघय वालोला ही। व्हाइला जम्मा पाड़ीय्येसी। एलिय्याह य मंछला चिनेसी, “घय झानी ननी मनेय्ना फेर्योको तिथारे? अगर अहोवा परमेश्वर ही त्ये आयक्ये भक्ति खयनी! अगर बाल सेडा परमेश्वर ही त्ये आयक्ये भक्ति खयनी!”
तब एलिय्याह य चुयच्ये सेडाला क्ये भविष्य जिघय वालोला चिनेसी, “डा डिंगो क्ये बलि खयते आयक्ये स्याव बलिदान ही खानी डा चिपूजो जग्गाया थानी , पर मह्य धा चिलाय्ये। आय्क्ये बाद ना लय इन्दल घयरिव, और डा अलग चिपूजो जग्गाया ना लय आय स्या थारिव। अगर परमेश्वर चिपूजो जग्गाया मह्य पझारोरिव त्ये ननिला देहेरे कि व्हाई हाच्ची क्वो परमेश्वर ही। ”तबय चुयच्ये सेडाला क्ये भविष्य जिघय वालोलाय डा बलि त्यार खय्याहे पर मह्य हां लाव्वाहे।
अब चुच्ये सेडाला क्ये भविष्य जिघयवालोलाय चुयच्ये सेडा क्ये बिनती खय्याहे, “हे चुयच्ये सेडा, नानी कुन्हे!” पूरो ध्यंग आयलाय बिनती खय्याहे और चिल्लावेसी ओर अय झानी कि पानिक्ये चाक्कुय काट्वाहे, पर चुयच्ये सेडाय जवाब हां जिबेसी, और आय कोई मह्य लय हां गिराव्वा।
चुयच्ये सेडालाक्ये भविष्य जिघय वालोलाय चुय्च्ये सेडा क्ये बिनती घय क्ये लगभग पूरो ध्यंग बिताव्वाहे। अब आयलाय बिनती घयक्ये बंद खय्याहे। तब एलिय्याह य दोहरो डिंगो क्ये स्याव परमेश्वर क्ये चिपूजो जग्गाव या था आयक्ये बाद, आय मंछला नासी तीक्ये बयना भान्डीला आय बलिदान या तब झानी ओड़े खानी चिनेसी जब झानी कि स्या, काठन्ला, और अय झानी कि चिपूजो जग्गा क्ये आसपास क्ये जमीन पूरो रुपय गिल्लो हां हिर्ये।
अब एलिय्याह य बिनती खय्या, “हे यहोवा, अब्राहम, इसहाक, और याकूब क्ये परमेश्वर, नानी चिहाम्टय कि ननी इस्त्रायल देह क्ये परमेश्वर चिहि और अयलय कि ना ननिक्ये गुलाम ही। ना जवाब बेन्ये जोहहो कि अय मंछला दहे रे कि ननील हाच्चिको परमेश्वर चिहि। ”
तुरंतल, देहो दी मह्य गिरिक्या और आय स्या, काठ्नला, भिट्टा, मट्या, और अय झानी कि चिपूजो क्ये आसपास क्ये ती लय पालोव्वा। जब मंछलाय आय चेपाहे, व्हाइला जमिन्या गिरिक्यासी और हासी “यहोवा ल परमेश्वर ही”
अब एलिय्याह य चिनेसी, “चुयच्ये सेडा क्ये भविष्य जिघय वालोला बेचोते हां गा चाहिय्यो!” अय कारणय मंछलाय चुयच्ये सेडा क्ये भविष्य जिघय वालोला हाङौव्वाहे और आयला व्हाई दी अलग काताहे और आयला हाताहे।
अब एलिय्याह य अहाब राजा चिने, “फटाफट पानक्ये नावता थावक्ये, हान्खानी कि ती चिहि ही। ” फटाफट देहोला भरिव्वासी, और झिक्क ती सुरु ही भंगे। यहोवा आय कारो क्ये खत्म घय हां। अय पत्ता चल्वा कि यहोवा ल हाच्ची परमेश्वर ही।
