33. डा खेत्ति जिघय वालो क्ये कहानिव

डा ध्यंङ, यीशु झील क्ये किनाराव क्ये पास ही। व्हाई मंछ्ला क्ये डा झिक्क बयना भीड़ क्ये शिक्षा बेहा। आय गुन्हे खानी अच्च झिक्क मंछला पिय्येसी कि यीशु क्ये पाह आय जम्माला हाते बतकाव घय खानी जग्गा ना बेच्वा। आय कारणय व्हाई तिय्या खड़े हीतर्या नावया चढ़व्ते । व्हाईया व्हाई होय और मंछला शिक्षा बासी।

यीशु य आयला अय कहानी हागुनासी, “डा किसाने बिय्ये पाड़ी खानी बाहारी तोंगे। जब व्हाई बिय्ये ला बिखेर्यो व्हा त्ये थोड़ा बिय्ये योंया गिरिक्यासी। पर ब्वाला पिते आय जम्मा बिय्ये ला जाहे। ”

“दोहरो बिय्येला ढुंग वालो जमिन्या गिरिक्यासी जाहा कमी मट्या ही। ढुंग वालो जमिन्या गिरिकोतर्या बिय्यला भुत जल्दी रिय्येसी, पर आयला जाड़ासिला जमीन क्ये भतोरी गा खानी सफल हां ही। जब दिहो तोंगे और गर्म ही भंगे त्ये व्हाई पोधाला मुरझाव भंगेसी और सिय्येसी। ”

“तब लय दोहरो बिय्ये जो झाड़ीलाया क्ये बिच्या गिरिक्यासी। आय बिय्यला लय बड़ीव्क्ये सुरु खय्याहे, पर काटालाई आयला चिन्पेसी। आय कारणय काटा वालो जमीनया गिरीकोतर्या बिय्य ला दी तोंतर्या पोधाया कोईलाया लय अनाज पयदा हां घय हाक्वाहे। ”

“दोहरो बिय्यला जो निक्को जमीनया गिरिक्यासी। व्हाई बिय्ये बयना हिय्येसी आय दी तिस, साट, और अय झानी कि ह्ये गुना अनाज प्यदा हिय्ये। जो कोई लय परमेश्वर क्ये चेटा व्हारे, व्हाइला आय बतकावया ध्यान बेनी जो ना नेहायने!”

अय कहानी पयावसिला डाहांग ना समझया पिय्ये। अय कारणय यीशु य आयला चिहमजाव्वेसी कि, “व्हाई बिय्ये परमेश्वर क्ये वचेनाव ही। व्हाई योंग डा मंछ ही जो परमेश्वर क्ये वचेनाव कुन्हेरे, पर आय जो हां हमेजोरे। तब शेतान आयक्ये पासे दी वाद्दाव चुराव्ते कातेरे। अर्थाव ही कि शेतान आय वचेनाव क्ये हमजो होय दूर था वरे। ”

“व्हाई ढुंग वालो जमीन इन्द मंछ ही जो परमेश्वर क्ये वचनाव क्ये कुन्हेरे और आनन्द क्ये हंगे मान्योव्रे। पर जब मुस्किल समय पिरे, या जब और मंछला आय स्ताव्रे, त्ये व्हाई परमेश्वर होय दूर ओक्कारे। अर्थाव ही कि व्हाई परमेश्वर या भरोसा घय क्ये बंद खयुरे। ”

“व्हाई काटा वालो जमीन इन्द मंछ ही जो परमेश्वर क्ये वचनाव कुन्हेरे। पर व्हाई बहुत झिक्क बतकाव क्ये बारेया चिंता घय क्ये सुरु खयरे, और व्हाई झिक होय झिक्क रुपय्या कमाव क्ये कोसिस खयरे, और व्हाई झिक्क होय झिक्क चीज ला क्ये पान बनाव क्ये कोसिस खयरे। थोड़ा समय क्ये बाद अब व्हाई परमेश्वर क्ये प्यार घय क्ये सफल हां हिरी। अय कारनय जो आय परमेश्वर क्ये वचनाव दी सीख्खो हावरे व्हाई आय परमेश्वर क्ये खुश घय खानी प्रयास हां खय्युरे। व्हाई घुम्य क्ये ढन्ठलाव क्ये बराबर व्हा जो कोई अनाज क्ये प्यदा हां खय्युरे। ”

“पर निक्को जमीन व्हाई मंछ ही जो परमेश्वर क्ये वचनाव कुन्हेरे, आय पर भरोसा खयरे, और फलाव प्यदा खयरे। ”