39. यीशु पर मुकदमा चल्लोरे

अब अय आद्दा गायरे क्ये समय ही। व्हाई सिपाहिलाय यीशु क्ये महान यहूदी बयाना पुजारी क्ये नावया ज्याते, हान्खानी कि व्हाई यीशु हाते सवाल जवाब घयको हुच्चो हा। पतरस दुरे दी आयक्ये पीछा घय हा। जब यीशु क्ये सिपाहिला नावया गाते हासी, त्ये पतरस बाहारी रुकिवते पानक्ये महिय्या गर्म घय हा।

नाव क्ये भतोरी, यहूदी प्रधान लाय यीशु ठाई मुकदमाला चलाव्वासी। व्हाइला आयक्ये खिलाफ झूठी बतकाव क्ये हा खानी घयनु झूठी ग्वाहला पितेते पिय्येसी। हालांकि, आयला बतकाव सिला डा नीमला सहमत हां ही, अय कारणय यहूदी प्रधान लाय साबित हां घय हाक्वाहे कोई बतकाव क्ये दोषी व्हा। यीशु डाहान्ना हा।

बादया, महान यहूदी बयाना पुजारी य सीधा यीशु तरफ दब्बोते ना, “नानी जिबताव्सी कि हांङ नङले जीवतो परमेश्वर क्ये पयाव मसीह चिहि?”

यीशु चिनेसी, “नाल ही, और ननिला ना परमेश्वर क्ये हंगे होयतर्या और स्वर्गए क्ये बी तर्या चिचेपोरे। ” महान यहूदी बयाना पुजारी य पान लात्तावला हाचासी हान्खानी कि जो यीशु चिनेसी व्हाई आय बतकावय झिक्क घुस्सा हीय्ये। व्हाई दोहरो प्रधान लाया चिल्लाव्वे, “नानी बताव खानी कोई और गवाह क्ये जरूरी हां व्हा कि अय मंछय हांङ खय हावरे खयते! नानिलाय पानले अय ने समय जिगुन्हाहे कि व्हाई परमेश्वर क्ये पयाव ही। अयक्ये बारेया ननिला हांङ फेस्लायना व्हा?”

जम्मा यहूदी प्रधान लाय महान यहूदी बयाना पुजारी य जबाब बाहे, “व्हाई सी चाय्यो!” तब आयलाय यीशु क्ये मिकोव्या पट्टी होय्याहे, आय थुकाहे, अय हानुव्वाहे, और आयक्ये मजाक उड़ाव्वाहे।

और पतरस, जब व्हाई नाव्क्ये बाहारी इंतज़ार घय हा। तब डा सेवा जिघय वालोय गाड़ोङय आय चिचेपा। आय अय चिने, “नंङ लय यीशु क्ये हंगे चिहि!” पतरस य मना खय्या। बादया, कोई और गाड़ोय अय बतकाव चिने, और पतरस य फिर मना खय्या। बादया, थोड़ा मंछलाय चिने, “नानी दहय्येरे कि नंङ यीशु क्ये हंगे चिहि हान्खानी कि नानी नीमला गलील दी चीहि। ”

तब पतरस नासी, “अगर ना अय मंछ क्ये दहवरे त्ये परमेश्वर ना श्राप बेरे!” तुरन्तले पतरस क्ये अय प्रकारय शपथ जा क्ये बाद, डा मुर्गी आवाज जिबेसी। यीशु य चेटा मुड़ीव्वते पतरस क्ये चेपा।

पतरस व्हाई दी ओक्का और फुट – फुट क्ये करे भंगे। आय समयले, यीशु चिहोंग वालो यहूदा य चिचेपा कि यहूदी क्ये प्रधान लाय आय मिर्त्युदंड जिबे। यहूदा झिक्क दुखी हिय्ये और काते पानक्ये हाता।

अब आय देह क्ये राज्यपाल पिलातुस ही। व्हाई रोम खानी काम खयने। यहूदी क्ये प्रधान लाय आयक्ये पाहे काताहे। व्हाइला चाहो हासी कि पिलातुस आय मिर्त्युदंड जिबेरी और आय हातेरिव। तब पिलातुस य यीशु चिहोदया, “हांङ नंङ यहूदियों ला राजा चिहि?”

यीशु य जवाब जिबे, “नय हाचिल चिनाये। पर ना राज्ये अय्या धरतिया हां व्हा। अगर हिन्ये त्ये ना सेवा जिघय वालोला ना खानी युद्ध खयनेसी। ना धरतिया परमेश्वर क्ये बारिया हाच्ची बताव खानी बीव्हारे। हर डा मंछ जो प्यार खयरे व्हाई ना कुन्हयेरे। ” पिलातुस य चिने, “तवो हाच्ची हांङ ही?”

यीशु क्ये हंगे बतकाव खयते बाद, पिलातुस बाहारी भीड़ क्ये पाह काते चिनेसी, “नाय इन्द कोई कारण हां धरा कि अय मंछ हाते क्ये योग्य व्हा। ” पर यहूदी प्रधान लाय और भिड़े दी चिल्लाव्ते चिने, “आय क्रूस या चड़ावनि!” पिलातुस य जवाब जिबेसी, “व्हाई क्ये लय गलत घयक्ये दोषी व्हा। ” पर व्हाइला और उच्चो आवाज या चिल्लाव भंगेसी। तब पिलातुस य हु बार चिनेसी, “व्हाई दोषी हां व्हा!”

पिलातुस पाड़ीय्ये कि व्हाई भीड़ दंगाला सुरु खयरे, अय कारणय व्हाई पान सिपाहिला क्ये हंगे यीशु क्ये क्रूस या चड़ाव खानी मान्या। रोमी सिपाहिला यीशु क्ये कोड़े लगाव भंगेसी, और आयक्ये राजा क्ये जोह्हो लत्ताला हान्नाहे, और आयक्ये गाराव्या काटकङ क्ये मुकुट थाहे। तब व्हाइला अय नेते अयक्ये मजाक उड़ाव भंगेसी, “दब्बोनी, यहूदियों ला क्ये राजासिला!”