17. दाऊद क्ये हंगे परमेश्वर क्ये वाचा

शाऊल इस्त्राएल क्वो पयलो राजा ही। व्हाई लांगे और दिक्खोकोया निक्को ही, जोह्हो व्हाई मंछला चाहोनेसी एकदम व्हानदल। इस्त्राएल या पानके राज होय पयलो घयनु साल झानी शाऊल डा निक्को राजा ही। पर बादया व्हाई डा दुष्ट मंछ बनिव्वा जो परमेश्वर क्ये बतकाव हां मान्या, अय कारणय परमेश्वर डा ओर मंछ चुन्वा जो कि डा ध्यंग आयके जग्गा या राजा बनिवरी।

परमेश्वर य दाऊद नामुको डा ज्वान इस्त्राएली पयला चुन्योते डा ध्यंग शाऊल क्ये जग्गा या राजा ही खानी त्यार घयक्ये सुरु खय्या। दाऊद बैतलहम बस्ती क्वो डा भेड़ स्याचरोव वालो ही। घयनु बार, दाऊद य बाघों ओर टोका नीमला हातासी हान्खानी कि दाऊद क्ये दब्बो वालो समया आयके बब्बाव क्ये भेड़़ावला पर आईलाय हमला खय्याहे। दाऊद डा सीधा ओर गलत काम हां जिघय वालो मंछ ही। आय परमेश्वर या भरोशा खय्या ओर आयके बतकाव मान्या।

जब दाऊद अत्तर ज्वान पयला ही, आय लांगे – चोड़ो गोलियत क्ये खिलाफ राके व्हा। गोलियत डा झिक्क निक्को सिपाय ही। व्हाई झिक्क खोट्टे ओर लगभग हुंग मीटर लांगे ही! पर परमेश्वर य गोलियत हाते खानी और इस्त्राएल बचाव खानी दाऊद क्ये मद्द खय्या। आयके बाद, दाऊद य इस्त्राएल क्ये दुश्मनावला या घयनु बार बिजय प्राप्त खय्या। दाऊद डा बयना सिपाही बनिव्वा, और आय झिक्क युध्द लाया इस्त्राएली सिपाइला क्वो योंग हामटा। मंछलाय आयके झिक्के तारीफ़ खय्याहे।

मंछलाय दाऊद झिक्क प्यार जिघय्ये कि शाऊल आय चेपोते जल्लो भंगे। आखिरकारया शाऊल आय हातेको हुच्चो हा , अय कारणय दाऊद आय और आयके सिपाहिला खानी लुप्पी खानी मानङया थावक्ये । डा ध्यंग , जब शाऊल और आयके सिपाहिला दाऊद क्ये खोज या ही त्ये शाऊल डा उडार या का। अय आय उडारल ही जाहा दाऊद लुप्पी व्हा ,पर शाऊल आय हां चेपा। दाऊद शाऊल क्ये चेटा आय्क्ये झिक्क नजदीक ओक्का और आयके लत्ताव दी डा टूकङाव काट्टो बा। बादया , जब शाऊल आई उडारे दी बहारी तोंगे ते दाऊदय आय चिनोक्ये और आय होन्तर्या लत्ता क्ये तुकङाव चिहामटे। अय नियमय , शाऊल य दहा कि दाऊद य राजा बनिव खानी आय हां हातेरिव।

घयनु समय बाद , शाऊल युध्द या सिय्ये , और दाऊद इस्त्राएल देह क्ये राजा बनिव्वा। व्हाई डा निक्को राजा ही , और मंछलाय आय हंगे प्रेम थाहे। परमेश्वर य दाऊद आशीर्वाद जिबे और आय सफल जिबनाव्वे। दाऊद य घयनु युध्दला राके , और परमेश्वर य इस्त्राएल देह क्ये दुश्मन सिला हराव खानी आयला मदद खय्या। दाऊद य यरूशलेम बस्ती क्ये जित्योते आय पानके राजधानी पनाउवा , जाहा व्हाई कुहा और राज खय्या। दाऊद य चालिस बरेहे झानी राजा कुहा। अय समय क्ये चलते , इस्त्राएल सामर्थ वालो और पयहा वालो बनिव्वासी।

दाऊद डा मंदिर बनावके चाहोहा जाहा जम्मा इस्त्राएली मंछला परमेश्वर क्ये भक्ति घय हाक्कोरे और आय खानी बलि चङाव हाक्कोरे। लगभग पाड़ी ह्ये बरेहे दी , व्हाई मंछला मूसा क्ये बनाउतर्या मिलाप वालो डेराया परमेश्वर क्ये भक्ति घय हायरे और आय खानी बलि चड़ाव हायरे।

