42. यीशु स्वर्ग ता लोटीवरे

जो ध्यंग परमेश्वर य यीशु क्ये सितर्याला दी जीवतो जिघा, आयक्ये नि पयावला पाह क्ये गावया गा हासी। गा समय व्हाइला यीशु क्ये हंगे जो हिय्ये। आयक्ये बारेया बतकाव घय हासी, आयला क्ये आशा ही कि व्हाई मसीह ही, पर तब लय व्हाई हाताहे। अब व्हाई मठ्याला चिनयर कि व्हाई फिर लय जीवतो हिय्ये। व्हाइला हां दह्येरे कि हांग बतकाव पर भरोसा घय चाय्यो ।

यीशु आयला पाह पीते आयला हंगे ह्व़ा क्ये सुरु खय्या, पर व्हाईलाय आय पहचानो हां हाक्वाहे। आय चिहोदयासी कि व्हाई हुउ बारेया बतकाव घय स्यायरे। आयलाय आय चेटा ध्यांग्या यीशु क्ये हाते हितर्या जम्मा घटना क्ये बारेया बताव्वाहे। आयलाय हुच्वाहे कि व्हाई कोई परदेसी हाते बतकाव घय हायरे जो हां दहेन्या कि यरूशलेम या हांग ही व्हा।

तब यीशु य आयला चिहमजाव्वेसी कि परमेश्वर क्ये बचेनाव मसीह क्ये बारेया हांग चिन्यरे। भोत प्यलो, परमेश्वर क्ये भविष्य जिघय वालोलाय चिनेस्यासी कि बुरो मंछला मसीह क्ये कष्ट जिबेरी और चिहातेरी। पर परमेश्वर क्ये भविष्य जिघय वालोलाय अय लय चिनेसी कि व्हाई त्येहरो ध्यंग जीवतो हिरी।

जब व्हाइला आय बस्तिया लयकासी जाहा व्हाई नि मंछ रुकिव्को हुच्चो हासी, तब जानी लगभग ब्यारको हिय्ये लय। आयलाय यीशु क्ये आयला हंगे गुहा खानी निवतो बाहे, अब व्हाई आयला हंगे डा नावया का। पानक्ये ब्यारकोताय क्ये जाको खानी व्हाइला होयेसी। यीशु य डा लग्या क्ये कातेते आयला खानी परमेश्वर क्ये धन्यवाद खय्या, और फिर आय काड़य्या। अचानकय, आयलाय दहाहे कि व्हाई यीशु ही। पर आयल समय, व्हाई आयला मिक्ये सिला दी गायब हिय्ये।

आय नि मंछलाय डा नीमला नाहे, “व्हाई यीशु ही! जब अय नानी परमेश्वर क्ये वचनाव सम्झाव्वेसी त्ये नानी भोत खुश ही!” तुरन्तल, व्हाई तोंते वापस यरुशलेम या कासी। जब व्हाइला लयकासी त्ये आयलाय पयावसिला बताव्वासी, “यीशु जीवतो व्हा! नानी आय चेपाहे!”

जब पयावसिला बतकाव घय हासी, यीशु अचानकय आय कमराया प्रकट हिय्ये। आय चिनेसी , “ननिला शान्ति ध्येरेरे!” पयावसिला गय हुच्वाहे कि कोई भुत ही, पर यीशु य चिनेसी, “पाड़ीनी ता ननी भरोसा खयनी कि नाल यीशु ही”। ना हाके और भायेला दब्बोनी। भूतला पाहे इन्द हेर हां हीरे जोह्हो ना पाहे व्हा। ” अय दिखाव खानी कि व्हाई कोई भुत हां ही, आय जा खानी क्ये फायका। आयलाय आय माच्छा क्ये डा टुकड़ा बाहे, और आय अय जा लय।

यीशु चिनेसी, “ना बारेया परमेश्वर क्ये वचनाव जो कुछ लय चिन्यरे व्हाई हितर्याल कारी। नाय ननिला बताव्वासिने कि अयक्ये हिको जरुरी व्हा। ” तब यीशु य आयला परमेश्वर क्ये वचनाव निक्कोय चिह्म्जाव्वेसी। आय चिनेसी, “भोत पायलो भविष्य जिघय वालोलाय अय लिख्खो तर्या ही ना, मसीह क्ये दुख्ख उठाव को हिरी, सि पव्वोरी और पय तेहरो ध्यंग सितर्या दी जीवतो हि पव्वोरी। ”

“आय भविष्य जिघय वालोलाय अय लय लिखको हाहे कि ना पयायेला परमेश्वर क्ये वचनाव क्ये प्रचार खयरे। व्हाई हर डा क्वो पाप क्ये पछतावा घय खानी जिब्तावरि। अगर व्हाइला इन्द खयरे त्ये परमेश्वर आयला पापसिला माफ़ खयारिव। ना पयायेला अय संदेस क्ये प्रचार घयक्ये यरूशलेम या सुरु खयरे। तब व्हाइला जम्मा जग्गा और जम्मा जातिलाया कारी। नानी मंछला हर डा बतकाव क्ये और काम्क्ये गवाह ज्युस्याय जो नाय नासिने और घय्या, और आय जम्मा जो लय ना हंगे हिय्ये। ”

गेंता चालीस ध्यंग क्ये दोरान, यीशु पान पयाव्ला क्ये सामने घयनु बार प्रकट हिय्ये। डा बार ता व्हाई डा समय या पंङआ ह्ये होय झिक्क मंछला क्ये सामनेया प्रकट हिय्ये। आय पान पयावला पर घयनु प्रकारय साबित खय्या कि व्हाई जीवतो व्हा, और आय अयला परमेश्वर क्ये राज्ययाव क्ये बारेया शिक्षा जिबे।

यीशु य पान पयावला नासी, “परमेश्वर ना स्वर्ग और धरतीया हर डा मंछ क्ये राज घयक्ये अधिकार बेहाय्येरे। अय कारणय अब ना ननिला नयने: काते जम्मा जातीला क्ये मंछला क्ये पयायेना बनावनी। इन्द घय खानी, ननिला आयला बब्बायेना, पयाव, और पवित्र आत्मा क्ये नामय तिया पवित्र डुबकी लावबाहेना। जो खानी नाय ननिला आज्ञा बेहाय्ने आय जम्मा बतकाव्ला मान्यो को व्हा और ननिला आयला सिखावको व्हा। याद थानी, ना हमेसा ननिला हंगे गुहा। ”

यीशु क्ये सितर्या दी जीवतो हिक्ये चालीस ध्यंग क्ये बाद, आय पान पयावसिला नासी, “जब झानी ना बब्बाये ननिला शक्ति हां जिबयरे तब झानी यरूशलेम या कुहानी। व्हाई ननिला पर पवित्र आत्मा घाल्वो क्ये जरियाय इन्द खयरिव। ” तब यीशु स्वर्ग या ओक्का, और डा देहोय आय आयला मिक्ये सिला दी चिलुपे। स्वर्ग या यीशु जम्मा चीज लाया शासन घय खानी परमेश्वर क्ये दायो और होये।