7. परमेश्वर याकूब क्ये आशीर्वाद जिबेरे

जब व्हाई गेदाला बयना हिय्येसी त्ये याकूब क्ये नावया गुहाको निको लाग्वा, पर एसाव क्ये डिंगोला सिकार घयक्ये निक्को लाग्वा। रिबका य याकूब हाते प्यार खय्या, पर इसहाक य एसाव हाते प्यार था।

डा ध्यंङ, जब एसाव शिकार खयते वापस पिय्ये त्ये व्हाई भोत भोक्यो ही। एसाव य याकूब ना, “जो नय पकाव स्यावरे आय दी थोड़ा जाको ना लय बे। ” याकूब य जवाब जिबे, “पयलो ना हाते अय वाद्दा खय कि पयलो पया हिक्ये कारणय हर डा चीज जो नंङ मिल्लो चाय्यो, व्हाई जम्मा नंङ ना जिबेरे। ” अब एसाव य आय जम्मा चीज ला क्ये याकूब बे खानी वाद्दा खय्या। तब याकूब य आय थोड़ा जाको जिबे।

इसहाक एसाव क्ये आशीर्वाद बे चाहो हा। पर अय होय पयलोल कि व्हाई इन्द खय्या, रिबका और याकूब य याकूब क्ये एसाव ही क्वो ढोंग खयते आयक्ये हंगे धोखा खय्या। इसहाक बुड़ीव तर्या ही और अब दब्बो हां हाक्कोन्या। अय कारणय याकूब य एसाव क्ये लत्तावला नेले और बाक्का क्ये खाल्लाव पान गिद्दावया और हाकोवया लपेट्या।

याकूब इसहाक क्ये पास पिय्ये और चिने, “ना एसाव ही। ना अय कारणय बी गुहार कि नंङ ना आशीर्वाद जिबेरे। ” जब इसहाक य बाक्का क्ये हामुला क्ये महसूस खय्या और लत्ताला क्ये सुघ्या, त्ये आय हुच्वा कि व्हाई एसाव ही और आय आशीर्वाद बा।

एसाव य याकूब हाते जलन हिय्ये हान्खानी कि आयक्ये पयलो पयाव क्ये अधिकाराव क्ये और हंगल आयक्ये आशीर्वाद ला क्ये चुरावते ज्यातेबा। अब आयक्ये बब्बाव क्ये सिक्ये बाद याकूब क्ये हाते क्ये उपाय पनाव्वा।

पर रिबका य एसाव क्ये उपाय कुन्हा। अय कारणय आय और इसहाक य याकूब क्ये आयक्ये रिस्तेदारावला हंगे गुहा खानी भोत दूर घाल्वा।

याकूब घयनु बरेह झानी रिबका क्ये रिस्तेदारावला हंगे कुहा। आय समय क्ये चलते आय बर्यातीव खय्या और बार पयावला और डा गाड़ोड़ क्ये प्यदा खय्या। परमेश्वर य आय झिक्क रुपय्या वालो जिबनाव्वे।

बीस बरेह झानी कनान या पान नाव दी दूर गुहा क्ये बाद, याकूब पान परिवाराव, पान सेवकावला, और पान डिन्गोवला क्ये पुरो झुंडे हंग व्हाईया वापस पिय्ये।

याकूब अय कारणय झिक्क पाड़ीतर्या ही हान्खानी कि आय हुच्चो हा कि एसाव अत्तर लय आय हाते क्ये चाहो हारे। अय कारणय आय भेट्ये रुपया डिंगोला झुण्ड लाक्ये एसाव पाहे घाल्वा। जो सेवक आय झुण्डला क्ये कातेते का ह्वासी आयलाय चिनेसी, “नंङग सेवक याकूब, अय डिंगोला क्ये नंङ जिबेरे। व्हाई जल्दील बी हारे। ”

पर एसाव अब याकूब क्ये नुकसान हां पहुचाव चाहो हा। अयक्ये बदले, व्हाई आय डा बार फिर दब्बोते भोत खुश ही। अयक्ये बाद याकूब कनान या शान्ति य कुहा। फिर इसहाक सिय्ये और याकूब और एसाव य आय गाड्याहे। वाचा क्ये वाद्दाव जो परमेश्वरय अब्राहम हाते खय हा व्हाई अब इसहाक दी याकूब या पिय्ये लय।