35. दयालु बब्बाव क्ये कहानिव

डा ध्यंग, यीशु आय झिक्क मंछला क्ये शिक्षा बे हासी जो आयक्ये गुन्हे खानी इकठ्ठा हिय्येसी। अय मंछला कर ज्याते वालोला और हंगयाले और मंछला लय ही जोलाय मुसा क्ये नियनमाव क्ये पालनाव घयक्ये प्रयास हां खय हाहे।

थोड़ा धर्म क्ये प्रधान य चिचेपा कि यीशु अय मंछला क्ये हंगे दोस्त क्ये बराबर बतकाव घय हारे। अय कारणय आयलाय डा नीमला क्ये हंगे अय नेके सुरु खय्याहे कि व्हाई गलत घय हारे। यीशु आयला बतकाव घय समय कुन्हा, अय कारणय आयला अय कहानी जिब्ताव्वेसी।

“डा मंछ ही जोके नि पयाव ही। चुयचे पयाव गय पान बब्बाव ना, ‘हे बब्बाये, ना अत्तरले पानक्ये हिस्साए चाय्यो!’ अब बब्बासिलाग्य नील पयासीला क्ये बिच्या पानक्ये सम्पतिव क्ये बटवारा खय्या। ”

“जल्दिले चुयचे पयाव पानक्ये सेहांग इकठ्ठा खयते दूर देहया ओक्का और पापी जिन्दगिव जिवक्ये पानक्ये जमा रुपय्या व बर्बाद खय्या। ”

“अयक्ये बाद, जाहा चुयचे पयाव ही आय देहया भयंकर अकाल पव्वा, और आयक्ये पाहे जाको खरीद्यो खानी रुपय्या हां ही। आय जो काम मिल्वा व्हाई सुवर्ला चराव को ही। व्हाई अच्च दुखी ही और भोक्यो ही कि व्हाई सुवारला क्ये जाको जाके हुचो हा। ”

“आखिरकार, आय चुयचे पयाव गय पानक्ये ना, ‘ना हांग घय हारे? ना बब्बाये क्ये जम्मा सेवा जिघय वालोला क्ये पाहे जा खानी झिक्क होय झिक्क व्हा, फिर लय ना अय्या भोक्यो सी हारे। पानक्ये बब्बाये क्ये पाहे वापस गारी और पानक्ये बब्बाये डा सेवा जिघय वालो बनिव खानी आय हाते विनती घय रिव। ’”

“अब आय चुयचे पयाव गय वापस पानक्ये बाबाव क्ये नावता गा सुरु खय्या। जबकि व्हाई अत्तर लय व्हाई दूर ही, आयक्ये बाब्बाव गय आय चिचेपा और आय पर दया खय्या। व्हाई थावक्ये त्ये पान पयाव क्ये पास का और आय गले लगावते चुम्या। ”

“आय पयाव गय ना, ‘हे बब्बाये, नाय परमेश्वर क्ये ओर नंङगे खिलाफ पाप घय हावरे। ना नंङगे पयाग नेके लायक लय हां गुहा। ’”

“पर बब्बाव गय पान आय सेवा जिघय वालोला नासी, ‘जल्दी काते सबसे निक्को लत्ता पितेते लवनी और ना पयाये हान्नेनी! आयक्ये आन्गल्यावया अंगूठी और भावलाया जोधाला हान्नेनी। फिर सबसे निक्को बाहों हातेनी ताकि नानी जाय और त्यौहार मनावरे, हान्खानी कि नाय हुच्चो हा कि ना पयाये सी व्हा, पर अब व्हाई जीवतो व्हा! व्हाई म्हा व्हा, पर अब नानी आय धराहे!’”

“आय कारणय मंछलाय त्यौहार मनाव क्ये सुरु खय्याहे। थोड़ा समय बितिव्वा, बयना पयाव गोड़ी दी काम खयते नावया पिय्ये। आय गाना और नाचो क्ये आवाज कुन्हा और अचम्भ हिय्ये फिर अय हांङ हिहारे खयते। ”

“जब बयना पयाव क्ये मालुम हिय्ये कि व्हाइला अय कारणय त्यौहार मनाव हायरे खयते हान्खानी कि आयक्ये भव्वाव नावया पि व्हा, त्वो वही झिक्क गुस्सा हिय्ये और नावया भोतोरी हां का। आयक्ये बब्बाव गय बाहारी पिते आयक्ये हंगे त्यौहार मनाव क्ये विनती खय्या, पर व्हाई मना खय्या। ”

“आय बयना पयाव गय बब्बाव ना, ‘अय जम्मा बरेहेया नाय नंङ खानी निक्को रुपय काम घय्या! कभी लय नंङग बतकावगे हां टाल्या, पर नय कभय लय डा चुयचे बाक्का हां जिबाये ताकि ना पान दोस्ते ला हंगे दावत घय हाक्कोरिव खयते। पर नंङगे पयागय नंङगे रुपय्यागे पापी काम लाया घयको या बर्बाद खय्या। और अब जब व्हाई पिय्ये त्ये आय खानी त्यौहार मनाव खानी नय सबसे निक्को बाहों स्याता !’”

“बब्बाव गय जबाब जीबे, ‘हे ना पयाये, नंङ हमेसा ना हंगे जूस्या, और जो लय ना व्हा, व्हाई सेहांग नंङगल व्हा। पर नानी खानी त्यौहार मनावक्ये सय व्हा हान्खानी कि नानी हुच्वाहे नंङगे भव्वागे सीय्ये पर व्हा अब व्हाइ जीवतो व्हा। व्हाई म्हा व्हा, पर अब नानी आय धराहे !’”