34. यीशु दोहरो कहानिला क्ये शिक्षा जिबयरे

युशु परमेश्वर क्ये राज्यावया क्ये बारेवया और झिक्क कहानिला स्यागुनेसी। उदाहरण खानी, आय चिनेसी, “परमेश्वर क्ये राज्याव डा राय क्ये बिय्याव क्ये सामान व्हा जोय पान गोड़ीवया पाड़ीय्युरे। ननी देहय्येरे कि राय क्ये बिय्याव जम्मा बिय्य होय चुयचे हीरे। ”

“पर राय क्ये बिय्याव जब बयना हीरे त्ये व्हाई बगीचा क्ये जम्मा सिंग होय झिक्क बयना हीरे, अच्च बयना कि ब्वा पिते आयक्ये हांङावलाया आराम खयरे। ”

यीशु डा अलग कहानी जिबताव्वेसी, “परमेश्वर क्ये राज्याव हुरु लग्या क्ये सामान हीरे जो कातेते डा मठ्या पीठो क्ये मिलाव्वारे तब व्हाई पूरो पीठो या मिल्वा। ”

“स्वर्ग क्ये राज्याव आय खजानाव क्ये बराबर व्हा जो कोई गोड़ीया लुपेतर्या। कोई अलग मंछ क्ये व्हाई खजाना मिल्लोरे और आय अय धरे खानि बोत चाहत थावरे। आय कारण आय अय फिर गाड्योरे। व्हाई आनंदय अच्च भरव व्हा कि आय कात पानक्ये सेहांग काल्तेवरे तबय व्हाई आय गोड़ी खरीद्यो हाक्कोरिव जाहा व्हाई खजाना ही। ”

“स्वर्ग क्ये राज्याव डा भोत किमम्त क्ये शुद्ध मोती क्ये बराबर ल व्हा। जब कोई मोतीला क्ये व्यापार जिघय वालो आय धरवरे त्ये आय खरीद्यो खानी पानक्ये सेहांग कालतवरे। ”

व्हैय्या घयनु मंछला ही जो हुचोयेरे कि परमेश्वर आयला अय कारणय चिअपनावरी कि व्हाइला भला क्ये काम घय हायरे। अय मंछला इन्द मंछला क्ये चुयचे मान्योयरे जो आय भला काम ला हां खय्येरे। अय कारणय यीशु य आयला अय कहानी जिबताव्वेसी: “नि पयला ही और निम्लाले प्रार्थना घयक्ये मंदिर्या कासी। आय दी डा कर ज्याते वालो ही, और दोहरो डा यहूदी धर्म क्ये प्रधान ही। ”

“ आय धर्म क्ये प्रधान अय प्रकार प्रार्थना खय्या कि, ‘हे परमेश्वर, नंङग धन्यवाद कि ना और मंछला बराबर – जोह्हो कि डाकू, अन्याय मंछे, दुष्कर्म, या अय झानी कि अय्या उपस्थित अय कर जिगाते वालो क्ये बराबर डा पापी हां जीगुहा। ’”

“उदाहरण खानी, ना हर हप्ताया नी बार बर्ते थावरे, और ना चिमिल्यो वालो रुपय्या और समान क्ये दह्वाव हिस्साव नंङ बने। ”

“पर व्हाई कर ज्याते वालो आय धर्म क्ये प्रधान दी झिक्क दूर ठाडो हीय्ये। आय ठाई स्वर्ग क्ये और मिक्कोव लय हां उठाव्वा। अयक्ये बदले, आय पानक्ये मुठ्ठीव गय पानक्ये छातीव पिट्या और प्रार्थना खय्या, ‘हे परमेश्वर, कृपा खयते नाया दया खय हान्खानी कि ना पापी गुहा। ’”

फिर यीशु चिनेसी, “ना ननिला हाची नेरिन कि, परमेश्वर य आय कर वालो क्ये प्रार्थना क्ये कुन्हा और आय निक्को घोषित जिघा। परन्तु आय अय धर्म क्ये प्रधान क्ये प्रार्थनाव पसंद हां खय्या। परमेश्वर हर डा घमंडी क्ये गराव धी खयरिव, पर व्हाई हर मंछ क्ये आदार बेरीव जो पानक्ये चुयचे हमेजोरे । ”