43. कलीसिया सुरु हिय्ये

यीशु क्ये स्वर्ग दी लोटीवते बाद, आयक्ये पयावसिला यरूशलेम या रुकिव्वासी जोह्हो कि यीशु य आदेस बेस्यासी। व्हाइय्या भरोसा क्ये मंछला लगातार डा हंगे विनती घय खानी इकट्ठा हिय्येसी।

हर बरेहे, फसह क्ये त्यौहार क्ये पचाह ध्यंङ क्ये बाद, यहूदी मंछला पिन्तेकुस्त नामु क्वो डा भोत जरुरी ध्यंङ मनाव्वेरे। पिन्तेकुस्त व्हाई समय ही जब यहूदी मंछला घुमंङ क्ये काट्टोको मनावन्याहे। जम्मा दुनिया क्ये यहूदी क्ये मंछला पिन्तेकुस्त क्ये ध्यंङ क्ये डा हंगे मनाव खानी यरूशलेम या पिय्येसी। अय बरेहे, पिन्तेकुस्त मनाव क्ये समय यीशु क्ये स्वर्गया कातर्या क्ये लगभग डा हप्ता बाद पिय्ये।

जो समय जम्मा भरोसा क्ये मंछला डा हंगे इकट्ठा हिय्येसी, त्ये जो नावया व्हाइला ही अचानक व्हाइय्या तेज हव्वा क्ये आवाजय भरिव्वा। तब मह्य क्ये लपटावला क्ये जोह्हो दिख्खोको वालो थोड़ा जम्मा बरोसा जिघय वालोला क्ये गरासिला क्ये ठाय प्रकट हिय्ये। व्हाई जम्मा पवित्र आत्माय भारव्वेसी और आयलाय और भाशालाय परमेश्वर क्ये गुणगान खय्याहे। अय व्हाई भाशा ही जो हाआ खानी आयला पवित्र आत्माय सफल जिघय्येसी।

जब यरूशलेम या जिघुहा वालो मंछलाय आय काल्ला क्ये कुम्हाहे, तो व्हाई भीड़ अय दब्बो खानी डा हंगे पिय्येसी कि हांग ही हार खयते। आयलाय भरोसा जिघय वालोला क्ये परमेश्वर क्ये जरियाय खयतर्या बयना – बयना काम क्ये घोषणा घयक्वो कुन्हाहे। व्हाइला अचम्भ हिय्येसी हान्खानी कि व्हाइला आय काम क्ये पान भाषासिलाया गुन्हेहासी , पयाला घयनु देह दी ही और पानक्ये मात्र भाषासिला हाआनेसी।

आयला दी घयनु मंछलाय चिनेसी कि व्हाई प्याला नश्शाया व्हाई। पर पतरस ठाड्डो हिय्ये और आय चिनेसी “ना बतकावे कुन्हेनी! अय मंछला नश्शाया हां व्हाय! अयक्ये बजाय, जो ननी दब्बो स्यारे व्हाय व्हायल ही जो योएल भविष्य जिघय वालोय नेस्यासी कि हिरी: परमेश्वर य चिनेसी, ‘बाद क्ये ध्यंङय, ना पान आत्माये तोनेरिव। ’”

“हे इस्त्राएली पयला, यीशु डा इन्द मंछ ही जोय घयनु झिक्क अनोखा कामला खय्यासी अय दिखाव खानी कि व्हाई हु ही। आय परमेश्वर क्ये शक्ति य घयनु झिक्क अद्भुद कामला क्ये खय्यासी। नानी अय देहेयेरे, हान्खानी कि ननिलाय अय कामला क्ये चेपोस्यायेरे। पर ननिलाय आय क्रूस या चिचड़ाव्वाहे!”

“यीशु सिय्ये पर परमेश्वर य आय सितर्या दी जीवतो जिघा। आय अय बतकाव क्ये पुरो खय्या जोय डा भविष्य जिघय वालोय लिख्खो तर्या ही: ‘नंङ पान पवित्र हेरगे कब्रया हुऊ हां स्याबेरिव। ’ नानी गवाह गुहाई कि परमेश्वर य यीशु क्ये फिर जीवतो जिघा। ”

“परमेश्वर बब्बाव गय अब यीशु पान दाही और चिहाजोते सम्मान जिबे। और यीशु य नानी खानी पवित्र आत्मा घाल्लोस्यारे जोह्हो कि व्हाई वादा खय हा कि व्हाई घाल्लोरिव। पवित्र आत्मायले अय कामला क्ये ही हाबे स्यायरे जोक्ये ननि दब्बोस्यायरे और गुन्हे स्यायेरे। ”

“ननिलाय आय मंछ, यीशु क्ये क्रूस या चिचड़ाव्वाहे। पर निश्चित रुपय दहेनी कि परमेश्वर य यीशु क्ये जम्मा चीज ला क्ये प्रभु और मसीह नील जिबताव्वे!”

पतरस क्ये जिगुन्हे वालो मंछलाय आयक्ये जरियाय नेतर्या बतकावक्ये भतोरी झानी चिहिल्लाव्वेसी। अय कारणय आयलाय पतरस और पयावसिला होदया, “हे भाव्वायेला, नानी हांङ घय चाहिय्यो?”

पतरस य आयला जवाब जिबेसी, “ननी दी हर डा पानक्ये पापयना खानी पछतावा खयनी तबय परमेश्वर ननिला क्ये पापयना माफ़ जिघयरिबाय, और यीशु मसीह क्ये नामय तिय्या पवित्र डुबकी लगावनी। तब व्हाई ननिला वरदान क्ये रुपया पवित्र आत्मा जिबेरी। ”

पतरस य जो चिनेसी आय पर लगभग हुउङग हजार मंछलाय भरोसा खय्याहे और यीशु क्ये पयावसिला बनिव्वासी। आयलाय तिय्या पवित्र डुबकी लगाव्वाहे और यरूशलेम क्ये कलीसिया क्ये हिस्सा बनिव्वासी।

जब खास लाय आयला शिक्षाला जिबे त्ये भरोसा जिघय वालोलाय लगातार कुन्हाहे। व्हाइला अक्सर मिल्लोनेसी और डा हंगे जाको जानेसी, और आयलाय अक्सर डा नीमला खानी प्रार्थना खय्याहे। आयलाय मिल्लोते परमेश्वर क्ये गुणगान खय्याहे और जो लय आयला पाह ही आयलाय डा नीमला क्ये हंगे मार्ताहे। बस्ती क्ये हर डा मंछ आयला खानी निक्को बिचार तीथाहे। हर ध्यंङ, जिक्क होय जिक्क मंछला भरोसा घय तल कुहासी।