49. परमेश्वर क्ये नय्या वाचा

डा स्वर्ग क्ये दूताव गय डा ज्वान मठ्या मरियम क्ये ना कि व्हाई परमेश्वर क्ये पयाव जन्म बेरीव। व्हाई अत्तर कुवारिल ही, फिर पवित्र आत्मा आयक्ये पाह पिय्ये और व्हाई गर्भवती हिय्ये। आय डा पया क्ये जन्म बा जोक्ये नामु यीशु थाबा। अय कारणय, यीशु परमेश्वर और मंछ निह्ल व्हा।

यीशु य घयनु चमत्कार ला खय्यासी जो चिहाम्टयरे कि व्हाई परमेश्वर ही। व्हाई तिय्या व्हा और आंधी क्ये शांत खय्या। आय घयनु बीमार मंछला क्ये निक्को खय्या और घयनु मंछला दी दुष्ट आत्माला बहारी तोनासी। आय सितर्या मंछला क्ये जीवतो खय्या , और आय पङआ लग्या और नि: माछाला क्ये पर्याप्त जाकोया बदेल्या जो पंङआ हजार मंछला हायटासी।

यीशु डा महान मासाप लय ही। जो लय आय सिखाव्वेसी, व्हाई आय निक्को ढङगय चिसिखाव्वेसी। जो व्हाई मंछला घय खानी नेन्यासी व्हाई आयला घय चाहिय्यो हान्खानी कि व्हाई परमेश्वर क्ये पयाव ही। जोह्हो कि, आय चिसिखाव्वेसी कि ननिला और मंछला क्ये आयल रीती प्यार घयक्ये जरुरी व्हा जोह्हो ननी पानक्ये प्यार जिघय्येरे।

आय अय लय चिसिखाव्वेसी कि ननिला जम्मा चिजला होय झिक्क और पानक्ये सम्पति होय झिक्क परमेश्वर क्ये प्यार घय चाहिय्यो।

यीशु य चिनेसी कि संसार या कोई लय चीज पाव होय झिक्क निक्को व्हा, परमेश्वर क्ये राज्या गुहाय। आय्या राज्य या ननिला गा खानी जरूरी व्हा कि परमेश्वर ननिला ननिक्ये पापय ना दी बचावको।

यीशु य चिनेसी कि थोड़ा मंछला आय अपनावरे। परमेश्वर आय मंछला क्ये बचावरिव। पर दोहरो मंछला आय हां अपनावरे। आय अयलय चिनेसी कि थोड़ा मंछला निक्को जमीन क्ये समान व्हाई, हान्खानी कि व्हाइला यीशु क्ये बारेया शुभ संदेह अपनावरे, और परमेश्वर आयला बचावरिवसी। पर थोड़ा मंचाला योंङ क्ये ठोस जमीन क्ये समान व्हाई। परमेश्वर क्ये वचनाव बिय क्ये समान योंङया गिरिक्योरे, पर व्हाइय्या क्ये लय हां उग्गोरे। अय मंछला यीशु क्ये बारेया संदेह क्ये हां मान्योयेरे। व्हाईला आयक्ये राज्या गा खानी मना खयरे।

यीशु य चिसिखाव्वेसी कि परमेश्वर पापिला हाते झिक्क प्यार खयरे। व्हाई आयला क्ये माफ़ घयक्ये चाहोरे और आयला पानक्ये संतानाव बनाव क्ये हुच्चोरे।

यीशु य अयलय जिबताव्वेसी कि परमेश्वर पाप हाते नफरत खयरे। हान्खानी कि आदम और हव्वा य पाप खयहाहे, अय कारणय आयक्ये जम्मा संतानावला गय पाप खय्याहे। अय संसारया जिगुहा वालो हर डा मंछ पाप खयरे और परमेश्वर होय दूर व्हा। हर डा मंछ परमेश्वर क्ये दुश्मन व्हा।

पर परमेश्वर य अय संसारया जिगुहा वालो हर डा मंछ हाते अय रीतीय प्यार खय्या: आय पानक्ये डाठाला पयाव क्ये बासी ताकि परमेश्वर आयला क्ये सजा हां बेरीव जो आय पर भरोसा खयरे। अयक्ये बजाय, व्हाई आयला हाते हमेसा खानी कुहारे।

ननिला सिक्ये हकदार ज्युस्याय, हान्खानी कि ननिलाय पाप घय स्यायेरे। ननिला हात परमेश्वर क्ये गुस्सा हिको निक्को व्हा, अयक्ये जग्गावया, व्हाई यीशु पर गुस्सा हिय्ये। आय यीशु क्ये क्रूस या सिक्ये सजा जिबे।

