41. परमेश्वर यीशु क्ये सितर्या दी जीवतो खय्या

सिपाहिला जरियाय यीशु क्ये क्रूस या चड़ाव क्ये बाद, यहूदी क्ये प्रधान लाय पिलातुस नाहे, “आय झूठी, यीशु न्येस्यासी कि व्हाई हुंग ध्यंग क्ये बाद सितर्या दी जीवतो हिरी। कोई लाके पत्ता घय खानी कब्र क्ये निगरानी घयको हिरी कि आयक्ये पयाव ला आयक्ये हेराव चुराव्ते हां कातेरे खयते। अगर व्हाइला इन्द खयरे त्ये व्हाइला चिनेरी कि व्हाई सितर्या दी जीवतो हिय्ये। ”

पिलातुस य चिनेसी कि, “थोड़ा सिपाहिला कातेते घेनी, और जोह्हो ननी घय स्याक्कोरे व्हान्द्ल कब्र या नजर थानी। ” अय कारणय आयलाय भतोरी जिगा योंग्या दुंगक्ये डा महोर लाव्वाहे। आयलाय पक्का घय खानी व्हाइय्या सिपाहिला हाजोव्हाहे कि कोई लय आयक्ये हेराव चोरो हां घय हाक्कोरे।

यीशु क्ये सिक्य बाद क्ये ध्यंग सब्त क्ये ध्यंग ही। कोई लय सब्त ध्यंग काम हां घय हाक्कोंयाहे, अय कारणय यीशु क्ये कोई दोस्ताव लय कब्र या हां पिव्हासी। पर सब्त क्ये बाद क्ये ध्यंग, रातय झिक्क राताय्ले, थोड़ा मठ्याला यीशु क्ये कब्र या गा खानी तेयार हिय्येसी। व्हाइला आयक्ये हेराव्या और मसाला ला ल्गाव्क्ये हुच्चो हासी।

आय मठ्याला क्ये लायबी होय पयलो, कब्र या डा बयना भुय्चाल पिय्ये। स्वर्ग दी स्वर्ग क्ये डा दूताव पिते आय दुंग क्ये लुड़काव्वा जो कब्र क्ये भतोरी जिगा योंग ढक्योतर्या ही और आय पर होए। अय स्वर्ग क्ये दूताव रोंग क्ये समान चम्किव्वो हा। कब्र या जो सिपाहिला ही आयलाय आय चेपाहे। व्हाइला अच्च पाड़ीय्येसी कि सितर्या क्ये बराबर जमीनया गिरिक्यासी।

जब व्हाई मठ्याला कब्र या लयकासी त्ये आय स्वर्ग क्ये दुतावगय अयला चिनेसी, “ता पाड़ीनी। यीशु अय्या हां व्हा। व्हाई सितर्या दी जीवतो हिय्ये, जोह्हो कि आय नेस्यासी कि व्हाई जीवतो हिरी! कब्र या मरानी और दब्बोनी। ” आय मठ्यालाय कब्र क्ये भोतोरी दब्वाहे और जांहा यीशु क्ये हेराव थाहाहे व्हाइय्या मराहे और दब्वाहे कि आयक्ये हेराव आय्या हां ही!

तबे स्वर्ग क्ये दूताव गय अय मठ्याला चिनेसी, “काते आयक्ये प्यावला बतावबयनी, ‘यीशु सितर्या दी जीवतो हिय्ये और व्हाई ननिला होय गेंता गलील ता कारी। ’”

व्हाई मठ्याला अचम्भ हिय्येसी और झिक्क खुश हिय्येसी। व्हाइला पयासिला क्ये अय शुभ संदेह हागुन्हे खानी थावक्येसी।

जब व्हाई मठ्याला पयावसीला क्ये अय शुभ संदेह बताव खानी पान योंगसीलाया ही, त्ये यीशु आयला सामनेया प्रकट हिय्ये। व्हाइला आयक्ये भाव्या गिक्यासी। तब यीशु य चिनेसी, “ता पाड़ीनी। काते ना प्यायेला गलील गा खानी नेनी। व्हाइला व्हाइय्या ना चेपोरे। ”