50. यीशु वापस पिरे

लगभग नि हजार बरेहे दी, संसारया जम्मा जग्गा लाया झिक्क होय झिक्क मंछला मसीह यीशु क्ये बारेया शुभ संदेह गुन्हे हासी। कलीसिया (यीशु पर भरोसा जिघय वालोला क्ये झुण्ड) बड़व हारे। यीशु य वाद्दा खय्या कि संसार क्ये अंतया वापस पीरी। हाच्चि व्हा कि व्हाई अत्तर लय वापस हां पिव्हारे, तब लय व्हाई पानक्ये वाद्दाव पूरों खय रिव।

जब कि नानी यीशु क्ये वापस लौटिव क्ये इंतज़ार घय्येरे परमेश्वर य नानी अय रीती क्ये हाते जिंदगी गिव क्ये इच्छा थावरे जो पवित्र व्हा और जो आयक्ये आदर खय्युरे। जब यीशु धरती या गुहा हा तब आय चिनेसी, “ना पयायेला संसार क्ये जम्मा जग्गा क्ये मंछला परमेश्वर क्ये राज्याव क्ये बारेया शुभ संदेस क्ये प्रचार खयरी, और तब्बे अन्ताव पीरी। ”

घयनु जातिलाय अत्तर झानी यीशु क्ये बारेया हां कुन्हे हाय्येरे। स्वर्ग या लोटीव होय पयलो, यीशु य मसीहियों ला आय मंछला क्ये शुभ संदेह हागुन्हे खानी नासी जोलाय अय कभय लय हां कुन्हेहाहे। आय चिनेसी, “घेनी और जम्मा जातीला क्ये मंछला पयायना बनाउनी!” और “काट्टो खानी गोड़ीला सिनेसी लय!”

यीशु य अय लय चिनेसी, “कोई मंछ क्ये सेवकाव पान मालिक होय बयना हां हिरे। अय संसार क्ये ख़ास मंछलाय ना हाते नफरत खय्याहे, और ना कारणय व्हाइला ननिला लय चिस्तावरी और चिहातेरी लय। अय संसारया ननिला दुख्खे चिहिरी, पर मजबूत बनिवनी, हान्खानी कि नाय शेतान क्ये हराव्वा जो अय संसारया राज खय्युरे। अगर ननिला अंत झानी ना खानी भरोसा बनाव तिथारे, त्ये परमेश्वर य ननिला जिबचावरी!”

यीशु य पान पयावला अय समझाव खानी डा कहानी हागुनाव्वा कि जब संसार क्ये अन्ताव हिरी त्ये मंछला क्ये हंगे हांग हिरी। आय चिनेसी, “कोई मंछय पान गोड़ीवया निक्को बिय्ये पाड़ीय्या। जब व्हाई इसे हा त्ये व्हाई क्ये दुश्मनाव पिय्ये और घुमंङ बिय्यला बिचया मांङको बोट्ट क्ये बिय्यला चिपाड़ीयासी , और फिर व्हाई ओक्का। ”

“ जब बोट्ट ला भूताव्वेसी त्ये सेवकलाय आय मंछ चिने, ‘हे मालिक, नय ता पान गोड़ीगया निक्को बिय्यला चिपाड़ीया। त्ये फिर अय मांङ को बोटला हान्खानी व्हाई?’ आय मंछय जवाब जिबे, ‘केवल ना दुश्मनेला आयक्ये पाड़ी क्ये चाहोहासी। अय ना कोई दुश्मने ही जो इन्द खयहावरे। ’”

“आय नौकर लाय पानक्ये मालिकाव जवाब बाहे, ‘हांङ नानी मानङ क्ये बोट्टला उखाड़ो चाय्यो? ‘आय मालिकय जवाब जिबे, ‘हांआहा। अगर ननिला इन्द जिघयरे त्ये ननिला थोड़ा घुमंङला लय चिऊखाङोड़े। काट्टो झानी इंतज़ार खयनी। तब मांङको बोट्टला गठ्टो या इकट्टा खयनी ननीला आयला पालो स्याकोरे। पर घुमंङ क्ये ना अन्न नावया पितेत लवनी। ’”

पयाव ला गय अय कहानीव क्ये मतलबाव हां हमेज्वाहे, अय कारणय आयलाय यीशु क्ये आयला हमजाव खानी निवेदन खय्याहे, “निक्को बिय्ये चिपाड़ी वालो मंछ मसीह क्ये दिखाव रे। गोड़ीला संसार क्ये चिहाम्टयरे। निक्को बिय्ये परमेश्वर क्ये राज्याव क्ये मंछला क्ये चिहाम्टयरे। ”

