18. इस्त्राएल राज्य क्ये अलग – अलग हिक्वो

दाऊद राजा य चालिस बरेहे झानी राज खय्या। तब व्हाई सिय्ये, और आय्क्ये पयाव सुलैमान इस्त्राएल देहया राज घय क्ये शुरू खय्या। परमेश्वर य सुलैमान हात बतकाव खय्या और आय चिहोद्या कि व्हाई आय होय झिक्क हांग चाहोरे कि परमेश्वर य आय खानी खयरि। सुलैमान य परमेश्वर दी फायका कि व्हाई आय झिक्क दिमाग वालो बनाउव्वे। अय बतकाव गय परमेश्वर क्ये खुश जिघा, अय कारणय परमेश्वर य सुलैमान दुनिया क्ये सबसे झिक्क दिमाग वालो पयला जिबनाव्वे। सुलैमान य झिक्क बतकाव सीक्वा और व्हाई डा दिमाग य राज गिघय वालो ही। परमेश्वर य आय झिक्क रुपय्या वालो लय जिबनाव्वे।

यरूशलेम या सुलैमान य आय मंदिर पनाउवा ज्वो खानी आयके बब्बाव गय योजना पनाउहा और सामानला इकठ्ठा खय हा। अब मंछला मिलाप वालो डेरा क्ये बजाय मंदिर या परमेश्वर क्ये भक्ती खयरे और आय खानी बलि चड़ायेरे। परमेश्वर य मंदिर या पिते मोजूद ही व्हाने, और आय्या व्हाई पान मंछला क्ये हंगे कुहाने।

पर सुलैमान य दोहरो देहवालोला क्ये मठ्याला हाते प्यार खय्या। आय झिक्क होय झिक्क , लगभग डा हजार मठ्याला हाते बर्यातिव खयते परमेश्वर क्ये आज्ञा क्ये पालन हां खय्या! अय दी झिक्क मठ्याला पराया देहला दी पिय्येसी और पान हंगे पान सेडासिला पिताहे और आयके पूजा घय क्ये जारी थाहे। अब सुलैमान बुङिव्वा त्ये व्हाई लय आय सेडाला पूजो भंगे।

अय कारण परमेश्वर य सुलैमान खानी घुस्सा ही। व्हाई चिने कि अय इस्त्राएल देह क्ये नि राज्य लाय बाट्योरिव घय क्ये जरियाय आय सजा जिबेरी। व्हाई सुलैमान क्ये सिक्ये बाद इन्द खयरिव।

सुलैमान क्ये सिक्ये बाद, रहबाम राजा बनिव्वा। इस्त्राएल देह क्ये जम्मा मंछलाय आय पान राजा क्ये जग्गाया मान्यो खानी डा जग्गा इकट्ठा हिय्येसी। आयलाय रहबाम या शिकायत खय्याहे कि सुलैमान य आयला झिक्क कठिन मेहनत स्यागय्येसी और झिक्क कर वशुलोन्या। आयलाय रहबाम दी बिनती खय्याहे कि नानी कमी काम स्यागय्येसिना।

पर रहबाम य आयला बयना मुर्खताय जवाब जिबेसी, “ननी जिघायरे कि ना बब्बाये सुलैमान य ननिला कठिन मेहनत स्यागय्येसी। पर ना ननिला आय होय लय झिक्क कठिन मेहनत हागयरिने और ना ननिला आय होय लय झिक्क कष्ट हागयरिने। ”

जब मंछलाय आय इन्द नेस्यारे कुन्हाहते आयला दी घयलायनु आयके खिलाफ दंगा फसाद खय्याहे। दह्हे जातीला सिलाय आय चिहाड्वा; आयके हंगे अब केवल नि: ज्याले जाती सिला बैच्वासी। अय नि: जाती लाय पानके यहूदा क्ये राज्य नाहे।

बाकी क्ये दह्हे जातीला सिलाय यारोबाम नामु क्वो डा मंछ पान राजा पनाउवाहे। अय जातीला देह क्ये उत्तर – पूर्व भागया ही। आयलाय पानके इस्त्राएल देह क्ये राज्य नाहे।

पर यारोबाम य परमेश्वर क्ये खिलाफ बिद्रोह खय्या और मंछला लय पाप हागय्यासी। आय पान मंछला क्ये जरियाय पूजा घय खानी नि: मूर्तीला पनाउवासी। व्हाइला अब यहूदा क्ये राज्यया यरूशलेम या परमेश्वर क्ये मंदिर या आयके भक्ति घय खानी हां कासी।

यहूदा और इस्त्राएल देह क्ये राज्य दुश्मन बनिवासी और अक्सर डा नीमला क्ये खिलाफ राकेनेसी।

इस्त्राएल देह क्ये नया राज्य या, जम्मा राजाला बुरो ही। अय दी घयनु राजा ला आयके जग्गा राजा बनिव चाह तिथाला और इस्त्राएल ला हाकेयगय सिय्येसी।

इस्त्राएल राज्य क्ये जम्मा राजाला और झिक्क मंछलाय मूर्तीला क्ये पूजा खय्याहे। जब व्हाइला इन्द खय्याहे, त्ये व्हाइला अक्सर वेस्याला क्ये हंगे ईसेसी और अय झानी कि घयनु बार मूर्तीला क्ये गेंता गेदावला क्ये बलिव लय खय्याहे।

यहूदा राज्य क्ये राजाव, दाऊद क्ये पयाव क्ये पयाव ही। अय राजाला दी घयनु निक्को मंछला ही जोलाय निक्को ढ़न्गय राज खय्याहे और परमेश्वर क्ये भक्ति खय्याहे। पर यहूदा क्ये अधिकतर राजालाय दुष्ट ही। आयला दुश्टताय राज खय्याहे, और मूर्तीला पूजा खय्याहे। अय झानी कि अयला दी घयनु राजालाय झूठी सेडाला क्ये गेंता पान पया सिला क्ये बलि बाहे। यहूदा क्ये झिक्क मंछलाय लय परमेश्वर क्ये खिलाफ विद्रोह खय्याहे ओर अलग सेडाला क्ये पूज्वाहे।