अब एलिय्याह य पानक्ये कामाव खत्म खय्या, तब परमेश्वर य एलीशा नामु को डा पयला क्ये पानक्ये भविष्य जिघय वालो ही खानी चुन्या। परमेश्वर य एलीशा क्ये व्हाते घयनु चमत्कार ला खय्यासी। डा चमत्कार नामान क्ये हंग हिय्ये। व्हाई डा दुश्मन क्ये सिपाहिला क्ये सरदार ही, पर अय खाल्लाव क्ये डा बुरो रोगाव हिय्ये। नामान य एलीशा क्ये बारेय्या कुन्हेहा। अय कारणय एलीशा क्ये पास पिय्ये और अय आय ठीक घय खानी अनुरोध खय्या, एलीशा य नामान चिने कि काते यरदन गान्गया क्ये तीया हात्ते बार डुबकी लाव।
नामान घुस्सा हिय्ये। आय अय घय खानी मना खय्या, हान्खानी कि अय मुर्खला जा काम लागोने। पर बादया आय पानक्ये मन्व बदेल्या और काते यरदन गान्गके तिया हात्ते बार डुबकी लाव्वा। जब आखिरी बार या ती दी बहारी तोंगे त्ये परमेश्वर आय ठीक जिघय्ये।
परमेश्वर य इस्त्राएल देह क्ये मंछला क्ये पास ओर घयनु परमेश्वर क्ये भविष्य जिघय वालोला जिघाल्वासी। आय जम्मालाय मूर्तीला क्ये पूजा घयक्ये बंद घय खानी चिनेसी। आयला डा नीमला क्ये हंगे निक्को ढन्गय व्यवहार घय चाय्यो और डा नीमला पर दया घय चाय्यो। आय भविष्य जिघय वालोलाय मंछल दिध्मकाव्वेसी कि आयला बुरो काम ला घयक्ये बंद घयको हिरी और अय्क्ये बजाय परमेश्वर क्ये बतकाव लाक्ये पालन घय क्वो व्हा। अगर अय मंछलाय इन्द हां खय्याहे त्ये परमेश्वर य आय्लाक्ये दोषी मान्योते आयला फेसला खयरिव, और आयला सजा बेरिवसी।
झिक्क होय झिक्क समय्या, इस्त्राएली मंछलाय परमेश्वर क्ये आजाव क्ये पालन हां खय्याहे। अक्सर आयलाय भविष्य जिघय वालोला क्ये हंगे बुरो व्यवहार खय्याहे और अय झानी कि कभय कभय आयला हातेन्याहे। डा बार ता, आयलाय यिर्मयाह भविष्य जिघय वालो कारो कुवाया चोड़ाहे और आय व्हाईया सी खानी हाड्वाहे। व्हाई कुव्वा क्ये तलाव या कचाङया धसिव्वा। तब लेकीन राजा क्ये आय पर द्याव पिय्ये और आय पानके सिपाहिला आदेस बासी कि यिर्मयाह क्ये सी होय पयलो आय कुव्वा दी बहारी खयचोनि।
भविष्य जिघय वालोलाय परमेश्वर क्ये ओरय हाके जारी थाहे भलेय मंछलाय आयला हाते नफरत खय्याहे। आयलाय मंछला क्ये दिध्मकाव्वे कि अगर आयलाय पछतावा हां खय्याहे त्ये परमेश्वर य आयला क्ये नाह सिला जिघयरिबाय। आयलाय मंछाला क्ये अय लय याद दिलाव्वेसी कि परमेश्वर आयला पास मसीह क्ये घाल्लो क्वो वाद्दा खय हावरे।
1 राजा अध्याय 16 – 18; 2 राजा 5; यिर्मयाह 38 दी डा बायबल क्ये कहानिव
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।