40. यीशु क्ये क्रूस या चड़ाय्येरे

यीशु क्ये मजाक उड़ावते बाद, सिपाहिला आय क्रूस या चड़ाव खानी काताहे। आयलाय आय क्रूस क्ये आयल उठवाव्वाहे जोया व्हाई सीरी।

व्हाई सिपाहिला य यीशु क्ये आय जग्गाया काताहे जो “खोपड़ी” न्येन्याहे और आयक्ये हाकोव और भावला क्रूस या ठोक्याहे। पर यीशु य चिनेसी, “हे बब्बाये, आयला माफ़ खयनी, हान्खानी कि अयला हां दह्येरे कि अयला हांग घय हायरे। ” आयलाय डा चिट लय आयक्ये गारावया टानग्याहे। आय पर लिख्खो तर्या ही, “यहूदियों लाके राजा। ” पिलातुस य आयला अयले लिख्यो खानी न्ये स्यासी।

तब सिपाहिला य यीशु क्ये लात्तावला खानी चिट्ठीला ओड़ाहे। जब आयलाय इन्द खय्याहे त्ये आय भविष्य चिहि वालो बतकाव क्ये पुरो हिय्ये जो चिनेनेसी, “आयलाय ना लात्तायेला आपस या मार्ताहे, और ना लात्तायेला खानी चिठ्टीला ओड़ाहे। ”

व्हाइय्या नि डाकुला लय ही, जोला सिपाहिलाय आय समयय्या क्रूस या चड़ाव्वाहे। आयलाय यीशु नी तरफ थाहे। आय दी डा डाकुय यीशु क्ये मजाकाव उड़ाव्वा, पर दोहरॉय चिने, “नानी परमेश्वर खानी पाड़ी चाहिय्यो हान्खानी कि व्हाई सजा जिबयरे, नानी घयनु बुरो कामला क्ये घयक्ये दोसी गुहाय, पर अय मंछ निर्दोस व्हा। ” फिर आय यीशु चिने, “जब नंङ पान राज्यगया जिबिरी त्ये कृपा खयते ना याद खय्यायेना। ” यीशु य जवाब जिबे, “दयल नंङ ना हाते स्वर्ग लोकया चिहिरी। ”

यहूदी क्ये प्रधान लाय और भीड़ क्ये और मंछलाय यिशू क्ये मजाकाव उड़ाव्वाहे। आयलाय चिनेसी कि, “अगर नंङ परमेश्वर क्ये पयाव चिहि, त्ये क्रूस दी धी उतरव और पानक्ये बचाव! तब नानी नंङ पर भरोसा घयरी। ”

तब आय पुरो देह क्ये देहोला पुरो रूपए टोक्येन्या हिय्येसी, भले व्हाई ध्यंग क्ये बिच को समय ही। अय छकाले क्वो समय टोक्येन्या ही व्हा और हुंग घंटा झानी इन्द हीतर्या ही।

तब यीशु नोक्येते ना, “पुरो हिय्ये! हे बब्बाये, ना पान आत्माए नंङगे हाकेग्या सोप्योवरे। ” तब आय पान गराव झुक्काव्वा और प्राणावला हाड्वा। जब व्हाई सिय्ये त्ये डा भूयचाल पिय्ये। व्हाई बयना पर्दा जो परमेश्वर क्ये मोजुद्या मंछला क्ये अलग खय्यासी ठाई दी धी क्ये और भुट्टीते नि हिस्साव हिय्ये।

पान सिय्ये क्ये जरियाय, यीशु मंछला खानी परमेश्वर क्ये पाह बी खानी योंङ चिखओय्ने बासी। जब यीशु क्ये निगरानी जिघय वालो डा सिपाही जो लय ही व्हा अय जम्मा दब्वा त्ये आय चिनेसी, “पक्का व्हा कि, अय मंछ निर्दोह व्हा। अय परमेश्वर क्ये पयाव ही। ”

तब यूसुफ और निकुदेमुस नामु को नि यहूदी प्रधान ला पिय्येसी। व्हाई भरोसा खयनेसी कि यीशु ल मसीह ही। आय लाय पिलातुस दी यीशु क्ये हेराव फाय्काहे। आयलाय आयक्ये हेरावया लत्ताया लपेटाहे। तब व्हाइला भिट्टा दी काट्टोतर्या कब्रया काताहे और आयक्ये भतोरी थाहे। तब आयलाय आय कब्र क्ये धेराव बंद घय खानी डा बयना ढुंग क्ये लुड़काव्वाहे।