46. पौलुस मसीह या भरोसा जिघय वालो बनिव्वा

शाऊल नामु क्ये डा मंछ ही जोय यीशु पर भरोसा हां खय्युरे। जब व्हाई जवान ही, तब आय स्तिफनुस क्ये चिहाते वालो मंछला क्ये लत्तावला क्ये निगरानी खय्या। बादया, आय भरोसा जिघय वालोला क्ये सताव हा। आय यरूशलेम या नाव – नाव काते पयला और मठ्याला निम्लाक्ये गिरफ्तार खयते जेल लाया ओड़ासी। तब महान यहूदी पुजारी य शाऊल क्ये दमिश्क बस्ती या गा खानी अनुमति जिबे। आय व्हाइय्या मसीह या भरोसा जिघय वालोला क्ये गिरफ्तार खयते ओर आयला आपस यरूशलेम पिते खानी शाऊल चिने।

अब शाऊल य दमिश्क गा क्ये यात्रा सुरु खय्या। आय बस्तिया लयगा होय थोड़ा पयलो,आयक्ये पाड़ी और आकाहे दी डा भोत तेज रोंङ चमकिव्वा, और व्हाई जमीनया गिरिक्या। शाऊल य हुईनु न्ये समय कुन्हा, “हे शाऊल! हे शाऊल! नंङ ना हान्खानी सताव स्यारे?” शाऊल य होदया, “हे प्रभु, नंङ हु चिहि?” यीशु य आय जवाब जिबे, “ना यीशु ही। नंङ ना सताव स्यायेरे!”

जब शाऊल उठ्व्वे त्ये व्हाई दब्बो हां हाक्को हा। आयक्ये दोस्तावला आय दमिश्क कातेते कासी। शाऊल य हूंङ ध्यंङ झानी क्ये लय जा या तूंङ हां हा।

दमिश्क या हनन्याह नामु क्वो डा पयाल ही। परमेश्वर य आय चिने, “आय नावता घे जाहा शाऊल गुहाहारे। पान हाकेगे आय पर थाना तब व्हाई फीर दब्बो हाक्कोरिव। ” पर हनन्याह चिने, “हे प्रभु, नाय गुन्हेहावरे कि अय मंछय भरोसा जिघय वालोला क्ये होखयते सताव हावरे। ”। परमेश्वर य आय जवाब जिबे, “घे! नाय आय यहूदियों ला क्ये और दोहरो जातीला क्ये मंछला हाते ना नामुये क्ये घोषणा घय खानी चुन्यो हावरे। व्हाई ना नामुये खानी झिक्क कष्ट उठावरीव। ”

और हनन्याह शाऊल क्ये पाह का, पान हाकोव्ला आय पर था, और चिने, “यीशु य, जो अय्या जीबी वालो योंङ नंङ सामनेया दीखाव्वे , ना नंङ पाहे घाल्लो हाय्येरे कि नंङ फिर दब्बो स्याक्कोरिव, और पवित्र आत्माय नंङ जिभरवरी। ” तुरंतल शाऊल फिर दब्बो भंङगे, और हनन्याह य आय तिय्या पवित्र डुबकी चिलावबा। तब शाऊल य जाको जा और फिर ताकत मिल्वा।

तब दी, शाऊल य दमिश्क या जिगुहा वालो यहूदियों लाक्ये बिचया प्रचार घय क्ये सुरु खय्या। आय चिनेसी, “यीशु ल परमेश्वर क्ये पयाव ही!” यहूदी मंछला हेरान ही, हान्खानी कि शाऊल य भरोसा जिघय वालोलाक्ये ह्आते क्ये कोशिश खय हा, पर अब आय यीशु पर भरोसा खय हा। शाऊल य यहूदियों लाक्ये हंङग माकय्येसी। आय दिखाव्वा कि यीशु ल मसीह ही।

घयनु ध्यंङ क्ये बाद, यहूदियों लाय शाऊल हाते क्ये योजना पनाव्वाहे। आयलाय आय ह्आते खानी बस्ती क्ये द्वारलाया मंछ्ला क्ये घाल्वाहे। कि व्हाई क्ये निगरानी खयरे खयते पर शाऊल य आय योजना क्ये बारेया कुन्हा, और आयक्ये दोस्ताव्ला गय बहारी तोनेक्वोया आयक्ये मदद जिघय बा। डा गायरे आयलाय आय टोकरिया हाजोते बस्ती क्ये दिवार दी धी चिउत्वारा। दमिश्क दी बचिव तोंते बाद शाऊल य यीशु क्ये बारेया प्रचार घयक्ये जारी था।

शाऊल खाश पयाला मिल्लो खानी यरूशलेम या का, पर व्हाइला आय खानी पाड़ीनेसी। तब बरनबास नामु क्वो डा भरोसा जिघय वालोय खाश पयाला क्ये पाह ज्याते। आय अयला बताव्वासी कि शाऊल य होख्यते साहस हाम्टेते दमिश्क या प्रचार खय्या। आयक्ये बाद, खाश पयाला शाऊल क्ये पान मान्याहे।

भरोसा जिघय वालोला दी थोड़ा मंछला यरूशलेम क्ये सताव दी थावक्ये ह्वासी। व्हाइला दूर अंताकिया बस्तिया कासी और यीशु क्ये बारेया प्रचार खय्याहे। अंताकिया या जिगुहा वालो मंछला अधिकतर यहूदी ला हां ही। पर पय्लो बार या, आय दी झिक्क मंछला भरोसा जिघय वालोला बनिव्वासी। बरनबास और शाऊल यीशु पर भरोसा जिघय वालोला अय न्या मंछला क्ये यीशु क्ये बारेया और झिक्क सिखाव खानी व्हाईया कासी और यीशु पर भरोसा जिघय वालोला झुण्ड (कलीसिया) क्ये मजबूत खय्याहे। यीशु या भरोसा जिघय वालोला पय्लो बार अंताकिया याल “मसीही” चिनेसी।

डा ध्यंङ, अंताकिया या मसीही मंछला बरत क्ये हंग प्रार्थना घय हाँसी। पवित्र आत्माय आयला चिनेसी, “ना खानी बरनबास और शाऊल क्ये आय काम घय खानी अलग खयनी जो घय खानी नाय आयला नोक्ये हाँसी। ” अय कारणय अंताकिया क्ये कलीसिया य बरनबास और शाऊल खानी प्रार्थना घय खानी और आयला पर पान हाकोवला था। तब आयलाय अयला और घयनु जग्गालाया यीशु क्ये बारेया शुभ संदेस क्ये प्रचार घय खानी घाल्वाहे। बरनबास और शाऊल य अलग – अलग जातिलाक्ये मंछला क्ये शिक्षा बेखानी, और घयनु मंछलाय यीशु पर भरोसा खय्याहे।