पर व्हाईया नातान नामु क्वो डा भविष्य जिब्ताव वालो मंछ ही। परमेश्वर य आय दाऊद अय नेखानी जिघाल्वा : “नय झिक्क युध्दला राकेस्यावरे , अय कारणय नङ ना खानी मंदिर ता पनाउवाना। नंग प्यागे अय पनाउरिव। ना नंग खानी झिक्क – झिक्क आशिर्वाद घयरिव। नंग डा पयाव क्ये पयावग हमेसा खानी ना मंछला या राजा क्ये रुपया राज खयरिव। ” हमेसा खानी राज जिघय वालो व्हाई डाठ्ठाला पयाव क्ये पयाव मसीह ही। मसीह परमेश्वर क्ये चुन्योतर्या मंछ ही ज्वो संसार क्ये मंछला क्ये आयला पापाव दी जिब्चावरि।

जब दाऊद य नातान क्ये चिट्ठी कुन्हा त्ये आय परमेश्वर क्ये धन्यवाद खय्या और आयके तारिफाव खय्या। परमेश्वर य आयके मान सम्मानाव बड़ाव स्याबा और आय झिक्क आशीर्वादला बेस्या। बेशक , दाऊद हां दहेन्या कि परमेश्वर य अय बतकाव ला कभय खयरिव। अय समय नानी दहय्येरे कि इस्त्राएलियों ला डा लांग समय झानी , लगभग डा बरेहे बरेहे झानी मसीह क्ये बिके इन्तजार घय को हिरी।

दाऊद य घयनु बरेहे झानी निक्को रुपय पान मंछ्लाया राज खय्या। आय बड़िया इमानदारय परमेश्वर क्ये बतकाव मान्या और परमेश्वर य आय आशीर्वाद जिघय्ये। हान्खानी कि , पानके जिन्दगिव क्ये बादया आय परमेश्वर क्ये खिलाफ भयंकर पाप खय्याहे ।

डा ध्यंग दाऊद य पानके महल क्ये बहारी डा सुन्दर मठ्या लुः समय दब्वा। व्हाई आय हां पहचानोन्या , लेकिन आय पत्ता खय्या कि आयके नामु बतशेबा ही।

पान नजराव दी दूर घय जग्गा , दाऊद य आय पान पाहे बीते खानी कोई ओर घाल्वा। व्हाई आय हन्गे पाईसा और आय वापस नावया घाल्वा। थोड़ा समय बाद बदशेबा य अय नेते दाऊद क्ये पाहे चिट्ठी घाल्वा कि व्हाई लादोव दी व्हा।

बतशेबा क्ये गिरोव ऊरिय्याह नामु क्वो डा मंछ ही। व्हाई दाऊद क्ये बढिया सिपाहिला दी डा ही। अय समय व्हाई युध्द घय खानी बहारी का व्हा। दाऊद य उरिय्याह युध्द दी वापस बुलावते आय पान मेत्येगे हंगे गुहाखानी चिने। पर और सिपाहिला युध्द या ही अय कारणय उरिय्याह य नावया बिखानी मना खय्या। अय वजह दाऊद य उरिय्याह क्ये वापस युध्द या घाल्वा और सेनापतिव अय आय युध्दया इन्द जग्गा था खानी चिने जाहां दुश्मन झिक्क ताकतवर हिरी ताकि व्हाई सीरी खयते। त्वो इंदल हिय्ये कि उरिय्याह युध्दया सिय्ये।

उरिय्याह क्ये युध्दया सिक्ये बाद दाऊद य बदशेबा हाते बर्यातिव खय्या। बादया, आय दाऊद क्ये पयाव जन्म बा। दाऊद य जो खय्या आयखानी परमेश्वर क्ये झिक्क गुस्साव पिय्ये, अय कारणय आय नातान भविष्य झिघय वालो दाऊद क्ये अय बताव खानी जिघाल्वा कि आयके पापाव घय बुरो ही। दाऊद य पान पाप क्ये पछतावा खय्या और परमेश्वर य आय माफ़ जिघय्ये। पानके बेचोतर्या जिन्दगिवय्या, पानक्ये कठिन समय्या लय दाऊद परमेश्वर क्ये चेटा - चेटा व्हा और आयके बतकाव मान्या।

पर दाऊद क्ये पयाव सिय्ये। अय प्रकारय परमेश्वर य दाऊद सजा जिबे अयके अलावा, दाऊद क्ये सी झानी, आयके पानक्ये परिवाराव क्ये घयनु मंछलाय आयके खिलाफ राकेसी, और दाऊद बुड्डा हिय्ये। पर परमेश्वर फिर लय विश्वास योग्य ही और अत्तर लय व्हाई खय्या ज्वो दाऊद हंगे घय खानी वाद्दा खय हा। कि व्हाई खयरिव, भलेई दाऊद य आयके आजा क्ये पालनाव हां खय्या। बादया, दाऊद और बतशेबा क्ये दोहरो पयाव हिय्ये, और आयलाय आयके नामु सुलैमान थाहे।