32. यीशु य दुष्ट आत्माय होंतर्या मंछ क्ये और बीमार मठ्या क्ये निक्को खय्या

यीशु और आयक्ये पयावगलाय पान नाव सिलागय आय इलाका कासी जांहा गिरासेनी मंछला कुहानेसी। व्हाइला आय जग्गाया लयकाते नाव सिला दी उतरव्वेसी।

व्हाईय्या डा मंछ ही जो दुष्ट आत्माय होयतर्या ही।

अय मंछ अच्च तड़ी वालो ही कि कोईलाय लय अय काबूया हां घय हाक्को हाहे। घयनु बार मंछलाय अयक्ये हाक्कोव और भावला जंजीरलाय होयते बाड़ी लय, व्हाई आयला काड़यन्यासी।

व्हाई मंछ आय इलाक्ये क्ये कब्रिस्तान या कुहाने। अय मंछ पूरो ध्यंग और गायरे चिल्लावने। व्हाई लत्ताला हां नेलिने और अक्सर पानक्ये ढुंगलाय घायल खयन्या।

व्हाई मंछ थावक्येते यीशु क्ये पाह पिय्ये और आयक्ये सामने घुटनावला टेक्यासी। तब यीशु य आय मंछ भतोरी क्ये दुष्ट आत्माव क्ये हंगे बतकाव खय्या और ना, “अय मंछे दी बहारी तोंङ!”

व्हाई दुष्ट आत्मा बयना आवाज य चिल्लाव्वे, “हे यीशु, परम प्रधान परमेश्वर क्ये पयाव, नंङग ना हाते हांङ कामगे? कृपा खयते ना ता सताव्वे!” तब यीशु य दुष्ट आत्मा होद्या, “नंङग नामुगे हांङ ही?” आय जवाब जिबे, “ना नामुये सेना ही, हान्खानी कि नानी झिक्क गुहाय। ” (रोमी सेना क्ये घयनु हजार सिपाहिला क्ये डा समूह क्ये “सेना” हीरे। )

आ दुष्ट आत्मालाय यीशु गेंता विनती खय्याहे, “कृपा खयते नानी अय इलाका दी बाहारी ता घाल्लोये!” व्हाईयाले पासया पहाड़या सुवर्ला डा झुण्ड चरवहा। अय कारणय दुष्ट आत्मालाय यीशु क्ये गेंता विनती खय्याहे, “कृपा खयते नानी अय सुवर्लाया घाल्लोये!” यीशु य चिनेसी, “ठीक व्हा, आय्याल घेनि!”

अब व्हाई दुष्ट आत्माला अय मन्छे दी बाहारी तोंङते आय सुवर्लाया भंकासी। व्हाई सुरला थावकेते डा ठाड्डो धारेदी झीलया फाट्टो ओड़ाहे और डूब्योते सिय्येसी। आय झुण्डया लगभग नि हजार सुवर्ला ही।

व्हाइय्या सुवर्ला देखभाल घय खानी मंछ्ला ही। जो लय ही व्हा जब आयलाय दब्वाहे त्ये व्हाइला बस्तिया थाव्केसी। यीशु य जो लय खय हा आयलाय जाम्माला बताव्वाहे। आय बस्ती दी मंछला तोंते पिय्येसी और आय मंछ चेपाहे जोया दुष्ट आत्माला ही। व्हाई शांत हि, लत्ताव्ला नेलि व्हा, और व्हाई डा साधारण मंछे जा व्यवहार खयते होय व्हा।

व्हाई मंछला झिक्क पाड़ी व्हासी और व्हाइला यीशु गा खानी नाहे। अब यीशु नावया चढ़व्वे। व्हाई मंछे जोया दुष्ट आत्माला ही आय यीशु हाते गा खानी विनती खय्या।

पर यीशु य आय ना, “हां हा। ना चाहोरे कि नंङ नावया काते जाम्माला ब्ताव्सी कि परमेश्वर य नंङ खानी हांङ खय हावरे। आयला बताव्वासी कि होखयते परमेश्वर नंङ पर दया खय हावरे। ”

अय कारणय आय मंछ ओक्का और जम्माला अय बारेय्या बतावासी जो यीशु य आय खानी खय हा। आयक्ये कहानिव जिगुन्हे वालोला हेरान हिय्येसी।

यीशु झील क्ये दोहरो तरफ लोटीव्ते पिय्ये। आयक्ये लयकाते बादे, डा झिक्क भीड़ आयक्ये अगल बगल या इकट्ठा हिय्ये और आय नोक्ये भंगेसी। आय भीड़ या डा मठ्या ही जो बार बरेहे दी हुई बाग्यो को समस्याय परेशान ही। आय पानक्ये जम्मा पय्हाव अस्पताल वालोला बासिलय फिर भी लय व्हाई निक्को हां ही व्हा, पर व्हाई रोगाव और बिगड़व भंगे।

आय मठ्याय कुन्हेहा कि यीशु य घयनु बीमार मंछला ठीक खयहावरे और आय हुच्वा, “ना भरोषा व्हा कि अगर ना केवल यीशु क्ये लत्ताव्लाल छूवरिव, त्ये ना लय ठीक हिरी!” आय कारण यीशु क्ये चेटा पिय्ये और व्हाइक्ये लत्ताव्ला छुव्वासी। जोह्हो कि व्हाई आय छुव्वा, हुय्यु बाग्यो क्ये बंद हिय्ये।

तुरन्तले, यीशु य दहा कि आय दी ताकत तोंङे। अय कारणय व्हाई चेटा फड़क्योते होदया, “ना हुई छुव्वाये?” पयावसिलागय जवाब जिबे, “अय्या घयनु झिक्क मंछलाय नंङग पाड़ी और भीड़ लगाव हाय्येरे, और नंङ धक्का बेस्यायरे। तवो नंङ हान्खानी हाद्यो स्यार कि ना हुई छुव्वाये खयते?”

व्हाई मठ्या यीशु क्ये सामने या काप्योते और झिक्क पाड़ी तर्या पानक्ये घुटनाव गय होये। तब व्हाई आय बताव्वा कि आय हांङ खय हावरे, और अय लय कि व्हाई ठीक हिय्ये। यीशु य आय ना, “ना पर नंङ पर बिश्वासगय नंङ निक्को जिघय्ये। शांतय घे। ”