38. यीशु क्ये धोखाय चिहोंगे

हर बरेहे, यहूदी मंछला फसह क्ये त्यौहार मनायरे। अय आय बारेया डा त्यौहार ही कि घयनु ह्ये बरेहे पयलो परमेश्वर क्ये आय पित्तर्ला क्ये मिस्त्र देह क्ये गुलामी दी छुड़ाव्वासी। लगभग हुंग बरेहे क्ये बाद यीशु य जम्मा मंछला क्ये हाते वालो प्रचार घयक्ये और शिक्षा बेके सुरु खय्या। यीशु पान पयावला बताव्वासी कि व्हाई आयला हंगे यरूशलेम या फसह क्ये त्यौहार मनाव क्ये हुच्चो हासी, और अय लय कि व्हाई आय्या चिहातेरी।

यीशु क्ये पयावसिलाया डा यहूदा नामु को मंछ ही। यहूदा ख़ास पयाव क्ये रुपय्या ला थेलाव तिथा वालो जिम्मेदारिव ही, पर अक्सर व्हाई आय थेली दी रुपय्याला तोन्येन्यासी। यीशु और पयावसिला यरूशलेम लयका बाद यहूदा य यहूदी धर्म क्ये प्रधान पास ओक्का। आय रुपय्या बदले यीशु क्ये आयला हाकेया पकड़वाव क्ये बिचार थाहे। व्हाई दहेन्या कि यहूदी प्रधान हां मान्योरे खयते कि यीशु ल मसिह ही। व्हाई दहेन्या कि व्हाइला आय हात हुच्चो हायरे खयते।

महान यहूदी बयाना पुजारी क्ये नेतर्या या यहूदी क्ये महान प्रधान क्ये यीशु क्ये आयला हाक्येया पकड़वाव खानी यहूदा क्ये तीसे चाँदी क्ये सिक्काला जिबे। अय आंदल हिय्ये जो भविष्य जिघय वालोलाय न्येस्यासी कि इन्द हिरी खयते। यहूदा य मान्या और रुपय्या कातेते ओक्का। व्हाई यीशु क्ये गिरफ्तार घयक्वोया आयक्ये मदद घय खानी कोई मोका क्ये तलाह घय भंगे।

यरूशलेम या, यीशु य पान पयावसिला क्ये हंगे फसह क्ये त्यौहार मनाव्वा। फसह क्ये त्यौहार जाको क्ये चलते, यीशु य लग्या कातेते काड़य्या। आय चिनेसी, “अय कातेनी और जानी। अय ना हेरे ही जो ना ननिला बयने। अय ना याद या खय्याहेना। ” अय प्रकारय, यीशु चिनेसी कि व्हाई आयला खानी सीरी, अर्थाव ही कि आयला खानी व्हाई पान हेराव बली चड़ावरी।

फिर यीशु य डा अंगूर रह्हाव क्ये गिलाह काता और चिनेसी, “अय जा नि। अय ना नया वाचा क्ये हुय्ये ही जो कि ना ओड़ेङीव ताकि परमेश्वर ननिला पापयना क्ये माफ़ जिघयरी। हर बार अय जा समय ना यादें या अय खयनी जो अत्तर ना घय हारे। ”

तब यीशु य पान पयावसिला नासी, “ननी दी डा मंछ ना पकड़वावरे। ” पयावसिला चोकिव्वासी, और होद्यो भंगेसी कि हु इन्द काम खयरिव। यीशु य चिनेसी, “ना चिपकड़ाव वालो मंछ व्हाई हिरी जो ना लग्याक्ये टुकड़ाव बेरीव। ” जब व्हाई आय लग्या क्ये यहूदा बा।

यहूदा य आय लग्या क्ये कातेते बाद, शेतान य आय पर कब्जा खय्या। यहूदा तोंते यीशु क्ये गिरफ्तार घय खानी यहूदी प्रधान क्ये मदद घय खानी ओक्का। अय गायरे क्ये समय ही।

जाको क्ये बाद, यीशु और आयक्ये पयावसिला जैतून पहाड़या ओक्कासी। यीशु य चिनेसी, “ननी जम्मा दय गायरे ना चिहाड्डोरे। अय लिख्खो तर्या व्हा, ‘ना ग्वालोला हातेरिव और जम्मा भेड़ला तितर – बितर हिरी। ’”

पतरस य जवाब जिबे, “भले य जम्मा लाय नंङ चिहाड्डोरी, ना हां हाड्डोने!” तब यीशु य पतरस चिने, “शेतान ननी जम्माला गाते हुच्चोहारे, पर हे पतरस, नाय नंङ खानी विनती घय हावरे कि नंङ भरोसा दी चुकिव्वो ता। फिर लय, दय गायरे, मुर्गा क्ये आवाज बे होय पयलो नंङ हुंग बार मना जिघयरिव कि नंङ ना हां देहय्येरे। ”

पतरस य तब यीशु चिने, “भले ना सीरी लय, ना कभय लय नंङ मना हां घयन्ये!” बाकी क्ये जम्मा पयावसिलागय लय इंदल चिने।

तब यीशु पान पयावसिला हंगे गतसमनी नामु क्ये जग्गाया का। यीशु य पान पयावला हाते प्रार्थना घय खानी नासी ताकि शेतान आयला हां परिख्यो स्याक्कोरी। तब यीशु पानले प्रार्थना घय खानी ओक्का।

यीशु य हुंग बार प्रार्थना खय्या, “हे ना बब्बाये, अगर संभव व्हाते कृपा खयते अय दुख्ख क्ये गिलाह तुंग खानी ना ता बे। पर अगर मंछला क्ये पाप माफ़ घय खानी कोई और योंग हां व्हा, त्ये नंङगल इच्छागे पुरो हिरी। ” यीशु झिक्क उदाह ही और आयक्ये पसिनाव हुई क्ये बुदाव क्ये समान ही। आय तड़ी बे खानी परमेश्वर डा स्वर्ग क्ये दूताव घाल्वा।

हर बार प्रार्थना क्ये बाद, यीशु पान पयावसिला क्ये पाह वापिस का, पर व्हाइला इसेसी। जब यीशु हु बार लोटीव्वा त्ये यीशु य चिनेसी, “झड़ेंनि! ना चिपकड़ाव वालो अय्या व्हा। ”

यहूदी प्रधान लाय, सिपाहिला, और डा बयना भीड़ क्ये हंगे यहूदा पिय्ये। आयलाय चाक्कुला और डंडाला पितेहाहे। यहूदा य यीशु क्ये पाह पिते आय चिने, “हे गुरु, नमस्कार,” और आय चुम्या। आय गिरफ्तार घयक्ये यहूदी प्रधान क्ये सामनेया बीते खानी इन्द खय्या। तब यीशु य चिनेसी, “हे यहूदा, हांङ नंङ डा चुम्मा य ना पकड़वाव स्यायेरे?”

जब व्हाई सिपाहिला यीशु क्ये होगाहे, त्ये पतरस य आयक्ये तलवाराव तोना और महान यहूदी पुजारी क्ये डा सेवक क्ये गुनाव काट्टो बा। यीशु य चिने, “तलवार क्ये दूर खय! ना पान बब्बाये हाते पान बचाव खानी स्वर्ग क्ये दूताव क्ये डा सिपाहिला खानी विनती घय हाक्कोरे। पर ना पान बब्बाये क्ये बतकाव मान्योको व्हा। ” तब यीशु य आय मंछ क्ये गुनाव ठीक खयबा। तब जम्मा पयावला थाव क्येसी।