44. पतरस और युहन्ना डा भिखारी क्ये निक्को खय्येरे

डा ध्यंङ, पतरस और यूहन्ना मंदिर या कासी। डा लुल्या मंछ भीख भायक्ये खानी धेरया होय व्हा।

पतरस य आय डूणया मंछ क्ये और दब्वा और ना, “ना पाहे नंङ बेखानी रुपय्या ता हां व्हा। पर ना पाहे जो व्हा व्हाई नंङ बेने। यीशु क्ये नामय, ह्य और ह्वा – फिरव!”

तुरन्तल, परमेश्वर य आय डूङया मंछ क्ये निक्को खय्या। आय इन्डे - आंदे ह्व़ा क्ये और फाट्टो, और परमेश्वर क्ये गुणगान घयक्ये सुरु खय्या। मंदिर क्ये खङाहया मोजूद मंछला अचम्भ हिय्येसी।

जल्दिले मंछला क्ये डा भीड़ आय मंछ क्ये दब्बो खानी पिय्येसी जो निक्को ही व्हा। पतरस य आयला नासी, “अय मंछ निक्को व्हा, पर अय बतकावय अचम्भ ता हिय्येसी ना। नानी अय पान शक्ति निक्को हां घय्याहे, या अय कारणय हां हा कि नानी परमेश्वर क्ये इज्जत घय्येरे। बल्कि, व्हाई यीशु ही जोय अय मंछ पान शक्ति निक्को जिघा, हान्खानी कि नानी यीशु पर भरोसा घय्येरे। ”

“व्हाई ननिल चिहि जोलाय आय रोमी राजपाल क्ये यीशु क्ये हाते खानी नेस्याहे। ननिलाय आय चिहाताहे जो जम्माला क्ये जिंदगी जिबयरे। पर परमेश्वर आय सितर्या दी जीवतो जिघा। ननिलाय हां चिहमेज्याहे कि नानी हांङ घयस्यारे, पर जब ननिला आय काम क्ये घय स्यासी त्ये जो भविष्य जिघय वालोय नेतर्या व्हाई पुरो हिय्ये। आयलाय न्येस्यासी कि मसीह दुःख उठाववरिव और सीरी। परमेश्वर य अय आय तरीकाय ही हाबा। अय कारणय अब, पाप क्ये पछतावा खयनी और परमेश्वर या भरोसा खयनी, तबय व्हाई ननिला पापयना सिला साफ़ जिघय रिबाय। ”

जब मंदिर प्रधान लाय पतरस और यूहन्ना क्ये बतकाव कुन्हाहे, त्ये व्हाइला जिक्क घबराव्वेसी। अय कारणय आयलाय अयला गिरफ्तार खयते जेलखानेया चिओङेसी। पर जो पतरस य चिनेसी आय दी झिक्क मंछलाय भरोसा खय्याहे। यीशु थाय भरोसा जिघय वालोला क्ये संख्या बड़वते लगभग पंङआ हजार हिय्येसी।

गेंता ध्यंङ, व्हाई यहूदी क्ये प्रधान लाय पतरस और युहन्ना क्ये महान यहूदी बयाना पुजारी और अलग धर्म क्ये धर्म प्रधान ला क्ये सामनेया पिताहे। व्हाई आय मंछ लय पिताहे जो लुल्या ही। आयलाय पतरस और यूहन्ना होद्याहे, “हांङ शक्ति य ननिलाय अय लुल्या मंछ क्ये निक्को जिघाहे?”

पतरस य जवाब जिबेसी, “अय मंछ जो ननिला सामने ठाड्डो व्हा आय यीशु मसीह क्ये शक्तिव क्ये जरियाय निक्को खय तर्या व्हा। ननिलाय यीशु क्ये क्रूस या चिचड़ाव्वाहे, पर परमेश्वर य आय फिर जीवतो जिघा! ननिलाय आय पान हां चिमान्याहे, पर यीशु क्ये शक्तिव क्ये अलावा पापाव दी छमा पाँव क्ये कोय और योंङ हां व्हा!”

व्हाई प्रधान ला हेरान ही कि पतरस और यूहन्ना य झिक्क साहस य बतकाव खय्याहे। आयलाय दब्वाहे कि अयला साधारण पयला ही जो कि अनपङ ही। पर फिर आयला क्ये याद पिय्ये कि अय पयला यीशु क्ये हंगे रेहोतर्याला ही। अय कारणय आयलाय अयला नासी, “नानी ननिला भोत झिक्क सजा बेरिने अगर ननिला अय मंछ यीशु क्ये बारेया मंछला क्ये कोय और संदेस जिबय्येरेते। ” इन्द घयनु बतकाव नेते बाद, आयलाय पतरस और यूहन्ना क्ये गा हाबाहे।