यीशु य कभय लय पाप हां खय्या, पर आय परमेश्वर क्ये अय सजा बे हाबा। अय सी खानी मान्या। अय रीती, ननिला पापयना और अय संसार या जिगुहा वालो हर डा मंछ क्ये पापावला क्ये उठावते गाते खानी व्हाई डा निक्को बलिदान ही। यीशु य पानक्ये परमेश्वर खानी बलिदान खय्या, अय कारणय परमेश्वर कोय लय पाप क्ये, अय झानी कि भयंकर पापलाक्ये माफ़ खय्युरे।

भले अगर ननिला घयनु निक्को कामला जिघय्येरे, त्ये अयक्ये जरियाय परमेश्वर ननिला हां जिबचावरी। आयक्ये दोस्ताव बनिव खानी इन्द क्ये लय हां व्हा जो ननिला घय स्याक्कोरे। अयक्ये जग्गावया, ननिला विश्वास घयक्वो व्हा कि यीशु परमेश्वर क्ये पयाव ही, और व्हाई ननिला बदेलाया क्रूसया सिय्ये, और अय लय कि परमेश्वर य आय फिर लय जीवतो जिघा। अगर ननिला अय पर भरोसा खयनी, त्ये परमेश्वर ननिला पापयना माफ़ जिघयरिबाय।

परमेश्वर आय हर डा मंछ क्ये जिबचावरी जो यीशु पर भरोसा खयरे और आय पानक्ये प्रभु मान्योवरे। पर व्हाई आयला क्ये हां बचावरिव जो आय पर भरोसा हां खय्येरे। अयक्ये कोई मतलबाव हां व्हा कि ननी पय्हा वालो ज्युस्याय या गरीब ज्युस्याय, पयला ज्युस्याय या मठ्या ज्युस्याय, बूड़ीव्वो तर्या ज्युस्याय या जवान ज्युस्याय, या ननिला ग्वाहा जिगुहायरे। परमेश्वर ननिला हाते प्यार खयरे और चाहोर कि ननी यीशु पर भरोसा खयनी कि व्हाई ननिला दोस्त बनिव हाक्कोरिव।

यीशु ननिला क्ये नोक्ये स्यायरे कि आय पर भरोसा खयनी और तीय्या पवित्र डुबकी लावनी। हांङ ननिला भरोसा जिघय्येरे कि परमेश्वर क्ये डा ठाला पयाव, यीशु ल मसीह ही? हांङ ननिला भरोसा जिघय्येरे कि ननि डा पापी ज्युस्याय और अय लय कि ननिला परमेश्वर क्ये जरियाय सजा क्ये हकदार ज्युस्याय? हांङ ननिला भरोसा जिघय्येरे कि नानिला पापयना मिटाव खानी यीशु क्रूस या सिय्ये?

अगर ननिला यीशु या और आय ननिला खानी खय हावरे आय पर भरोसा जिघय्येरे, त्ये ननिला डा मसीह ज्युस्याय! शेतान पानक्ये ठेप्पे क्ये राज्य या अब ननिला पर राज हां खय्युरे। अब परमेश्वर पानक्ये रोंङ क्ये राज्य ननिला पर राज खयरे। आय ननिला क्ये पाप घय खानी चिरोक्यासी, जो ननिला जिघय नेसी। आय ननिला डा नय्या, निक्को जिंदगी जिबेसी।

अगर ननिला डा मसीह ज्युस्याय त्ये जो यीशु य खय हावरे आयक्ये कारणय परमेश्वर य ननिला क्ये पापयना माफ़ जिघयरी बाय। अब, परमेश्वर ननिला डा दुश्मन हां हा पर डा घयरो दोस्त चिमान्योरे।

अगर ननिला परमेश्वर क्ये दोस्त ज्युस्याय और प्रभु यीशु क्ये सेवक ज्युस्याय त्ये ननी आय बतकावक्ये पालन घयक्ये इच्छा जिघयरे जो यीशु ननिला क्ये सिखावस्यायरे। भले ननि डा मसीह ज्युस्याय, शेतान अत्तर लय पाप घय खानी ननीला क्ये परीक्षा खयरिव। पर परमेश्वर व्हाई खयरिव जो व्हाई हमेशा चिन्यरे कि व्हाई खयरिव। व्हाई चिन्यरे कि कि अगर ननिला पापयना क्ये चिमान्योयरे, त्ये व्हाई ननिला क्ये माफ़ जिघय रिबाय। व्हाई ननिला पाप क्ये खिलाफ राके खानी शक्ति जिबेरी।

परमेश्वर य ननिला प्रार्थना घयक्ये और आयक्ये वचनाव पड़व खानी चिन्यरे। व्हाई ननिला दोहरो भरोसा जिघय वालोला क्ये हंगे मिल्लोते आयक्ये भक्ति घय खानी चिन्यरे। ननिला दोहरो मंछला लय बतावक्वो व्हा कि आय ननिला खानी हांङ खयहावरे। अगर ननिला अय जम्मा कामला क्ये खयनी, त्ये ननिला आयक्ये डा पक्का दोस्ताव जिबनिवरी।