“मांङको बोट्टला आय दुष्ट मंछ, शेतान क्ये मंछला क्ये चिहाम्टयरे। आय मंछ क्ये दुश्मनाव शेतान क्ये चिहाम्टयरे, जोय मांङको बोट्टला पाड़ी हावरे। काट्टो अय संसार क्ये खत्म क्ये चिहाम्टयरे, और चीकाट्टो वालो परमेश्वर क्ये स्वर्ग दूताव क्ये चिहाम्टयरे। ”

“जब संसार क्ये अन्ताव हिरी तब स्वर्ग क्ये दुतावला आय जम्मा मंछला क्ये डा हंगे इकठ्ठा जिघयरी जो शेतान क्ये व्हाई। व्हाई स्वर्ग क्ये दुतावला आयला डा हंगे झिक्कल घोनो महिय्या चिचोड़ेङी। व्हाइय्या व्हाई मंछला भयंकर सताव कोय करेरी और पान दारोसिला पिस्योरी। पर जो मंछला धर्म वालो ही, जो लाय यीशु क्ये चेटा – चेटा व्हासी, व्हाइ आयला परमेश्वर बब्बा क्ये राज्य या दिहो समान चमकिवरी। ”

यीशु य अय लय चिनेसी कि व्हाई संसार क्ये अंत ही होय पयलो धरती या वापस पीरी। व्हाई आय तरीकाय वापस पीरी जोह्हो व्हाई काव्हा। अर्थाव व्हा कि, आयक्ये पाह असली हेराव हीरि, ओर व्हाई ह्अरग क्ये देहोला या सवार हीते पीरी। जब यीशु फरक्योते पिरे, त्ये हर डा मसीही जो सी व्हायरे सितर्या दी जीवतो हिरी और आय हाते ह्अरग या मिल्लोरी।

तब जो मसीही अत्तर लय जीवतो व्हाई व्हाइला ह्अरग या उठाव तर्या कारी। आय दोहरो मसीहीयो ला हाते शामिल हिरी जो सी तर्या दी जीवतो हिय्येसी। व्हाई जम्मा यीशु क्ये हंगे हिरी। आयक्ये बाद, यीशु पान मंछला क्ये हंगे कुहारी। जब व्हाइला डा हंगे कुहारी त्ये आयला पाह हमेसा खानी जम्मा शान्ति हिरी।

यीशु य आय पर भरोसा जिघय वालोला हर डा मंछ क्ये डा मुकुट बेक्ये वाद्दा खय हा। व्हाइला हमेसा खानी परमेश्वर क्ये हंगे हर डा चीज या राज खयरे। आयला पाह हमेसा पुरो शान्ति हिरी।

पर परमेश्वर आय जम्मा ला क्ये न्याय खयरी जो यीशु पर भरोसा हां खय्येरे। व्हाई आयला क्ये नरक या चिओङेङी। व्हाईय्या व्हाइला करेरी और पान दारोसिला पिस्योरे, और व्हाइला हमेशा कष्ट या हिरी। कभय ना चिसरे वालो महिय्या आयला लगातार हुतल कुहारी, और कीड़ाला आयला जा खानी कभय ना जगिवरी।

जब यीशु वापस लोटीवरे, त्ये व्हाई पूरो नियम्य शेतान क्ये और आयक्ये राज्याव क्ये खत्म खयरिव। व्हाई शेतान क्ये नर्क या ओड़ेड़ीव। व्हाइय्या शेतान क्ये हमेसा खानी हु तल कुहारी, आय जम्मा ला क्ये हंगे जोलाय परमेश्वर क्ये बतकाव मान्यो क्ये बजाय शेतान क्ये चेटा ह्व़ा क्ये चुनाव खय्याहे।

हान्खानी कि आदम और हव्वा य परमेश्वर क्ये आज्ञाव क्ये पालन हां खय हाहे और पाप क्ये अय संसार या पितेते पिह्वासी, परमेश्वर य आयला श्राप जिबेसी और आयला खत्म घय क्ये फेसला खय्या। पर कोई ध्यंङ परमेश्वर डा न्या स्वर्ग और डा नय्या धरती क्ये रचना खयरिव जो निक्को हिरी।

यीशु और आयक्ये मंछला आय नय्या धरती या कुहारी, और व्हाई हमेसा खानी जमा चीज लाया राज खयरिव। व्हाई मंछला क्ये मिक्के दी हर डा आँसू क्ये पुछोरी। अब कोई लय कष्ट या दुखी हां हिरी। व्हाइला हां करेरी। व्हाइला बीमार हां हिरी या सीरी हां हा। और व्हाइय्या कोई लय बुरो हां हिरी। यीशु पान राज्य क्ये न्यायपूर्वक, और शान्ति क्ये हंगे राज खय रिव। व्हाई हमेसा खानीं पान मंछला क्ये हंगे कुहारी।